Te Wentainel yuʼun te Diose maba ayuk ta koʼtantik. a Te Biblia jamal ya yal te banti aye, melel ya yal te jaʼ «te cuentahinel yuʼun te chʼulchane» (Mateo 4:17). Jaʼnix jich ya yal te jaʼ jun gobierno te yakix ta aʼtel ta chʼulchan. Kiltik.

•   Ta Wentainel yuʼun Dios, ay ajwaliletik, leyetik sok te machʼatik ya yichʼik wentainele, sok ya skʼotes ta pasel te skʼanojel yoʼtan Dios ta chʼulchan soknix ta Balumilal (Mateo 6:10; Apocalipsis 5:10).

•   Te Wentainel yuʼun te Diose jaʼ ya swentain «spisil pueblohetic, nacionetic soc cʼopiletic» ta Balumilal (Daniel 7:13, 14). Ma jaʼuk jun gobierno te stsaoj te ants winiketike, jaʼ la stsa te Diose sok yakʼojbey yaʼtel ta swentainel te ants winiketike (Salmo 2:4-6; Isaías 9:7).

•   Te Jesús la yalbey te jpuk-kʼopetik yuʼune te jaʼnix jich ya xjokinotik tey ta Wentainel ta chʼulchane ¿bin yuʼun? Jaʼnix la yal te Jesús: «Scuenta yuʼun [...] ya xhuhcajex ta mucʼul huctajibaletic», jaʼ-abi ya skʼan ya yal te ya x-ochik ta ajwalil-euk (Lucas 22:28, 30).

•   Te Wentainel yuʼun te Diose ya xbajt slajin te skontratak (Salmo 2:1, 2, 8, 9; 110:1, 2; 1 Corintios 15:25, 26).

 Te Biblia ma xyakʼ ta nopel te ya xwentainwan ta koʼtantik te Wentainel yuʼun te chʼulchane, jich yuʼun te Wentainel yuʼun te Diose maʼyuk ta koʼtantik. Te bin ya yakʼ ta nopel te Bibliae jaʼ te ya xjuʼ ya stij koʼtantik «te lec yachʼil cʼop yuʼun te cuentahinel» (Mateo 13:19; 24:14).

¿Pero mabal jichuk la yal te Jesús: «Ay ta awoʼtanic te cuentahinel yuʼun Dios»?

 Ay Bibliaetik te jich la skʼasesik te Lucas 17:21: «Ay ta awoʼtanic te cuentahinel yuʼun Dios» (nota te ay ta Biblia Scʼop Dios Tzeltal yuʼun Bachajón). Jaʼ yuʼun bayal machʼatik ya yalik te aylaj ta koʼtantik te Wentainel yuʼun te Diose. Pero swenta ya xkʼot ta koʼtantik te versículo–abi, mukʼ skʼoplal te ya kilbeytik skʼoplal bin la yichʼ alel ta nail.

 Te Jesús la yalbey te kʼopetik-abi te fariseoetik te jaʼik te jtsojb jwolwanejetik yuʼun religión te yakik ta schapel bin-utʼil ya smilik te Jesús (Mateo 12:14; Lucas 17:20). ¿Labal skʼan la yal te Jesús te ay ta yoʼtanik te Wentainel yuʼun Dios te chopol winiketik-abi? Maba jichuk, melel te Jesús jaʼnix jich la yal: «Te awoʼtanic nojel ta chebal-oʼtanil soc ta mulil» (Mateo 23:27, 28).

 Ay yantik Bibliaetik te lek la skʼasesik stukel te Lucas 17:21. Te Biblia El Nuevo Testamento original jich ya yal: «Te Wentainel yuʼun Dios ayix ta atsʼeelik», sok te La Biblia. Traducción del Nuevo Mundo edición 2019 ta español jich ya yal: «Liʼ ayix ta awolilik te Wentainel yuʼun te Diose». Jich yuʼun, ¿bin ya skʼan ya yal te ay ta yolilik o ay ta stsʼeelik te Wentainel yuʼun te chʼulchan te fariseoetike? Jaʼ ya skʼan ya yal te ay ta yolilik te Jesús te jaʼ tsabilix yuʼun Dios swenta ya x-och ta ajwalil (Lucas 1:32, 33).