Te Juan te J-akʼ-ichʼjaʼ, jaʼ j-alwanej yuʼun te Diose (Lucas 1:76). Ayin te kʼalal mato talem-a te Cristoe ta jaʼbil 2 sok laj ta jaʼbil 32 te kʼalal talemix-a te Cristoe. Te Dios la yakʼbey yaʼtel swenta ya schajpanbey te sbe te Mesías, o te Cristo. Jaʼ yuʼun la scholbey skʼop Dios te judioetik swenta ya snoptsajik ta stojol-a te Diose (Marcos 1:1-4; Lucas 1:13, 16, 17).

 Te bin la spuk ta alel te Juan la skoltay bayal ants winiketik te pekʼel yoʼtanik yuʼun ya staik ta ilel te jaʼ Mesías te albil skʼoplal te Jesús te talem ta Nazaret (Mateo 11:10). Te Juan la yal te ya skʼan ya sujtes yoʼtanik swenta ya yakʼik ta ilel-a, ya skʼan ya yichʼik jaʼ (Lucas 3:3-6). Te bitʼil bayal machʼa la yakʼbey yichʼ jaʼe, la yichʼ akʼel sbiilin te Juan te J-akʼ-ichʼjaʼ. Ay machʼa kʼax mukʼ skʼoplal la yakʼbey yichʼ jaʼ, jaʼ te Jesuse (Marcos 1:9). a

Ta artículo ini yame xbajt kiltik:

•  ¿Bin yuʼun mukʼ skʼoplal akʼot te Juan te J-akʼ-ichʼjaʼe?

•  ¿Machʼa smeʼ stat te Juan te J-akʼ-ichʼ jaʼe?

•  ¿Machʼa akʼot ta milel yuʼun te Juan te J-ak-ichʼjaʼ?

•  ¿Labal skontrain sbaik te Juan sok te Jesuse?

•  ¿Jayeb ta tul winiketik ya yal te Biblia te sbiilinejik Juan?

 Te Biblia ya yal te aʼtelil te ya xbajt spase: Te Jehová la yal te ya stikun j-alkʼop yuʼun ta swenta te bitʼil la schol skʼop Dios, te Juan la skʼotes ta pasel te albilkʼop ini (Malaquías 3:1; Mateo 3:1-3). Jaʼ la schajpan te lum yuʼun te Jehová, melel la skoltay te yantik judioetik yuʼun ya yaʼiybeyik skʼop te Jesucristo, te jaʼ tikunbil tal yuʼun te Jehová (Lucas 1:17).

 Ta swenta te bin juʼ yuʼun spasel: Te Jesús jich la yal: «Mayuc chicnajem te cʼax hich scʼoblal a te bin utʼil Juan te Jʼacʼ-ichʼ-haʼ. Pero te machʼa cʼax peqʼuel ay ta banti ay te cuentahinel yuʼun te chʼulchan ha toyol cʼohem yuʼun te Juan» (Mateo 11:11). Te Juan jaʼ kʼax mukʼ skʼoplal akʼot te bitʼil yantik j-abatetik te kuxinik ta nailal, melel maba j-alwanej-nax, jaʼnix jich jaʼ «jal-cʼop». Sok ya yakʼ jnaʼtik ta swenta te bin la yal te Jesús te maba ya xbajt ta chʼulchan te Juan te J-akʼ-ichʼjaʼ. b ¿Bin yuʼun? Melel kʼalal laj te Juane mato ba sjamoj be-a te Jesús yuʼun ay machʼa ya xjuʼ xbajt ta chʼulchan (Hebreos 10:19, 20). Pero te j-alwanej ini yame xchaʼkuxaj tal liʼ ta Balumilal ta jun nichimal kʼinal te kʼalal ya xwentainwan te Diose (Salmos 37:29; Lucas 23:43).

 Te smeʼ stat te Juane jaʼ te Zacarías sok Elisabet. Te Zacarías jaʼ jtul sacerdote judío. Te Elisabet ma xjuʼ ya swol alal, jaʼ yuʼun te bitʼil ayin te Juane, jaʼ jun milagro. Jaʼnix jich, ta «schebalic ayix yaʼbilalic» (Lucas 1:5-7, 13).

 Te ajwalil Herodes Antipas la yal ta mantal te ya yichʼ xotʼbeyel sjol te Juane. Te Herodías la stuuntes te yantsil-al yuʼun jich te Herodes ya smil te Juane. Te Herodías kʼax maba lek la yil te Juane, melel te Juan jamal la yalbey te Herodes te maba lek te nujpunel yuʼun sok te Herodías, ta skaj te maba la schʼuunik te Ley yuʼun te judioetik (Mateo 14:1-12; Marcos 6:16-19).

 Te Biblia maʼyuk banti ya yal te la skontrain sbaik te Jesús sok te Juane (Juan 3:25-30). Te Juan jamal la yal ta stojol ants winiketik te jaʼnax yichʼoj yaʼtel ta schajpanbeyel sbe te Mesías, ma jaʼuk te ya stsal sba soke. Jich la yal te Juan: «Tal cacʼ ichʼ-ha scuenta yuʼun hich ya xchicnaj ta stojol Israel a». Jich la yalxan ta stojol te Jesuse: «Ha te Snichʼan Dios» (Juan 1:26-34). Jaʼ yuʼun te Juan akʼbot sbujtsʼ yoʼtan te kʼalal la yil te lek been yaʼtel te Jesús ta scholel skʼop Dios.