Te Dios ma skʼan te ya xyalotik ta mulwej jich ya yal te Bibliae (1 Tesalonicenses 4:3). Te mulwej te ya yalbey skʼoplal te Biblia, jaʼ te antsinel o antsiwej, te sjoy sba ta winikil o ta antsil te ya spasik mulil sok te ya sjokin sbaik ta wayel jtul winik sok jtul ants te maba nujpunemike.

•  ¿Bin yuʼun mukʼ skʼoplal ya yil Dios te ya xnujpunik te machʼatik ya yikʼ sbaike?

•  ¿Lekbal teme jichnax ya yikʼ sbaik yuʼun-nax ya yilik teme ya skʼan ya xnujpunik ta patile?

•  ¿Bin-utʼil ya xjuʼ tseʼel yoʼtanik spisil-ora te machʼatik nujpunemike?

•   Te Dios jaʼ la yakʼ chiknajuk te nujpunele. Jich la spas te kʼalal la snujpuntes te sbabial winik sok ants (Génesis 2:22-24). Te Diose ma jaʼuk ya skʼan-a te cheʼoxebnax kʼajkʼal ya xjalaj te nujpunel yuʼunike.

•   Te Dios ya snaʼ bin-a te jlekilaltike. La yakʼ te nujpunel swenta spisil-ora jun ayik te winik sok te ants. Te Dios ya skʼan te ya staik lekilal sok te kanantaybil ya yaʼiy sbaik spisil te machʼatik ayik ta jun familia. Nopa ta swenta ini: teme ay bin la aman te ma tsʼaktiklanbil tale, ya skʼan ya atuuntes te sjunal yichʼoj tal yuʼun ya anaʼ bin-utʼil ta pasel. Jaʼnixme jich, teme ya jkʼantik te tseʼel yoʼtan te jfamiliatike, ya skʼan te jaʼ ya jtʼuntik te mantaliletik yuʼun te Diose. Teme ya jchʼuuntike, spisil-ora lek ya xkʼot te bin ya jpastike (Isaías 48:17, 18).

•   Te machʼatik ya sjokin sbaik ta wayel te maba nujpunemik ya staik bayal wokolil. Jich bitʼil te ya staik alal te ma snopojik-ae, chamel sok mel-oʼtan.

•   Te Dios la yakʼbey jun majtanil te ants winiketike: jaʼ te ya xjuʼ ya sta yal snichʼnabik te kʼalal ya sjokin sbaik ta wayele. Jaʼ jun tʼujbil majtanil-abi. Juluk ta koʼtantik te chʼultesbil ya yil Dios te kuxlejalil. Jaʼ yuʼun ya skʼan te ya kichʼtik ta mukʼ te majtanile sok te jaʼuknax ya jokin jbatik ta wayel sok te machʼa nujpunemotik soke. Jich ya kichʼtik ta mukʼ te nujpunele (Hebreos 13:4).

 Swenta ya x-ayin tseʼel oʼtanil ta jun nujpunel, ma puersauk te nail jichnax ya yikʼ sbaik yuʼun ya yijkitay sbaik te bin-ora jich ya skʼanike. Te kʼuxul oʼtanil ya stsakxan yip te kʼalal ta schebalik ya spasik tulan yuʼun ya schajpanik te kʼop ay ya xjajche. a Jaʼnaxme jich ya xjuʼ yuʼunik spasel teme nujpunemike (Mateo 19:6).

 Maʼyuk ni junuk nujpunel te ma xjajch kʼop yuʼunike. Pero teme ya spas ta skuxlejalik te tsitseletik ya yakʼ te Bibliae, ya xjuʼ te tseʼel yoʼtanike. Kiltik cheʼoxebuk:

•   Jaʼme xa alebey yutsil slekil te ajoye ma jaʼuk te awuʼune (1 Corintios 7:3-5; Filipenses 2:3, 4).

•   Pasaik tulan yuʼun jujun kʼajkʼal ya xchʼi te skʼuxul awoʼtanik sok te ya awichʼ abaik ta mukʼe (Efesios 5:25, 33).

•   Nail nopaik ta lek te bin ya awalbey abaike (Proverbios 12:18).

•   Ayukme slamalil awoʼtanik sok orauk xa apasbey abaik perdón (Colosenses 3:13, 14).