Ta Biblia ya jtatik pruebaetik te ya yakʼ ta naʼel te ay Diose. Sok jaʼnix jich ya yakʼ jnoptik te ya skʼan ya jtuuntestik te jpʼijiltik yuʼun ya jnaʼbeytik sba te Diose, ma jaʼuk te oranax ya jchʼuuntik te bin ya yalik te religionetik (1 Juan 5:20; Romanos 12:1). Kiltik cheʼoxebuk pruebaetik te ya yakʼ te Biblia te ya yakʼ ta ilel te ay Diose.

•   Te bitʼil lek chajpanbil te chʼulchan sok te Balumilal sok te ay kuxlejalile, ya yakʼ ta ilel te ay machʼa la spase. Te Biblia jich ya yal: «Como spisil nahetic ay machʼa pasot yuʼun, pero ha Dios te la spas spisil bintic ay» (Hebreos 3:4). Ma wokoluk ya xkʼot ta koʼtantik te bin ya yal te versículo-abi, jaʼ yuʼun bayal ants winiketik te pʼijubenik ta lek ya schʼuun yoʼtanik. a

•   Jpisiltik ya jkʼan ya jtabeytik swentail te jkuxlejaltike, teme maba ya jtatik maʼyuk stseʼelil koʼtantik. Ma tikʼuk-a te yanax jletik te bin ya xtuun kuʼuntik, te Biblia ya yal te stalelnanix-a te ya jkʼan ya jletik te Diose, tey ochem skʼoplal-a te ya jnaʼbeytik sba sok te ya kichʼtik ta mukʼe (Mateo 5:3; Apocalipsis 4:11). Te bitʼil jich pasbilotik te ya jkʼantik te ya jnaʼbeytik sba te Diose, ya yakʼ ta ilel te ay jtul Dios te ay skʼuxul yoʼtan sok te la yakʼ ta koʼtantik te ya jletike yuʼun tseʼel koʼtantik-a (Mateo 4:4).

•   Bayal albilkʼopetik ta Biblia kʼot ta pasel te kʼalal bayalix jaʼbil la yichʼ tsʼibayel-ae. Te bitʼil tsʼakal kʼot ta pasele, ya yakʼ ta ilel te ma skʼopuk ants winiketik (2 Pedro 1:21).

•   Te machʼatik la stsʼibayik te Biblia ay bin snaʼojikix-a te snaʼbelikto te cientificoetik. Jich bitʼil te ants winiketik ta namey ya yalik-a te kajal-laj ta sba jkojt chambalam te Balumilale, jich bitʼil jkojt elefante, jkojt jaʼmal chitam o jkojt toro. Yan stukel te Biblia ya yal ta swenta te Dios te «mayuc banti jipil yuʼun te bahlumilale» (Job 26:7). Jaʼnix jich ta Isaías 40:22, ta kʼopil te la yichʼ tsʼibayel te Biblia ya yal te wolol te Balumilale. Bayal ants winiketik ya yalik te ma jichuknax la snaʼik te machʼatik la stsʼibayik te Bibliae, te jaʼ akʼbot snaʼik yuʼun te Diose.

•   Te Biblia ya yakʼbey sujtib bayal jojkʼoyeletik te ya spasbey sbaik te machʼatik ma schʼuunik te ay Diose, jich bitʼil ini: Teme lek yoʼtan te Dios sok spisil ya xjuʼ yuʼun, ¿bin yuʼun ay bayal chopolil sok bayal wokolil? ¿Bin yuʼun te religionetik sjachojik bayal kʼop? (Tito 1:16.) Te sujtib ya yakʼbey te Biblia te jojkʼoyeletik ini sok yantikxan jojkʼoyel, ya xkoltayotik ta snaʼel te ay Diose.