Te Biblia ma xyalbey skʼoplal ta jamal ta swenta te eutanasia. a Pero te bin ya yal te Biblia ta swenta te kuxlejalil sok te lajel ya skoltayotik yuʼun lekuk te bin ya jtatik ta nopel ta swenta-abi. Te Biblia ya yal te maba lek te ay machʼa ya smil sba, pero ma skʼan ya yal te lek te ya jtuuntestik poxiletik yuʼun ya jnajtubtestik te jkuxlejaltik.

 Te Biblia ya yal te jaʼ Jpaswanej kuʼuntik te Dios «te sloqʼuib-haʼ yuʼun cuxlejal» (Salmo 36:9; Hechos 17:28). Kʼax mukʼ skʼoplal ya yil te kuxlejalil te Diose, jaʼ yuʼun maba lek ya yil teme ay machʼa ya jmiltik o teme joʼotiknix ya jmil jbatike (Éxodo 20:13; 1 Juan 3:15). Jaʼnix jich, te Biblia ya yalbotik te bin ya skʼan ya jpastik yuʼun ya jkanantay te jkuxlejaltik sok te skuxlejal te yantike (Deuteronomio 22:8). Chikan ta aʼiyel te ya skʼan te mukʼ skʼoplal ta koʼtantik te kuxlejalil te jaʼ te mukʼul majtanil yakʼojbotik te Diose.

¿Jaxan te machʼa ay ta chamel te maʼyukix spoxile?

 Te Biblia maba ya yal te ya xjuʼ ta lajinbeyel skuxlejal te machʼa yuʼun-nix ya xlajix-ae o te machʼa maʼyukix spoxil te schamele. Te bin kʼot ta pasel ta stojol te Saúl te ajwalil yuʼun Israel jich ya yakʼ kiltik. Kʼalal la yichʼ ejchentesel ta guerra, la skʼanbey te soldado yuʼun te yakuk xlajinot ta milel yuʼune (1 Samuel 31:3, 4). Te soldado-abi maba la skʼan, pero ta patil jtul winik la yal te jaʼ la skoltay te Saúl ta smilel sba, pero ma smeleliluk. Te David la yakʼ ta milel te winik-abi ta skaj te la smal chʼichʼ, melel maba lek ya yil te milaw jich te bin-utʼil maba lek ya yil te Diose (2 Samuel 1:6-16).

¿Lekbal teme ay machʼa ya snajtubtes te skuxlejal?

 Maʼyuk banti ya yal te Biblia te ya skʼan ya yichʼ najtubtesbeyel skuxlejal te machʼa maʼyukix spoxil te schamel. Pero ya yal te bin-utʼil ya skʼan ya kiltik. Te lajel jaʼ jkontratik, jaʼ te bin lokʼ-a te la yichʼ kʼaxuntayel mantal te jich kʼax ta jtojoltik-euke (Romanos 5:12; 1 Corintios 15:26). Manchukme ma jkʼan ya xlajotik, ma skʼan ya jxiʼtik te lajel, melel jamal yaloj te Dios te ya schaʼkuxajtes te machʼatik lajemike (Juan 6:39, 40). Te machʼatik mukʼ skʼoplal ta yoʼtanik te kuxlejalil ya sleik lekil poxetik. Pero, jaʼ-abi maba ya skʼan ya yal te ya yichʼ leel poxetik yuʼun ya snajtubtes te skuxlejal te machʼa maʼyukix spoxil te schamele.

Te machʼa ya smil sba ¿jaʼbal jun mulil te ma xjuʼ ya sta perdón yuʼune?

 Maʼuk, te Biblia maba ya yalbey skʼoplal te machʼa ya smil sba te kʼalal ya yal ta swenta te muliletik te maʼyuk perdón yuʼune. Manchukme jaʼ jun tulan mulil, b te Diose ya xkʼot ta yoʼtan te bin yuʼun te ay machʼa ya skʼan ya smil sbae, jaʼ ta skaj te ay schamel sjol, tsakbil ta tulan estrés o te yuʼunix jich ayinik-a (Salmo 103:13, 14). Ta swenta te Biblia, te Diose ya yakʼbey smukʼul yoʼtan te machʼatik bayal ya smel yoʼtanik. Jaʼnix jich, te Biblia jamal ya yal «te ay chaʼcuxajel yuʼun te machʼatic chamenic, te machʼatic toj yoʼtanic soc te machʼatic ma ba toj yoʼtanic» (Hechos 24:15). Jaʼ ini ya yakʼ ta ilel te jaʼnix jich ya xjuʼ ya xchaʼkuxajik te machʼatik la spasik tulan mulil, teynix ochem skʼoplalik-euk-a te machʼatik la smil sbaike.