¿Bayuknaxbal ay te Diose? ¿Teybal ay ta spisil te bintik spasoje?
Te sujtib ya yakʼ te Biblia
Te Dios ya xjuʼ ya yil spisil sok ya xjuʼ ya stuuntes te yuʼel chikan banti ya skʼan stukel (Proverbios 15:3; Hebreos 4:13). Pero te Biblia maba ya yal te bayuknax banti ay te Diose. Melel te Biblia ya yal te jaʼ jun espiritu sok te jun-nax te banti yak ta nainel.
¿Bin yilel te Diose? Te Diose jaʼ jun espíritu (Juan 4:24). Jaʼ yuʼun maʼyuk machʼa ya xjuʼ ya yil (Juan 1:18). Ta najalsitiletik te ya yalbey skʼoplal te Biblia, te Diose ya xchiknaj ta jun-nax lugar. Maba ya yal te bayuknax banti aye (Isaías 6:1, 2; Apocalipsis 4:2, 3, 8).
¿Banti yak ta nainel? Te Dios kuxul ta chʼulchan te kʼax maba pajal sok te Balumilal te banti kuxulotike. Ay jun slugar «ta chʼulchan» te banti yak ta kuxinele (1 Reyes 8:30). Te Biblia ya yal te jun buelta te chʼul-abatetik ochik bael yuʼun ya «stehcʼan sbahic ta stojol Jehová», a jaʼ ini ya yakʼ kiltik te jun-nax te banti nainem te Diose (Job 1:6).
Teme maba bayuknax banti ay te Diose, ¿yabal xjuʼ ya skanantayon?
Yak. Manchukme te Dios ay ta kuxinel ta chʼulchan, ya smel yoʼtan yuʼun spisil te machʼatik kuxulik ta Balumilal. Ya yil spisil te machʼatik ya jpastik tulan ta schʼuunbeyel te smantal sok ya skoltayotik (1 Reyes 8:39; 2 Crónicas 16:9). ¿Bin-utʼil ya yakʼ ta ilel te ya smel yoʼtan ta jtojoltik sok te ya skanantayotike?
Kʼalal ya jkʼopontik: Te Jehová ya yaʼiy te oración kuʼuntik kʼalal yakotik ta spasele (2 Crónicas 18:31).
Kʼalal ayotik ta tulan mel-oʼtan: «Te Jehová nopol ay ta stojol te machʼatic ayic ta mel-oʼtan, soc ya scoltay te machʼatic pichʼil yoʼtanique» (Salmo 34:18).
Kʼalal ya jkʼantik tojobtesel: Ta swenta te Biblia, te Jehová ya yakʼ jpʼijiltik sok ya yakʼ jnaʼtik te be te ya skʼan ya jtʼuntike (Salmo 32:8).
Te bin ma stojiluk ya yichʼ chʼuunel ta swenta te bayuknax banti ay te Diose
Te bin schʼuunejik chaʼoxtul: Te Dios tey ay ta spisil te bintik spasoje.
Te bin smelelil: Te Dios maba kuxul ta Balumilal ni jaʼuk te banti ay te ekʼetike (1 Reyes 8:27). Melelnix-a te ya yal te Biblia te ekʼetik sok te chʼulchan ya yalbeyik skʼoplal «te yutsilal te Diose» (Salmo 19:1). Pero maba ya skʼan ya yal te tey yak ta kuxinel ta bintik spasoje. Jich bitʼil te machʼa ya spas dibujoe maba tey ya xkuxin ta yutil te dibujo la spase. Te dibujo ya yakʼ jnaʼbeytik sba te machʼa la sbone. Jaʼnix jich te bintik spasoj te Dios ya yakʼ kiltik te taleliletik yuʼun «te ma chicanuc ta ilel» jich bitʼil te spʼijil, te yuʼel sok te skʼuxul yoʼtane (Romanos 1:20).
Te bin schʼuunejik chaʼoxtul: Teme jun-nax banti ay te Diose, maʼyuk yuʼel sok ma xjuʼ ya snaʼ spisil.
Te bin smelelil: Te chʼul espíritu jaʼ te yip yuʼel te Dios te ay bin ya xjuʼ ya spas sok. Ta swenta te yuʼel ya xjuʼ ya snaʼ spisil te bintik yak ta kʼoel ta pasel sok ya xjuʼ ya spas te bin ya skʼan biluk-ora sok chikan banti ya skʼan manchukme maba tey ay-a te Diose (Salmo 139:7).
Te bin schʼuunejik chaʼoxtul: Te Salmo 139:8 ya yal te bayuk banti ay te Diose, melel jich ya yal: «Teme ya xmohon ta chʼulchan, tey ayat a; teme ya jchahpan jwayib ta yawil machʼatic chamenic, tey ayat a».
Te bin smelelil: Te texto ini maba ya skʼan ya yal te bayuknax banti ay te Diose. Te bin ya skʼan ya yal te texto ini, jaʼ te Diose ya xjuʼ ya skoltayotik chikanuk banti ayotik.
a Te Biblia ya yal te Dios jaʼ sbiil Jehová.
Yaniwan amulan-euk sk'oponel ini
JOJKʼOYELETIK TA SWENTA TE BIBLIA
¿Aybal banti kuxinem te Diose?
Jich bitʼil ya yal te Biblia, ¿banti kuxinem te Diose? ¿Teybal kuxinem-euk-a te Jesuse?
JOJKʼOYELETIK TA SWENTA TE BIBLIA
¿Bin-a te chʼul espiritue?
Te Biblia ya spajbey skʼoplal sok kʼabal te chʼul espiritue. ¿Bin yuʼun?
SWENTA JKʼOPLALTIK
Kʼana ulaʼtayel
Naʼbeya sujtib jun jojkʼoyel ta swenta Biblia o naʼbeyaxan skʼoplal te testigoetik yuʼun Jehová.