¿Machʼatik-a te ya xbajtik ta chʼulchan?
Te sujtib ya yakʼ te Biblia
Te Jehová stsaoj chaʼoxtul j-abatetik yuʼun te jun yoʼtanik ta stojol swenta ya xbajtik ta chʼulchan te kʼalal ya xlajike (1 Pedro 1:3, 4). Te kʼalal tsabilikix-ae, ya skʼan te ma xpejkʼaj yip te schʼuunel yoʼtanik sok te lekuk te stalelike, melel teme maʼuke ma snujpʼukix-a te ya xbajtik ta chʼulchan (Efesios 5:5; Filipenses 3:12-14).
¿Bin ya spasik ta chʼulchan?
Te machʼatik tsabilik, ya x-ochik ta ajwalil sok sacerdote ta jmil jaʼbil sok te Jesús (Apocalipsis 5:9, 10; 20:6). Ya xwentainwanik ta chʼulchan (te Biblia ya yal te jaʼik te «yachʼil chʼulchan») te ya swentainik te ants winiketik (o te «yachʼil bahlumilal»). Te ajwaliletik-abi ya xkoltaywanik yuʼun tojnax sok leknax ya xkuxinik te ants winiketik, jich bitʼil snopoj ta nailal te Diose (Isaías 65:17; 2 Pedro 3:13).
¿Jaytul ya xbajtik ta chʼulchan?
Te Biblia ya yal te ya xchaʼkuxajik 144 mil ta tul yuʼun ya xkuxinik ta chʼulchan (Apocalipsis 7:4). Ta jun najalsitil, te jpuk-kʼop Juan la yil te «teqʼuel ta wits Sión te Jcolel Tuminchij, [jaʼ te Jesucristo te chaʼkuxajemix-ae] joquimbil yuʼun [...] 144,000 ta tuhl» (Apocalipsis 14:1-3; Juan 1:29; 1 Pedro 1:19). Te wits Sión jaʼ skʼoplal te mukʼ aʼtelil akʼbotik yuʼun Dios te Jesús sok te 144 mil te ya xwentainwanik ta chʼulchan (Salmo 2:6; Hebreos 12:22).
Te «machʼatic icʼbilic» sok «tsahbilic» te ya xwentainwanik sok te Cristo ta Wentainel yuʼun Dios jaʼnix jich ya yichʼik albeyel te jaʼik te «tut jtsohb tuminchij[...]» (Apocalipsis 17:14; Lucas 12:32). Jaʼ-abi ya yakʼ ta ilel te ta spisil te tuminchijetik yuʼun te Cristo chaʼoxtuliknax te machʼatik tsabilike (Juan 10:16).
Te bin ma stojiluk ya yichʼ chʼuunel ta swenta te machʼatik ya xbajtik ta chʼulchan
Te bin schʼuunejik chaʼoxtul: Spisil te machʼatik lek yoʼtanik ya xbajtik ta chʼulchan.
Te bin smelelil: Jich bitʼil yaloj te Diose, jteb ma spisil te ants winiketik te lek yoʼtanik ya xkuxinik jilel ta Balumilal (Salmo 37:11, 29, 34).
Te Jesús la yal: «Mayuc machʼa mohem ta chʼulchan» (Juan 3:13). Jich la yakʼ ta naʼel te ma bajtik ta chʼulchan te winiketik te kuxinik te kʼalal mato xtaluk ta Balumilal-a te Jesuse, jich bitʼil te Abrahán, Moisés, Job sok David (Hechos 2:29, 34). Te winiketik-abi jaʼ smukʼulinej yoʼtanik-a te ya xchaʼkuxajik liʼ ta Balumilal (Job 14:13-15).
Te machʼatik ya xchaʼkuxajik yuʼun ya xbajtik ta chʼulchan jaʼme te «primera buelta chaʼcuxajel» (Apocalipsis 20:6). Jich yuʼun, ay yantikxan te ya xchaʼkuxajik liʼ ta Balumilal.
Te Biblia ya yakʼ ta nopel te «mayuquix lajel» te kʼalal yakix ta aʼtel-a te Wentainel yuʼun te Diose (Apocalipsis 21:3, 4). Jaʼ ini ya xkʼot ta pasel ta Balumilal, melel maʼyuk lajel ta chʼulchan.
Te bin schʼuunejik chaʼoxtul: Ta jujuntul ya jtatik ta nopel teme ya jkʼan ya xkuxinotik ta chʼulchan o ta Balumilal.
Te bin smelelil: Te Dios jaʼ ya stsa te machʼatik ya yakʼbey «te mucʼul mahtanil ta toyol» ta yolil te j-abatetik yuʼune (Filipenses 3:14). Te majtanil ini ma joʼukotik ya jtsatik te banti ya jmulantik te ya xkuxinotike (Mateo 20:20-23).
Te bin schʼuunejik chaʼoxtul: Te machʼatik ya xkuxinik ta Balumilal ta sbajtelkʼinal jaʼ te machʼatik ma snujpʼuk te ya yichʼik te majtanil te ya xkuxinik ta chʼulchan.
Te bin smelelil: Te machʼatik ya xkuxinik ta sbajtelkʼinal liʼ ta Balumilal, jich ya yichʼik albeyel yuʼun te Diose: «Pueblo cuʼun», «te machʼatic tsahbilic cuʼun» sok «te machʼatic yichʼojic bendición yuʼun Jehová» (Isaías 65:21-23). Jaʼikme te machʼatik ya yichʼik te tʼujbil majtanil te ya skʼotesik ta pasel te skʼanojel yoʼtan te Diose: te tojil ants winiketik ya xkuxinik ta sbajtelkʼinal ta jun nichimal kʼinal (Génesis 1:28; Salmo 115:16; Isaías 45:18).
Te bin schʼuunejik chaʼoxtul: Te número 144 mil te ya yalbey skʼoplal te Apocalipsis señail kʼopnax.
Te bin smelelil: Te libro yuʼun Apocalipsis aynix yichʼoj numeroetik te señail kʼopnax, pero ma jichuk ta spisil te numeroetike. Jun ejemplo jaʼ te sbiilik «te lahchaytuhl jpuc-cʼopetic yuʼun te Jcolel Tuminchije» (Apocalipsis 21:14). Kilbeytikxan skʼoplal te bin ya yakʼ ta ilel te ma señail kʼopnax te número 144 mil.
Te Apocalipsis 7:4 ya yal te «jaytuhlic te acʼticlambot yichʼic sello» te jaʼik te machʼatik ya xkuxinik ta chʼulchan, jaʼik «144,000», pero ta patil ya yakʼ ta naʼel ta yan versículo te ay yan jtsojb ants winiketik te «cʼax tsobolic [te] mayuc machʼa ya xhuʼ ya yahtay». Te tsobol ants winiketik-abi jaʼnix jich ya sta skolelik (Apocalipsis 7:9, 10). Te señailuknax te 144 mil sok te jaʼuk yak ta yalbeyel skʼoplal jun número te ma xnaʼbaj te jayebik ta tule, ma puersaukix la yalbey skʼoplal te yan grupo te jichuke. a
Jaʼnix jich ya yichʼ alel te «mambil scolelic ta yohlil ants-winiquetic scuenta sba sit ya xcʼoht» te 144 mil (Apocalipsis 14:4). Te «sba sit» xchie, jaʼ ya yalbey skʼoplal te jtsojbnax te machʼatik la yichʼik tsael ta yolil te yantike. Jaʼ yuʼun snujpʼ te jich ya yichʼ albeyel te machʼatik tsabilik te ya xwentainwanik ta chʼulchan sok te Cristo ta stojol ants winiketik te ya xkuxinik liʼ ta Balumilal te ma xnaʼbaj jaytulike (Apocalipsis 5:10).
a Te profesor Robert Thomas jich la stsʼibay ta swenta te número 144 mil te ya yalbey skʼoplal te Apocalipsis 7:4: «Tey-a ya yalbey skʼoplal jun número, pero ta 7:9 ma xyalbey skʼoplal te jayeb yajtalule. Jich yuʼun teme ya kaltik te señail kʼopnax, ya skʼan ya yal-abi te jichnix spisil te numeroetik ta libro-abi» (Revelation 1-7: An Exegetical Commentary [Comentario exegético de Revelación 1-7], página 474).
Yaniwan amulan-euk sk'oponel ini
ESSENTIAL BIBLE TEACHINGS
¿Bin-a te Wentainel yuʼun te Diose?
Te kʼalal la schol skʼop Dios te Jesuse, jaʼ bayalxan la yalbey skʼoplal te Ajwalinel o Wentainel yuʼun te Diose. Te jnopojeletike, ayix bayal siglo te yakik ta skʼanel te yakuk xtalix te Wentainele.
NOJPTESEL YA YAKʼ TE BIBLIA
Ila bin yilel te nojptesel
Kʼana nojptesel ta Biblia te maba tojbil sok jtul testigo ya snojptesat.