Te Cuerpo Gobernante mukʼ skʼoplal la yil stuuntesel te majtan takʼin swenta ya yichʼ pasel te proyectoetik yuʼun construcción, yuʼun jich ya yichʼ cholelxan te lek yachʼil kʼop. Ta jaʼbil yuʼun servicio 2023, te Beteletik yuʼun te testigoetik yuʼun Jehová la slajinik kʼaxem ta 500 millón ta dólar a swenta ya smanik, ya spasik, ya yachʼubtesik sok ya skanantayik te Snail Tsoblejetik sok te sNail mukʼul Tsoblejetik ta swolol balumilal. Maba ochem skʼoplal te jayeb slajinojik jujun congregación swenta ya skanantayik te sNail Tsoblej.

 Jaʼnix jich te majtan takʼin ya yichʼ tuuntesel yuʼun ya yichʼ pasel sok skanantayel te Beteletik, jaʼ-abi mukʼik skʼoplal yuʼun ya yichʼ ilel bin-utʼil ya yichʼ pasel te cholel skʼop Dios ta swolol Balumilal. Te bitʼil ma xyichʼix pasel bayal aʼteliletik ta beteletik, te majtan takʼin-abi ya yichʼ tuuntesel swenta ya yichʼ pasel sok yachʼubtesel te sNail Tsoblejetik sok sNail mukʼul tsoblejetik, manchukme jich yichʼoj pasel ayto skʼan bayal takʼin swenta ya yichʼ pasel, kanantayel sok jeltayel te yawil te Beteleltik. ¿Bin yuʼun mukʼ skʼoplal te proyectoetik ini? ¿Bin-utʼil ya xkoltaywan ta scholel skʼop Dios te bin ya yichʼ pasel ta beteletik? Kiltik.

 Ay bayal sucursaletik te ayix tal 30 o 40 jaʼbil te yichʼojikix pasel. Te Nicholas, te ya x-aʼtej ta Departamento Mundial yuʼun Diseño sok Construcción, ya yal: «Manchukme mukʼul naetik, te kʼalal ya xkʼax bael te tiempoe ya stsʼilajik sok ya yakʼ jwokoltik. Kʼalal ya yichʼ chaʼpasel te mukʼul naetik ya xchaʼtuunxan sok ya xjalajxan bayal jaʼbil».

 Jaʼnix jich mukʼ skʼoplal te ya yichʼ chajpanel te Beteletik, sok chikan bin yachʼil ya skʼan ya yichʼ pasel ta organización. Jaʼto tal te jich yichʼoj pasel, bayal moem te yajtalul te publicadoretik. Jaʼ yuʼun bayalxan voluntarioetik ya skʼan ya x-aʼtejik tey-a. Ta jaʼbil tal-abi teynax-a te smukʼul te Beteletik, pero ta ora ini ma x-ochikix-a.

 Jaʼnix jich ya skʼan ya jkanantay bajtik. Nopol ayotikix ta slajibal kʼajkʼal sok ayniwan bin ya xkʼax te ya xjuʼ ya yutsʼinotike (Lucas 21:11). Teme ya yichʼ tuuntesel te bintik yachʼil lokʼelikto ta spasel te naetik-abi, ya xjuʼ ya jkanantay bajtik ta lek. Maʼ jaʼuknax-abi, kʼalal ya xtal tulan yikʼal jaʼal te naetik ya xjuʼ ya xtuun yuʼun ya jkoltaytik te machʼatik ya sta swokolik. Jaʼnix ya xjuʼ ya kiltik bin-utʼil ya xjuʼ ya xkoltaywanotik tey-a.

 Ta jaʼbil yuʼun servicio 2023, te Cuerpo Gobernante lek la yil te yakuk yichʼ pasel aʼteliletik ta 43 beteletik, ¡Jteb ma sta olil te beteletik te ay ta swolol balumilal! Kiltik cheb ejemploetik te ya yakʼ ta ilel te mukʼik skʼoplal te ya yichʼ pasel te aʼteliletik-abi.

 Angola. Jtul hermano te Matt sbiil te ya x-aʼtej ta Comité yuʼun Sucursal ta lum-abi, jich ya yal: «Yakotik ta yilel bin-utʼil ya xkʼot ta pasel te albilkʼop ta Ageo 2:7. ¡Ta lajunebnax jaʼbil mo ta 60% te yajtalul te publicadoretik! Ya skʼan xmo yajtalul te machʼatik ya x-aʼtejik ta Betel, melel jaʼ bayalix te publicadoretik. Pero te bitʼil ma mukʼuk te oficinaetik ma xjuʼ te ya kikʼtik bayal voluntarioetik. Jaʼ yuʼun te betelitaetik bayalxan aʼtejik-a».

 Ta swenta-abi la yichʼ kʼanbeyel chaʼoxtul hermanoetik te yakuk yilik teme ya xjuʼ ta mukʼubtesel te Betel. Ta sjajchibal la skuyik te jaʼxan lek te ya yachʼubtesik te oficinaetik. Ta patil la staik ta nopel ta lek bin-utʼil ya stuuntesik ta lek te majtan takʼin. La staik ta nopel te jaʼ lekxan te ya smanik sok te ya slekubtesik jun edificio te nopolnax aye. Te Matt jich ya yal: «Kʼalal te hermanoetik la yakʼbeyik snaʼ te Comité yuʼun Sucursal te ya yichʼ manel sok te ya yichʼ lekubtesel jun edificio te nopol aye, la jmel koʼtantik yuʼun, melel la jkuytik te ma pajaluk ya xjil, melel ma joʼukotik la jpastik. La kiltik te jaʼ la skoltayotik te Jehová te jich la yichʼ tael ta nopel, te la yichʼ manel te edificio, melel jaʼnix te ya xtuun kuʼuntik»

 Jich yilel te Betel ta Angola yato yichʼ mukʼubtesel ta patil. Te bitʼil ay ta mukʼubel te aʼtelil yuʼun te organización ta Angola, bayal ya xtuun te edificio la yichʼ manel, te chʼin naetik la yichʼ pasel ta skʼinalul te Betel sok te chʼin naetik la yichʼ pasel ta renta.

 Japón. Te sbabial edificioetik ta Betel, ayniwan 40 jaʼbil te yichʼojix pasel sok maʼyuk bin ora yichʼoj lekubtesel ta lek. Pero yichʼoj kanantayel ta lek te edificioetik, manchukme jich-abi, te edificioetik yichʼoj tuuntesel ta lek. Jaʼ yuʼun ta ora ini yakotik ta slekubtesel.

 Te kuxinel ta Betel ma pajalukix te bitʼil te yantik jaʼbil tal, te kʼalal mato sta-a te jaʼbil 2015, ya yichʼ pasbeyel sweʼel te machʼatik ayik ta Betel. Jaʼ yuʼun te cuartoetik ta Betel yuʼun Japón ay chʼin cocinaetik. Pero ta ora ini te Betelitaetik ya spas sweʼelik ta scuartoik. Yuʼun maba wokol ya yilik-a la yichʼ mukʼubtesel te cocinaetik. Jtul hermana te Kumiko, sbiil te ay ta Betel yuʼun Japón, jich ya yal: «Te bitʼil mukʼ te jcocina maba wokol ya kaʼiy te bin ya jpas ta Betel. ¡Jich ya kaʼiy te ayon ta nae!».

 Te bin ya xtuun ta swenta scholel skʼop Dios ta swolol balumilal, ya yichʼ pasel ta Betel yuʼun Japón (Mateo 28:19, 20). Ta Japón ya yichʼ pasel imprimir te Biblia, melel jaʼnax ay cheb Betel ta swolol balumilal te banti ya yichʼ pasel te aʼtelil ini. Jaʼ yuʼun te kʼalal la yichʼ achʼubtesel te Betel la yichʼ akʼel jun máquina te ya stsob te tan sok te xejtʼelul te junetike. Smanel sok yakʼel ta yawil te máquina laniwan yichʼ lajinel jun millón ta dólar, manchukme jich la yichʼ lajinel takʼin, ma xyil swokolik te machʼatik ya x-aʼtejik ta imprenta, ma skom sbaik ta pasel imprimir sok ya xjuʼ stikunik te bin ya xtuun kuʼuntik ta swenta te schʼuunel koʼtantik.

 Te bin mukʼ skʼoplal ya spasike, jaʼ te manchuk ya skom sbaik ta spasel imprimir te Biblia. Te hermano Trey, te ya x-aʼtej ta Comité yuʼun Betel ta Japón, jich ya yal: «Te kʼalal yakotik ta slekubtesel-a te oficinaetik, sok te bitʼil yak ta kʼasesel ta yan kʼopil te Biblia kʼaxtoxan mo te aʼtelil ta swolol balumilal». Swenta ma skom sbaik ta spasel imprimir te publicacionetik bayal departamentoetik ta Betel sok jun empresa koltaywanik ta yakʼel te máquina. Manchukme wokol la yilik ta marzo kʼalal ta agosto 2023, ayniwan la yichʼ pasel imprimir 220.000 ta pakʼ Bibliaetik ta jujun u. Ta uetik-abi, jaʼ bayalxan la yichʼ pasel te aʼtelil ta imprenta. Juʼ ta pasel spisil te aʼtelil sok maba la yichʼxan lajinel bayal takʼin.

 Te bitʼil la yichʼ lekubtesel te Betel, mukʼ skʼoplal la yilik te ma xyichʼ lajinel bayal luz. Ta swenta-abi la yichʼ akʼel panel solar, maba ya xlaj 120.000 dólar ta jun jaʼbil. Jaʼnix jich ya yichʼ akʼel ventanaetik te pimiknax te scristalul, yuʼun maba ya xtuun bayal luz sok maba ya yichʼ lajinel 10.000 dólar ta jun jaʼbil. Jich yilel te bayal takʼin ya xlaje, pero te jayeb tiempo ya yichʼ tuuntesel te panel solar, maniwan ya yichʼ lajinel 3 millón sok olil ta dólar, jaʼnix jich ya yichʼ kanantayel te bintik ay tey-a.

 Te bin yak ta pasel ta Angola sok ta Japón, ya yakʼ ta ilel te bayalto bin ya skʼan pasel yuʼun ya yichʼ wentainel te aʼtelil ya yichʼ pasel ta territorioetik yuʼun te Beteletik. ¡Pero ay bayal aʼtel te ya skʼan pasel! Te hermano Aaron, te ya x-aʼtej ta Departamento Mundial yuʼun Diseño sok Construcción, jich ya yal: «Manchukme bayal bin la yichʼix pasel pero bayalto bin ya skʼan pasel». Jaʼ ya yal te bin aʼtelil yato skʼan pasel: «Te manchuk ya yakʼ majtan takʼin te hermanoetike, ma xjuʼ ta pasel te aʼtelil te jichuke. Jaʼnix jich ya kalbeytik wokol te hermanoetik te ya sjap snaik ta aʼtel sok te machʼatik yakik ta spasel tulan yuʼun ya sjap sbaik ta aʼtel ta pajel chaʼbej. Te bitʼil ya sjap sbaik ta aʼtel te hermanoetik sok te ya yakʼik majtan takʼin, tey ya kiltik-a te jaʼ yak ta skoltaybelotik te Jehová» (Salmo 110:3).

 Ta swenta te majtan takʼin ya yakʼ te hermanoetik ya xjuʼ ta pasel te aʼteliletik sok ta slekubtesel te Beteletik, bayal machʼatik ya yakʼik majtan takʼin ta donate.pr418.com. ¡Wokolawalik yuʼun te yutsil awoʼtanike!