¿Bin ya xbajt spas te Wentainel yuʼun te Dios?
Te sujtib ya yakʼ te Biblia
Te Wentainel yuʼun te Dios jaʼ ya xbajt sjelolin spisil te ajwaliletik ta Balumilal (Daniel 2:44; Apocalipsis 16:14). Te kʼalal jich ya xkʼot ta pasel jaʼme ya xbajt spas spisil ini:
Te machʼatik chopolik ya yichʼik lajinel. «Te machʼatic chopolic ya me yichʼic loqʼuesel ta qʼuinal» (Proverbios 2:22).
Ya xlaj skʼoplal te guerraetik. Te Dios «jcʼaxel ya yacʼ quehchajuc guerrahetic cʼalal ta stiʼil bahlumilal» (Salmo 46:9).
Ya xlekub te kuxlejalil sok maʼyukix xiwel. «Jujutuhl ya shuhcan sbahic ta yeʼtal te stsʼusubil soc ta yeʼtal te higuera yuʼune, mayuc machʼa ya xiwtesotic yuʼun» (Miqueas 4:4).
Te Balumilal ya yichʼ pasel ta nichimal kʼinal: «Ay yutsil qʼuinal ya yaʼiyic te jochol taquin qʼuinal soc te taquin lum; tseʼel yoʼtan te jochol taquin qʼuinal, hich ya xnichin te bin utʼil te tsajal nichime» (Isaías 35:1).
Jpisiltik ya jmulantik te kaʼteltik: «Te machʼatic tsahbilic cuʼun ya me yaʼiybe yutsilal te yaʼtel scʼabique. Ma ba tojol nax ya xʼaʼtejic» (Isaías 65:21-23).
Ya xlaj skʼoplal te chamel: «Mayuc machʼa te nahinem ta Sión te hich ya yal: Ayon ta chamel» (Isaías 33:24).
Maʼyukix meʼel mamalubel: «Hich ya xcʼoht xan te sbaqʼuetal te bin utʼil alal, hich ya xcʼoht xan te bin utʼil querem to a» (Job 33:25).
Ya xchaʼkuxaj te machʼatik lajemik: «Spisil machʼatic ayic ta muquenal ya me yaʼiybeyic scʼop soc ya me xloqʼuic talel» (Juan 5:28, 29).