Yak. Te Dios ay ta yoʼtan te j-abatetik yuʼun te ayik ta chamele. Te Biblia jich ya yal ta stojolik: «Te Jehová ya yaʼbe yip cʼalal ay ta chamel» (Salmo 41:3). Liʼ ini ya kalbeytik skʼoplal oxeb te bin ya xjuʼ ya jpastik teme ay kichʼojtik chamel te maʼyuk spoxil:

1.   Jkʼanbeytik te Dios te yakuk yakʼ kiptik yuʼun ya stsʼijk kuʼuntik. «Te lamal qʼuinal te ya yacʼ te Diose, te cʼax mucʼ te ma xhuʼ cuʼuntic snaʼel» ya skoltayotik yuʼun ma bayal ya jmel koʼtantik sok ya yakʼ kiptik ta stsʼikel te jchameltik (Filipenses 4:6, 7).

2.   Lekuk te bin ya jnopilantik spisil-ora. Te Biblia jich ya yal: «Ha lequil pox te tseʼel-oʼtanil, yan te mel-oʼtan ya xtaquij baquetic yuʼun» (Proverbios 17:22). Kʼalal ya stseʼejinotik ma jaʼuknax ya xchʼay bael te mel-oʼtan, jaʼnix jich ya skoltayotik yuʼun ma stsakotik chamel.

3.   Akʼa smukʼulin koʼtantik te bin yaloj ya spas te Diose. Te smukʼul koʼtantik ya yakʼ stseʼelil koʼtantik manchukme ayotik ta chamel (Romanos 12:12). Te sKʼop Dios ya yal te ya xkʼot yorail te maʼyuk machʼa ya yalix: «Ayon ta chamel» (Isaías 33:24). Te Dios yame slajin spisil te chamel te ma juʼem yuʼunik spoxtayel te doctoretike. Jaʼnix jich ya slajin bael ta kʼunkʼun te wokolil yakʼoj te meʼel mamalubel, jich ya yal ta Biblia: «Hich ya xcʼoht xan te sbaqʼuetal te bin utʼil alal, hich ya xcʼoht xan te bin utʼil querem to a» (Job 33:25).

 Nota: Te testigootik yuʼun Jehová ay smukʼul koʼtantik te ya skoltayotik te Diose, pero jaʼnix jich ya xbootik ta doctor te kʼalal ya stsakotik chamel (Marcos 2:17). Maba ya kaltik bin poxil ya skʼan tuuntesel, melel ta jujuntul ya jtatik ta nopel te bin poxil ya jtuuntestike.