Ay, te Satanás yuʼun-nix ay-a, jaʼ jtul chʼul-abat te la skʼaxuntaybey skʼop te Dios sok la stoy sba ta stojol. Melel jaʼ «ajwalil yuʼun in balumilal to» (Juan 14:30, TZOXCH; Efesios 6:11, 12). Te Biblia ya stuuntes bayal biililetik yuʼun ya yalbey skʼoplal te Satanás. Kiltik cheʼoxebuk:

•   Te Satanás, ya skʼan ya yal «Jkontrainwanej» (Job 1:6).

•   Te Diablo, ya skʼan ya yal «Jleaw ta kʼop» (Apocalipsis 12:9).

•   Te Chan ta Biblia ya yalbey skʼoplal te jaʼ jloʼlaywanej (2 Corintios 11:3).

•   Jsujaw ta mulil (Mateo 4:3).

•   Jpaslot (Juan 8:44).

Ma jaʼuk señail te bin ma lek ya yichʼ pasel

 Ay machʼatik ya skuyik te Satanás jaʼ señail te bin ma lek ya yichʼ pasel o jaʼ te bin ma lek ay ta oʼtanil soknix ta stojol Dios. Ta sKʼop Dios ya jtabeytik skʼoplal te kʼalal kʼopoj Dios sok te Satanás. Pero toj stukel te Dios sok lek spisil te bin ya spas. Jich yuʼun-abi, ¿bin yuʼun ya skuyik te ay bin ma lek ya spas? (Deuteronomio 32:4; Job 2:1-6). Pero bin ya kaltik yuʼun kʼalal te Jesús pasot ta prueba yuʼun te Satanás, manchukme ma jmulawil (Mateo 4:8-10; 1 Juan 3:5). Te Biblia jamal ya yal te yuʼun-nix ay-a te Satanás sok ma jaʼuk señail yuʼun te bin ma lek ta pasel.

 Bayal ants winiketik ya skuyik te maʼyuk te Satanás. Kʼalal jich ya kaʼiytik, ¿chamnaxbal koʼtantik yuʼun? Maʼuk, melel te Biblia ya yal te ya sle bin-utʼil ya xloʼlaywan te Satanás yuʼun ya spas te bin ya skʼan yoʼtan (2 Tesalonicenses 2:9, 10). Te bitʼil ya skuyik te yuʼun-nix maʼyuk-ae, jaʼ jich sloʼlayoj te ants winiketik (2 Corintios 4:4).

Lotil: Te yan sbiil naʼbil sba te Satanás jaʼ te Lucifer.

 Smelelil: Te kʼopil hebreo te ya stuuntesik ta chaʼchajp Bibliaetik jaʼ te kʼopil «Lucifer» te ya skʼan ya yal, «haʼat te sacubel ecʼ» (Isaías 14:12). Te kʼopil ini ya yichʼ alel ta jun albilkʼop sok te bin ya yalbey skʼoplal ya yakʼ ta naʼel te jaʼ skʼoplal te ajwaliletik ta Babilonia, te la yichʼik lajinel yuʼun Dios ta skaj te la stoy sbaik (Isaías 14:4, 13-20). Kʼalal te ajwaliletik ta Babilonia la yichʼik lajinel, jich la yichʼik labanel «haʼat te sacubel ecʼ».

Lotil: Te Satanás ya x-abatin ta stojol Dios.

 Smelelil: Te Satanás jaʼ skontra sba sok te Dios, ma jaʼuk j-abat yuʼun. Jaʼnix jich te Satanás ya skontrain te j-abatetik yuʼun Dios, jaʼ yuʼun ya yakʼtiklanbey swokol sok ya yal lotiletik ta stojolik (1 Pedro 5:8; Apocalipsis 12:10).