Te jkʼulej winik sok te Lázaro jaʼ jun lokʼombakʼop te la scholbey skʼoplal te Jesús (Lucas 16:19-31).Te chaʼtul winiketik ini, ya yalbey skʼoplal chaʼtsojb ants winiketik: te sbabial jaʼ te jwolwanej judioetik ta skʼajkʼalel te Jesús, te schebal jaʼ te ants winiketik te pekʼel la yakʼ sbaik sok la schʼam yaʼiyik te bin la yal te Jesús.

Ta artículo ini ya kakʼbeytik sujtib te jojkʼoyeletik ini:

•  ¿Bin la yal te Jesús ta swenta te jkʼulej winik sok te Lázaro?

•  ¿Melelbal te bin kʼot ta pasel?

•  ¿Yabal yakʼ ta ilel teme yuʼun-nix ay-a te infiernoe?

•  ¿Bin ya skʼan ya yal te lokʼombakʼop ini?

 Ta Lucas capítulo 16, te Jesús la yalbey skʼoplal chaʼtul winiketik te ay bin jelon ta skuxlejalik.

 Te lokʼombakʼop ini ya yalbey skʼoplal jtul jkʼulej winik te spisil ora ya yijkitayik ta stiʼil sna jtul winik te Lázaro sbiil sok te jaʼ ya x-akʼbot sweʼ te bin ma xlajix yuʼun te jkʼulej winike. Ta patil laj te Lázaro, pero te chʼul-abatetik la yikʼik bael ta stsʼeel te Abrahán. Jaʼnix jich laj-euk te jkʼulej winik sok la smukik. Ma teyuk laj skʼoplal-a te relatoe, jich yilel bitʼil kuxulikto. Jaʼ yuʼun jich kʼoem te yak ta kʼajkʼel te jkʼulej winik, jaʼ yuʼun la yalbey te Abrahán te akʼa yalbey te Lázaro te akʼa spik jaʼ sok te akʼa yakʼbey te jkʼulej winik. Te Abrahán la yal te maʼuk, melel jelonemix te skuxlejalik sok jich yilel te namal ayik te maʼyuk machʼa ya xjuʼ ya xkʼax-a.

 Maʼuk. Jaʼ jun relato te la yal te Jesús yuʼun ay bin ya yakʼ ta nopel-a. Ay pʼijil winiketik te jaʼnix jich ya yalik te ma smeleliluk. Jich bitʼil, ta Biblia yuʼun te Lutero te lokʼ ta 1912 la yal te jaʼnax jun relato o jun lokʼombakʼop sok ta Biblia yuʼun Jerusalén, ta jun nota jaʼnix jich la yal te ma smeleliluk te bin kʼot ta pasele.

 ¿Yakbal yalbel te Jesús te ayto jkuxlejaltik-a te kʼalal lajemotikix-ae? O ¿labal skʼan la yal te ay machʼatik ya xkʼax swokolik ta infierno? sok ¿labal yal te ayik ta chʼulchan te Abrahán sok te Lázaro? Maʼuk.

 Jun ejemplo:

•   Teme ta smelelil yak ta kʼajkʼel te jkʼulej winik, ¿mabal jichuk te ya xtupʼ te jaʼ ta skaj te bayal kʼajkʼe?

•   ¿Yabal xlaj stakin tiʼil teme ya x-akʼbot jtʼuluk jaʼ yuʼun te Lazaroe?

•   ¿Bin-utʼil ay-a te ay ta chʼulchan te Abrahán, te bitʼil la yal te Jesús te maʼyuk machʼa baem ta chʼulchan? (Juan 3:13).

 Maʼuk. Manchukme ma smeleliluk, ay machʼatik ya yalik te jaʼnax ya skʼan ya yal te machʼatik lek stalelik ya xbajtik ta chʼulchan sok te machʼatik chopolik ya xbajtik ta infierno. a

 Pero ¿yuʼun-nixbal jich-a? Maʼuk.

 Melel ma jichuk te bin ya yal te Biblia ta swenta te machʼatik lajemikixe. Maba ya yal te tseʼel yoʼtanik ta chʼulchan te machʼatik lek stalelik o te ayik ta woklajel ta infierno te machʼatik chopolike, melel te Biblia jich ya yal: «Te machʼatic cuxajtic ya snaʼic te ya me xchamic, pero te machʼatic chamenic mayuc bin ya snaʼic» (Eclesiastes 9:5).

 Ya skʼan ya yal te chaʼtsojb ants winiketik ay bin ya xjelon ta skuxlejalik.

 Te jkʼulej winik jaʼ ya yalbey skʼoplal te jwolwanej judioetik «te smulanejic cʼuhlejalil» (Lucas 16:14). Manchukme ya yaʼiyik te bin ya yal te Jesús, maʼyuk bin-ora la schʼuunik. Te jwolwanejetik ini ya spʼajik te yantik ants winiketik (Juan 7:49).

 Te Lázaro jaʼ skʼoplal te ants winiketik te machʼatik la schʼuunbeyik te bin la yal te Jesús, pero te jwolwanejetik yuʼun te religionetik la spʼajik stukelik.

 Te chaʼtsojb ants winiketik ini jelon ta jkʼaxel te skuxlejalike.

•   Te jwolwanejetik yuʼun te religionetik ya skuyik te lek ilbilik yuʼun te Dios. Pero jich kʼoemik bitʼil lajemikix, te bitʼil ma la yichʼik ta mukʼ, pʼajotik yuʼun te Dios sok la spʼaj te bin-utʼil ya yichʼik ta mukʼe. Te bin ya spuk ta alel te Jesús sok te jnopojeletik yuʼun, maba lek ya yaʼiy sbaik yuʼun te kʼalal ya yaʼiyike (Mateo 23:29, 30; Hechos 5:29-33).

•   Manchukme te yantik ants winiketik ya x-utsʼinotik sok ma x-ichʼotik ta wenta yuʼun te jwolwanejetik yuʼun te religión, jaʼ lek kʼoemik. Melel la schʼuunik te bin la yal te Jesús, jaʼ koltayotik yuʼun sok jich lek ilbilik yuʼun-a te Diose (Juan 17:3).