Te mulile jaʼ spisil te bin ya jpastik, te bin ay ta koʼtantik o ya jnoptik te ya skontrain sba sok te mantal yuʼun te Diose (1 Juan 3:4; 5:17) Te Biblia ya yal te spasel mulile jaʼ te kʼalal ya jpastik te bin chopol te bin ma tojuk ta sit te Diose o te kʼalal ma jpastik te bin leke (Santiago 4:17).

 Ta kʼopil te la yichʼ tsʼibayel te Biblia, te kʼopil «mulil» ya skʼan ya yal te chʼay ta stojlinel o te ma la sta te bin ya skʼane. Jun ejemplo, te Biblia ya yalbey skʼoplal jtsob soldadoetik ta namey Israel te kʼax pʼijubenik ta stuuntesel te jimochʼ teynix ya xkʼot-a te ton te banti ya stojline o «mero ma xkʼax te skʼabike kʼalal ya schʼojik jun ton». Te yakuk yichʼ kʼasesel te bin-utʼil tsʼibaybil, jich ya yal: «maba ya slee smulik» (Jueces 20:16). Jaʼ yuʼun te yalel ta mulile jaʼ te kʼalal maba ya jpastik te bin ya yal ta mantal te Diose.

 Te Diose jaʼ te Jpaswanej kuʼuntik, jaʼ yuʼun jaʼ ay sderecho yuʼun ya yalbey te ants winiketik te bin ya skʼan ya spasike (Apocalipsis 4:11). Jaʼ yuʼun te joʼotike yame kakʼbeytik cuenta te Dios ta swenta te bin ya jpastike (Romanos 14:12).

¿Yabal xjuʼ te ma jle jmultike?

 Maʼuk, melel te Biblia jich ya yal: «Spisilic ay smulic, maba yichʼbeyejic yutsilal te Diose» (Romanos 3:23; 1 Reyes 8:46; Eclesiastés 7:20; 1 Juan 1:8). ¿Bin yuʼun jich ya xkʼot ta pasel ini?

 Ta sjajchibal te Adán sok te Eva maʼyuk smulik-a, tojil ants winik la yichʼ pasel. Ta slokʼomba Dios la yichʼik pasel (Genesis 1:27). Pero ma jichukik-a te kʼalal la skʼaxuntaybeyik te smantal te Jpaswanej yuʼunike (Genesis 3:5, 6, 17-19). Kʼalal alnichʼnajik la skʼasesbeyik te yal snichʼnabik te mulil sok te bitʼil maba tojil ants winiketikix-ae (Romanos 5:12). Jich bitʼil la yal te ajwalil David, «Chopolonix a cʼalal ayinon» (Salmos 51:5).

¿Aybal chaʼoxchajp muliletik te kʼax tulanik ya yilik te yantike?

 Ay. Te Biblia ya yalbey skʼoplal te winiketik ta Sodoma te «kʼax chopol yoʼtanik, la spasik mero chopol muliletik» sok te «tulan te muliletik» la spasike (Genesis 13:13; 18:20). Kilbeytik oxchajp skʼoplal.

1.   Teme tulan te mulil. Te Biblia ya yal te yalel ta mulil, yichʼel ta mukʼ lotil diosetik, elekʼ, yakubel, loʼlaywanej, milaw sok te espiritismo jaʼ tulan muliletik te maba ya skʼan ya jpastike (1 Corintios 6:9-11; Apocalipsis 21:8). Te Biblia ya yal te ma pajaluk sok te mulil ini te yantik te ay ma spasemaluk koʼtantik ya jpastik o te ma nopbiluk kuʼuntike, jich bitʼil te ay bin ya kaltik o ya jpastik te ay machʼa ya xjuʼ ya kejchentestik yuʼune (Proverbios 12:18; Efesios 4:31, 32). Manchukme jich abi, te Biblia ya yalbotik te manchuk ya jnoptik te maʼyuk skʼoplal te muliletik ini, melel ya xjuʼ ya yikʼotik bael ta spasel yantik tulan muliletik (Mateo 5:27, 28).

2.   Te bin swentail. Ay cheʼoxeb muliletik te ya yichʼ pasel ta skaj te maba ya yichʼ naʼel te bin ya yal te mantalil yuʼun te Diose (Hechos 17:30; 1 Timoteo 1:13). Maba yuʼun lek skʼoplal ya yalbey te muliletik ini pero maba pajal skʼoplal ya yalbey sok te machʼa spasemal yoʼtan ya skʼaxuntaybey te smantal te Diose (Numeros 15:30, 31). Te Biblia ya yal te machʼa sok spasemal yoʼtan ya spas te mulil, jalaj yichʼoj jun chopol oʼtanil (Jeremias 16:12).

3.   Teme bayal buelta ya yichʼ pasulanel. Te Biblia ma pajaluk skʼoplal ya yalbey sok te machʼa ya spasulan te mulil sok te machʼa ya xyal ta mulil jun buelta (1 Juan 3:​4-8). Te Dios maba lek ya yalbey skʼoplal te machʼa ya spasulan te mulil, manchuk teme la snaʼix-a te bin lek ta pasel (Hebreos 10:26, 27).

 Te ants winiketik te ay spasojik jun tulan mulil yaniwan smel yoʼtanik yuʼun te bin spasojike. Jun ejemplo jaʼ te ajwalil David te jich la stsʼibay: «Te muliletik jpasoj cʼax bayalix yalal ta cuchel. Ma xjuʼix cuʼun» (Salmo 38:4, Xchʼul Cʼop Dios ta Tzeltal yuʼun Oxchuc soc Tenejapa). Pero te Biblia ya yakʼbotik smukʼul koʼtantik, jich ya yal: «Te machʼa chopol yoʼtan acʼa yihquitay te be yuʼune, te machʼa ay mulil ta yoʼtan, acʼa yihquitay te snopojibal yuʼune; suhtanic tal ta stojol Jehová, hich me ya scʼuxultayot yuʼun, suhtanic tal ta stojol te Dios cuʼuntic, te ha ya spas bayel perdón» (Isaias 55:7).