Te Biblia ma xyal te ya skʼan ya jkʼopontik te santoetike. Jaʼnax ya skʼan ya jkʼopontik te Dios ta swenta sbiil te Jesús. Melel jich la yal te Jesús ta stojol te jnopojeletik yuʼune: «Te haʼexe, hich me xacʼoponic te Diose: Jtatic te ayat ta chʼulchan, acʼa ichʼotuc ta mucʼ achʼul bihil» (Mateo 6:9). Te Jesús maʼyuk bin-ora la yal te ya skʼan ya jkʼopontik ni junuk santo, ni jtuluk chʼul-abat o chikan machʼa-a teme ma jaʼuk te Diose.

 Te Jesús jaʼnix jich la yal: «Hoʼon te behon, hoʼon te smelelil-cʼopon, soc hoʼon te cuxlejalon; mayuc machʼa ya xtal ta stojol te Tatil teme ma haʼucon ta jcuenta» (Juan 14:6). Te machʼanax yichʼoj yaʼtel yuʼun ya xkʼopoj ta jwentatik ta stojol Dios, jaʼ te Jesuse (Hebreos 7:25).

¿Yabal xjuʼ ya jkʼopontik te Dios soknix-euk te santoetike?

 Ta lajuneb mantalil te la yakʼ te Diose, ay jun te jich ya yal: «Hoʼon Jehovahon te Dioson awuʼun, xutʼet coʼtan» (Éxodo 20:5). ¿Bin ya skʼan ya yal te xutʼet yoʼtane? Ta Biblia Xchʼul Cʼop Dios ta Tzeltal yuʼun Oxchuc soc Tenejapa jich ya yal te Éxodo 20:5: «Joʼon Dioson te jcʼaxel ma jmulan teme ya ale yantic diosetic awuʼun» o lokʼombaetik. a Jaʼ yuʼun te Dios ya skʼan te jaʼnax ya kichʼtik ta mukʼ stukele, sok te skʼoponel Diose jaʼ jun te bin-utʼil ya kichʼtik ta mukʼe (Isaías 48:11).

 Teme ay machʼa ya jkʼopontik te ma jaʼuk te Diose, chikan teme jtul chʼul-abat o jun santo, jkʼaxel ma smulan. Te sjun Apocalipsis ya yal bin la spas jtul chʼul-abat kʼalal te jpuk-kʼop Juan kʼan yichʼ ta mukʼ, jich komot yuʼun: «¡Ma me hichuc xapas! Pajal ayotic ta aʼbatinel soc nix te awermanotac te ay ta yoʼtanic te testigo-cʼop yuʼun te Jesús. Chʼuhuntaya [o ichʼa ta mukʼ] te Diose» (Apocalipsis 19:10).