Ta Biblia, ya yal te ay machʼatik ayik ta swenta espíritu te jaʼ ya skʼan ya yal te ay machʼa ya skʼan spasbey te skʼanojel yoʼtan te Dios sok te ya skʼan te pajal te snopojibal yuʼun soke. Te machʼa ay ta swenta te espíritu ya spas tulan te ya schʼuun te mantaliletik yuʼun te Dios ta skuxlejal sok te ya schʼuun te tojobtesel yuʼun te chʼul espíritu a (Romanos 8:5; Efesios 5:1).

 Te Biblia ya yal te maba pajal stalelik te machʼa ay o maʼuk ta swenta te espíritu. Jich bitʼil «te machʼa ma ba yichʼoj te Espíritu, ma xcʼoht ta yoʼtan te bintic scuenta te Espíritu yuʼun Dios», te jaʼ ya skʼan ya yal te bintik ya yakʼ ta nopel te Diose (1 Corintios 2:14-16). Jaʼnix jich te machʼatik ayik ta swenta chʼichʼbakʼet maʼyuk yutsil yoʼtanik, maba ya sleik te lamalkʼinal jaʼnax ya yakʼik ta ilel «xutʼet-oʼtanil sok hach-cʼop» (1 Corintios 3:1-3). Te Biblia ya yal te machʼatik ya xleawanik ta kʼop sok te ya xat te lekil amigoetik jaʼik te machʼatik ya spasik te bintik ya smulan sbakʼetalik o te «jich stalelik bitʼil chambalametik» sok maʼyuk ta yoʼtanik te espíritu (Judas 19 TNM; Proverbios 16:28). b

Te bin ya kilbeytik skʼoplal ta artículo ini:

•  ¿Bin yuʼun ay machʼa ayik ta swenta espíritu?

•  ¿Bin yuʼun mukʼ skʼoplal te ay ta koʼtantik te bintik swenta espíritu?

•  ¿Bin-utʼil ya xjuʼ x-ayin ta koʼtan te bintik swenta espíritu?

•  ¿Yabal skʼan te ay jreligion yuʼun ya x-ayin ta koʼtan te bintik swenta espíritu?

•  Lotiletik te ya yalik te bitʼil ta tael te bintik swenta espíritu

•  Textoetik yuʼun Biblia te ya yalbey skʼoplal te bintik swenta espíritu

 Ya xjuʼ te ay ta koʼtantik te bintik swenta espíritu melel jich pasbilotik te bitʼil te Diose (Génesis 1:27). Jaʼ yuʼun bayal machʼatik ya skʼan snaʼbeyik skʼoplal ta swenta te bin ma xjuʼ ta ilel sok ta tsakel.

 Jpisiltik ya xjuʼ kakʼtik ta ilel te taleliletik yuʼun te Jehová, c jich bitʼil te lamalkʼinal, kʼuxul oʼtanil, sok te ma stsaawanotik (Santiago 3:17). Ta swenta te schʼul espiritue, te Dios ya skoltay te machʼatik ay ta yoʼtanik te bintik swenta espíritu (Hechos 5:32).

 Melel teme ya jnaʼulantik te bintik swenta espíritu ya jtatik «cuxlejalil sok lamal qʼuinal» (Romanos 8:6). Spisil ini, jaʼ majtaniletik te kʼax mukʼ skʼoplal te yakʼojbotik te Diose.

•   Kuxlejalil: Te Dios ya yal te ya yakʼbey te kuxinel ta sbajtelkʼinal te ants winiketik te ay ta yoʼtanik te bintik swenta espíritu (Juan 17:3; Gálatas 6:8).

•   Lamalkʼinal: Te lamalkʼinal ini jaʼnax ya xjuʼ ya jtatik teme lek ya kil jbatik sok te Diose. Yan te machʼatik jaʼnax ya snaʼulanik te bintik swenta chʼichʼbakʼet ya skontrainik te Diose (Romanos 8:7). Pero te machʼatik ya spasik tulan ta sleel te bintik swenta espíritu, ya x-akʼbotik «te lamal qʼuinal te ya yacʼ te Diose, te cʼax mucʼ te ma xhuʼ cuʼuntic snaʼel» (Filipenses 4:6, 7). Te lamalkʼinal yuʼun te Diose ya yakʼ tseʼel oʼtanil (Mateo 5:3).

•   Nopa sok chʼuuna te bin ya yal te Diose. Ya xjuʼ ya apas ini teme ya akʼopon te Biblia, melel tey tsʼibaybil-a te snopojibal yuʼun te Dios te jaʼnix la stsʼibay winiketik te «jaʼ acʼbot snaʼ ta yoʼtanic yuʼun te Chʼul Espíritu» (2 Pedro 1:21, TZOXCH). Te bin ya anope yame skoltayat ta yichʼel ta mukʼ te Dios «ta scuenta espíritu soc ta smelelil», te bin ya skʼan ya yal jaʼ te ya awakʼ aba ta tojobtesel yuʼun te chʼul espíritu sok te jaʼ ya apas te bin ya skʼan yoʼtan te Diose (Juan 4:24).

•   Kʼopona te Diose sok kʼanbeya koltayel (Lucas 11:13). Te Diose ya skoltayat ta stael te taleliletik te ay yuʼunik te machʼatik ay ta yoʼtanik te bintik swenta espíritu (Gálatas 5:22, 23). Sok ya xjuʼ yakʼbat apʼijil swenta ya asitintay te wokoliletik ta akuxlejal (Santiago 1:5).

•   Jokina te machʼatik ay ta yoʼtanik te bintik swenta espíritu. Jaʼme ya skoltayat yuʼun jich ya anop-euk (Romanos 1:11, 12). Pero teme ay awamigotak te maba yichʼojbey te snopojibal yuʼun te Diose, yame xjuʼ yutsʼin te bitʼil lek awiloj aba sok te Diose (Santiago 4:4).

 Teme ay machʼa ay sreligion maba ya skʼan ya yal te ay ta yoʼtan te bintik swenta espíritu. Te Biblia ya yal: «Teme ay machʼa schʼuhunej Dios ta scʼop [o te ay sreligion], pero teme ma ba ya scom ye, ya sloʼloy sba ta yoʼtan, tojol te schʼuhunej Dios ya yale» (Santiago 1:26).

 Te Biblia ya yakʼ ta nopel te machʼatik jaʼ ay ta yoʼtanik te bintik swenta espíritu, ya yichʼik ta mukʼ te Dios jich te bitʼil ya skʼan stukel. Ya snaʼik te «jun-nax te espíritu», jaʼ te schʼul espíritu te Diose. Te chʼul espíritu ini ya xkoltayotik yuʼun «junax baqʼuet» ya yichʼik ta mukʼ te Diose, te bin ya skʼan ya yal jaʼ te jaʼ jun grupo te chapal ta lek, te jun yoʼtanik «ta scuenta te Espíritu, ta scuenta te lamal qʼuinal te ya yacʼ» (Efesios 4:1-4).

 Te bin ya yalik chaʼoxtul: Spisil te bintik kuxajtik ay ta yoʼtanik te bintik swenta espíritu.

 Te smelelil: Spisil te bintik spasoj te Dios ya x-albot yutsil skʼoplal yuʼun (Salmo 145:10; Romanos 1:20). Pero, te Dios jaʼnax la yakʼbey te ants winiketik te ya x-ayin ta yoʼtanik te bintik swenta espíritu. Yan stukel te chambalametik te ma snaʼik kʼinal, ma xjuʼ yamigoinik te Diose. Jaʼnax ya spasik te bin ya xtuun yuʼunike (2 Pedro 2:12). Jaʼ yuʼun, te Biblia ya yal te machʼatik maʼyuk ta yoʼtanik te bintik swenta espíritu jaʼ pajal stalelik sok te chambalametike (Santiago 3:15; Judas 19).