Maʼuk. Te Biblia maba ya yal te ma lekuk te takʼine, sok maba ya yal te jaʼ ta skaj te takʼin te ay wokolile. Ay jun refrán te jich ya yal: «Jaʼ ta skaj te takʼin te bayal wokolil», te ants winiketik ya snopik te lokʼem ta Biblia te kʼopetik-abi. Pero, ¿melelbal? Maʼuk. Te bin ya yal te Biblia jaʼ ini: «Te slohpʼ spisil te bintic chopole ha te sbicʼsitayel taqʼuin» (1 Timoteo 6:10). a

•  ¿Bin ya yal te Biblia ta swenta te takʼine?

•  ¿Bin yuʼun ya xjuʼ jta jwokoltik teme ya jbikʼsitaytik te takʼine?

•  Te lekilal ya jtatik teme ya jpastik te bin ya yal te Biblia

•  Te Biblia ya yal bin-utʼil ya skʼan ya kiltik te takʼine

 Te Biblia ya yal teme ya jtuuntestik ta lek te takʼine, ya xjuʼ ya skoltayotik o ya xjuʼ ya skanantayotik (Eclesiastés 7:12). Jaʼnix jich ya yalbey lek skʼoplal te ants winiketik te ya yakʼik ta ilel slekil yoʼtanik sok te ya skoltayik te yantik ta swenta takʼin (Proverbios 11:25).

 Pero te Biblia jaʼnix jich ya yal te ma jaʼuk ya skʼan ya xbajt ta koʼtantik sleel te takʼine. Ta Hebreos 13:5 jich ya yal: «Ma me xbaht ta awoʼtanic sbicʼsitayel taqʼuin, junuc me awoʼtanic yuʼun te bin ay awuʼunic». ¿Bin ya yakʼ jnoptik te bin ya yal te texto ini? Te yanix xtuun kuʼuntik-a te takʼine, pero ma skʼan te jaʼ mukʼxan skʼoplal ya xkʼot ta jkuxlejaltik. Te bin ya skʼan ya jpastike jaʼ te tseʼeluk koʼtantik sok te bin-nix ya xtuun kuʼuntik ta smelelil-ae, jich bitʼil te jweʼeltik, te jkʼuʼ jpakʼtik sok te jnatik (1 Timoteo 6:8).

 Te machʼatik ya sbikʼsitayik takʼin maba ya staik te skuxlejalik ta sbajtel kʼinal (Efesios 5:5). Melel te bikʼtal oʼtanil pajal sok te yichʼel ta mukʼ lokʼombaetik o lotil diosetik (Colosenses 3:5). Yanxan te bin yuʼune, jaʼ ta skaj te machʼatik ya sbikʼsitayik takʼin maba ya yichʼik ta wenta te bin lek o ma lek ya yil te Diose, jaʼ ya sleik te bin ya skʼan yoʼtanike. Jaʼnix jich te Proverbios 28:20 ya yal ta jamal «te machʼa ora nax ya scʼan ya xcʼulejub ya me yichʼ castigo [«ya sle smul», TNM]». Yaniwan xjuʼ ya xjajchik ta loʼlaywanej, ta elekʼ, te ay machʼa ya spasik secuestrar o te ay machʼa ya smilik.

 Manchukme maba ya jpastik-abi, te sbikʼsitayel takʼine ya yakʼ yantik wokoliletik. Te Biblia jich jamal ya yal: «Te machʼatic ya scʼan ya xcʼuhlejubic ya xyahlic ta sujel soc ta yaquil, soc ta banti bayel bintic chopol te ya scʼan yoʼtanic soc te ya xjinawan» (1 Timoteo 6:9).

 Teme spisil-ora ya kichʼtik ta wenta te bin ya snop te Dios sok maba ya jpastik te bintik ma lek swenta ya jtatik takʼin, maba ya jta jmultik sok ya kakʼbeytik stseʼelil yoʼtan te Diose. Teme ya jpastik tulan ta yichʼel ta wenta te Diose, jich jamal ya yalbotik: «Ma jaymehl ya jpihtesat; mayuc bin ora ya quihquitayat» (Hebreos 13:5, 6). Jaʼnix jich ya yal «te machʼa jun yoʼtan ya me yichʼ bayel bendición» (Proverbios 28:20).