Maʼuk, te Balumilal maʼyuk bin-ora ya yichʼ lajinel, chikʼel o jelontesel. Te Biblia ya yal te Dios la spas te Balumilal yuʼun ya yichʼ nainel ta sbajtelkʼinal.

•   «Te machʼatic toj yoʼtanic ya me yichʼic hilel te qʼuinale, sbahtel qʼuinal ya xnahinic tey a» (Salmo 37:29).

•   «Ha la yaʼbe yichʼo-ip te bahlumilal, mayuc bin ora ya stij sba ta yawil» (Salmo 104:5).

•   «Stalel ya xhil te qʼuinale» (Eclesiastés 1:4).

•   «Te Jehová, te la spas te chʼulchan, te ha Dios stuquel, te la spas te lumqʼuinal soc la schahpan, la yaʼbe yichʼ yip. Ma tojoluc la spas, ha la spas scuenta yuʼun ay machʼatic ya xnahinic tey a» (Isaías 45:18).

 Te Dios maba ya yakʼ te ya yichʼ lajinel ta jkʼaxel yuʼun ants winiketik te Balumilal ta swenta te contaminación, te guerraetik o yantikxan. Te Biblia ya yalbotik te ya xbajt sjintiklan «te machʼatic ya sjinic te bahlumilale» (Apocalipsis 11:18). ¿Bin-utʼil ya xbajt spas?

 Te Dios ya slajinlan te ajwaliletik ta Balumilal te ma snaʼojik skanantayel te Balumilale, sok jaʼ ya yotses jun tojil Ajwalil ta chʼulchan (Daniel 2:44; Mateo 6:9, 10). Te Ajwalil ini jaʼ te Jesucristoe (Isaías 9:6, 7). Te kʼalal xtaluk ta Balumilal, te Jesús la skombey yip te bintik ya xkʼax ta Balumilale (Marcos 4:35-41). Jich bitʼil jaʼ ajwalil yuʼun te Wentainel yuʼun Dios, ya xbajt snaʼ swentainel swolol te Balumilale. Ya xbajt yachʼubtes te Balumilal yuʼun jich pajal ya xkʼot sok-a te tsʼunbil kʼinal Edén (Mateo 19:28; Lucas 23:43).

 Maʼuk. Melel yan bin-utʼil ya yichʼbeyik swentail-a te bin ya yal 2 Pedro 3:7, te jich ya yal: «Te chʼulchan soc bahlumilal te ay ta ora ini, [...] quechel [...] ya xlajic ta cʼahcʼ». Kilbeytik cheb skʼoplal te ya skoltayotik ta yichʼbeyel swentail te versículo ini:

1.   Ta Biblia bayal ta chajp bin-utʼil ya stuuntes te kʼopil chʼulchan, balumilal sok kʼajkʼ. Jich bitʼil ya yal ta Salmo 97:1: «¡Tseʼeluc me yoʼtan te lumqʼuinal!». Te kʼalal ya yal, «lumqʼuinal» jaʼ ya yalbey skʼoplal te ants winiketik.

2.   Te bin ya yal ta versículo 5 sok 6 ta 2 Pedro 3 ya yakʼ ta naʼel te bin ya skʼan ya yal «te chʼulchan», «bahlumilal» sok te «cʼahcʼ» te ya yalbey skʼoplal te versículo 7. Te bin ya yal te versículo 5 sok 6 jaʼ ya yalbey skʼoplal te Pulemal ta skʼajkʼalel te Noé. La yichʼ lajinel te balumilal, pero ma jaʼuk te lumkʼinale. Te bin la slajin te Pulemal jaʼ te ants winiketik te ma lek stalelike (Génesis 6:11). Jaʼnix jich la slajin «te chʼulchan», te jaʼ ya skʼan ya yal te ajwaliletik ta tiempo-abi. Jich yuʼun, maʼyuk bin-ora yichʼoj lajinel te Balumilal, jaʼnax la yichʼ lajinel te machʼatik ma lek stalelike. Te kʼalal la yichʼ lajinel te balumilal o te ants winiketik, te Noé sok te sfamilia kolik jilel jich la snojesik yan buelta te lumkʼinal (Génesis 8:15-18).

 Jich bitʼil lajinwan te Pulemale, te «cʼahcʼ» ya yalbey skʼoplal te 2 Pedro 3:7, jaʼ ya skʼan ya yal te ya yichʼ lajinel te ants winiketik te ma lek te bin ya spasike, ma jaʼuk te lumkʼinale. Te Dios ya yal te ya yakʼbotik «yachʼil chʼulchan soc yachʼil bahlumilal, te banti ya xnahin te bin toj ta pasele» (2 Pedro 3:13). Te «yachʼil bahlumilal», o te yachʼil ants winiketik, ya x-akʼbotik «yachʼil chʼulchan», o jun yachʼil gobierno, te jaʼ te Wentainel yuʼun te Diose. Te wentainel-abi, ya skʼatpʼuntes ta nichimal kʼinal swolol te Balumilal (Apocalipsis 21:1-4).