Te Dios ma jaʼuk smul te ya xkʼax te bintik ya xlajinwan jilel. Ya smel yoʼtan ta stojol te machʼatik ya xkʼax swokolik yuʼun-abi. Te bintik ya xkʼax te ya xjinawan jilel ya yakʼbotik bayal jwokoltik, pero te Dios nopol ya xbajt slajin. Te bitʼil mato xkʼot ta pasel, te Dios ya yakʼbey smukʼul yoʼtan te machʼatik ya xkʼax swokol ta swenta te bintik ya xlajinwan jilel (2 Corintios 1:3).

•  ¿Bin yuʼun ya jnaʼtik te ma jaʼuk castigo yuʼun Dios te ya xkʼax te bintik ya xjinawan jilel?

•  ¿Yabal yakʼ ta ilel te ayotikix ta slajibal kʼajkʼal?

•  ¿Bin-utʼil ya xkoltayotik yuʼun Dios te machʼatik ya xkʼax swokolik yuʼune?

•  ¿Yabal skoltayotik te Biblia yuʼun chapalukotik te kʼalal ya xkʼax te bintik ya sjin jilel?

•  Textoetik te ya yakʼbey smukʼul yoʼtan te machʼatik ya xkʼax swokolike

 Te Biblia ya yal te Dios la stuuntes te yip te bintik ay ta balumilal, pero ma pajaluk sok te kʼalal ya xkʼax te bintik ya sjin jilel. ¿Bin yuʼun?

•   Spisil te ants winiketik ya xkʼax swokolik ta skaj te ya xkʼax te bintik ya xjinawan jilel. Te Biblia ya yal te Jehová la stuuntes te yip te bintik ay ta balumilal yuʼun ya yakʼbey castigo te ants winiketik te chopol stalelik. Kʼalal la sjin te lum yuʼun Sodoma sok Gomorra, kuxul la yijkitay jilel te Lot, te tojil winik stukel sok te ay chaʼtul yantsil snichʼnab (Génesis 19:29, 30). Te Jehová ya snaʼ te bin ay ta yoʼtan te ants winiketik-abi, jaʼ yuʼun jaʼnax la slajin te machʼa yiloj te chopol stalelik (Génesis 18:23-32; 1 Samuel 16:7).

•   Ma jnaʼtik bin-ora ya xkʼax te bin ya xjinawan jilel. Kʼalal te Dios mato stikunoj tal-a te castigo ta stojol te ants winiketik, nail la yaltiklanbey. Te machʼatik la schʼuunik te bin la yichʼik albeyel, kolik stukelik (Génesis 7:1-5; Mateo 24:38, 39).

•   Te ants winiketik jaʼnix smulik te ya xkʼax te bintik ya xjinawan jilel. ¿Bin yuʼun? Jaʼ yuʼun, te jaʼnix sbolobtesojik te lumkʼinal, melel ay spasojik naetik te banti ya xnoj ta jaʼ, banti ya xkʼax nijkel o te banti kʼax kʼixin te kʼinal (Apocalipsis11:18). Te Dios ma jaʼuk smul te bin ya xkʼax ta stojolik (Proverbios 19:3).

 Yak. Te albilkʼopetik te ay ta Biblia, ya yakʼ ta ilel te ta «slajibal cʼahcʼal», ya xkʼax te bintik ya xjinawan jilel (Mateo 24:3; 2 Timoteo 3:1). Kʼalal la yichʼ alel te bin ya xkʼot ta pasel ta jkʼajkʼaleltik, te Jesús jich la yal: «Ya xtal wiʼnal soc nihquel ta bayuc» (Mateo 24:7). Te Dios nopolix ya xbajt slajin te bintik ya yakʼ jwokoltik, tey ochem skʼoplal-a te kʼalal ya xkʼax te bintik ya xjinawan jilel (Apocalipsis 21:3, 4).

•   Te Dios ya yakʼtiklanbey smukʼul yoʼtan ta swenta te sKʼop. Te Biblia ya yal te ya smel yoʼtan te Dios te kʼalal ya xkʼax jwokoltik (Isaías 63:9; 1 Pedro 5:6, 7). Jaʼnix jich ya yal te ya xbajt stupʼ ta jkʼaxel te bintik ya yakʼ jwokoltike (Ilawil te recuadro « Textoetik te ya yakʼbey smukʼul yoʼtan te machʼatik ya xkʼaxik ta wokol»).

•   Te Dios ya yakʼbey smukʼul yoʼtan te machʼatik ayik ta wokol ta swenta te j-abatetik yuʼun. Te albil-kʼopetik ya yal te Jesús, ya yakʼbey smukʼul yoʼtan «te machʼatic pichʼil yoʼtanic» sok te «machʼatic ayic ta mel-oʼtan» (Isaías 61:1, 2). Ta kʼajkʼal ini, te j-abatetik yuʼun te Jehová ya spasik tulan yuʼun ya skʼayinbeyik stalel te Jesús (Juan 13:15).

   Te Dios ta stuuntes te j-abatetik yuʼun swenta ya yakʼbeyik koltayel te machʼatik ya xkʼax swokolik (Hechos 11:28-30; Gálatas 6:10).

 Yak. Te Biblia ma jaʼuk jun libro te ya yalbotik te bin ya skʼan ya jpastik te kʼalal ya xkʼax te bintik ya xjinawan jilele, pero yichʼoj tojobteseletik te ya xtuun kuʼuntik. Jich bitʼil te:

•   Chapalukat ta sitintayel te bin ya xkʼax. Te Biblia ya yal te machʼa pʼij, ya yil te bin ma lek ya xtal ta stojol sok ya snakʼ sba (Proverbios 22:3). Ya skʼan te chapalukotik yuʼun teme ay bin ya xkʼaxe, ya skʼan ya achajpan sok te afamilia te mochila yuʼun emergencia sok te yakuk anaʼik banti ya ata abaik teme kʼax te bin ya xjinawan jilel. Sok pasbeyaik señail te bin-utʼil ya apasik.

•   Naʼaikme te jaʼ mukʼ skʼoplal te akuxlejalik, ma jaʼuk te abilukik. Te Biblia jich ya yal: «Como mayuc bin quichʼojtic tal te cʼalal ayinotic liʼ ta bahlumilal, soc mayuc bin ya xhuʼ ya quichʼtic bahel» (1 Timoteo 6:7, 8). Ya skʼan te ya jlokʼes ta koʼtantik yijkitayel te jnatik sok te bintik ay kuʼuntik, yuʼun ya xkolotik-a. Juluk ta koʼtantik te jaʼ mukʼxan skʼoplal te jkuxlejaltik, ma jaʼuk te biluketike (Mateo 6:25).