«Maʼyuk jich jnopojtik-a te ya kichʼtik te información ta swenta skʼop Dios ta jcelulartik o ta yantikxan aparatoetik». Jich la yal te hermano Geoffrey Jackson ta Informe 6 yuʼun te Cuerpo Gobernante ta 2020. Jich la yal: «Yaniwan jojkʼoybey jbatik, ¿binwan la jpastik te manchuk ay te JW Library ta yorail te tulan chamele? Te Jehová ayix tal jaʼbil te yak ta schajpanbelotike».

 ¿Bin-utʼil yak ta schajpanbelotik te Jehová? ¿Bin-utʼil la yichʼ pasel te JW Library? ¿Bin ya skʼan pasel yuʼun ay bintik yachʼil ya xlokʼ sok ya xlekubxan?

 Ta Mayo 2013, te Cuerpo Gobernante la yakʼbey ta swenta te Programación yuʼun MEPS, te jaʼ jun departamento te ay ta central mundial te yakuk spas jun aplicación swenta ya yichʼ kʼoponel tey-a te Traducción del Nuevo Mundo. Te Paul Willies, te ya x-aʼtej ta departamento-abi, jich la yal: «Maʼyuk jpasojtik jun aplicación te ay banti ya xjuʼ ta pasel descargar. Yuʼun ya yichʼ pasel-a, la yichʼ kejchanel yantik proyectoetik sok jun-nax aʼtejotik sok yantik departamentoetik te ayik ta Betel. Bayal buelta la jkʼopontik Dios sok la kiltik bitʼil ya skoltayotik te Jehová, joʼeb u ta patil te aplicación-abi la yichʼ ilel ta reunión anual».

 Ay binxan wokol la kaʼiytik: jaʼ te ya yichʼ pasel ta jun biblioteca te JW library te ya yichʼ otsesel bayal publicacionetik soknix ta yantik kʼopiletik. Ta enero 2015, jteb ma spisiluk te publicacionetik te ay ta inglés ayix ta aplicación-abi, wakeb u ta patil ya xjuʼix ta spasel descargar publicacionetik ta yanyantik kʼopiletik.

 Te hermanoetik yakik ta slekubteselxan te aplicación. Ya xjuʼ ya kiltikix videoetik sok te ya jchajpan jbatik ta tsoblejetik. Jaʼnix jich ya xjuʼ ya kiltik te referenciaetik te ay ta Sleojibal temaetik kʼalal yakotik ta skʼoponel te textoetik.

 Kʼaxem ta 15 millón ya x-ochik ta aplicación JW Library ta jujun u, pero ay 8 millón te ya x-ochik ta jujun kʼajkʼal. ¿Bin ya skʼan pasel yuʼun leknax ya x-aʼtej te aplicación? Te hermano Paul Willies jich ya schol kaʼiytik: «Te aʼtelil ini, maʼyuk bin-ora ya xlaj skʼoplal. Spisil-ora ay bin yachʼil ya yichʼ otsesel sok yakotik ta yilel yuʼun ma wokoluk ta tuuntesel te aplicación. Ta swenta te ya yichʼik achʼubtesel spisil-ora te sistema operativo yuʼun te celular, te tablet sok yantikxan aparatoetik, jaʼ yuʼun ya jpastik tulan te lekuk ya x-aʼtej sok te yachʼil aparatoetik ya xlokʼe. Te bitʼil yak ta paselxan grabacionetik sok publicacionetik te ya xlokʼ ta JW Library ya skʼan lekubtesel sok achʼubtesel te software interno». Ta ora ini, ayniwan 200 mil publicacionetik ta JW Library sok kʼaxem ta 600 mil audio sok video te pasbil grabar ta yantik kʼopiletik.

 Yuʼun leknax ya x-aʼtej te aplicación, ma jaʼuknax ya xtuun te aʼtejibaletik yichʼoje. Jaʼnix jich ya yichʼ tojel permisoetik yuʼun software. Te jun-nax permiso ya yichʼ tojel kʼaxem ta 30 mil peso (1,500 dólar) ta jun jaʼbil. Te departamento yuʼun Programación yuʼun MEPS jteb ma sta 200 mil peso (10,000 dólar) ya stoj ta jun jaʼbil swenta lek ya x-aʼtej ta yanyantik marca te aplicación jich bitʼil ta computadoraetik, ta tablet, ta celular te lokʼelikto.

 Ta swenta te ayix te JW Library maba ya jlajintikix bayal takʼin ta spasel imprimir, ta spasel encuadernar sok te ya yichʼ tikunel bael te publicacionetik. Jich kʼot ta pasel te kʼalal lokʼ te folleto Nopa ta jujun kʼajkʼal te sKʼop Diose. Te edición lokʼ ta 2013 la yichʼ pasel imprimir 12 millón ta jlejch folletoetik. Pero te edición lokʼ ta 2020, jaʼnax la yichʼ pasel imprimir 5 millón manchukme kʼaxem ta 700 mil ta tul publicadoretik ta swolol Balumilal. ¿Bin kʼot pasel? Bayal hermanoetik ya skʼoponikix te texto yuʼun te jujun kʼajkʼal ta JW Library. a

 Te JW Library bayal bin-utʼil ya xtuun. Jich bitʼil te hermana Geneviève te ay ta Canadá, ya yal te bayal ya xkoltayot kʼalal ya snop te Biblia. Jich ya yal: «Te yakuk jkʼopon bayal libroetik, ma xjuʼ kuʼun te jich ya jpas ta jujun sabe. Pero te bitʼil ayix te aplicación, jaʼnax ya jtsun te jtablet sok tey ayix spisil-a te bin ya xtuun kuʼune. Te bitʼil jich ya jpas ta spisil-ora, stsakojxan yip te schʼuunel koʼtan sok nopolxan ya kaʼiy jba ta stojol te Jehová».

 Te aplicación-abi, bayal ya xtuun kuʼuntik kʼaxtoxan-a te yorail te COVID-19. Te Charlyn te ay ta Estados Unidos, jich ya yal: «Ta skaj te COVID-19, kʼaxemix ta jun jaʼbil te maʼyuk kiloj jlejchuk publicación. Pero ta JW Library ya jtatik spisil te bin ya xtuun kuʼuntik, jaʼ yuʼun ya kalbey wokol te Jehová ta swenta te tʼujbil majtanil ini».

 Bayal machʼatik jich yaʼiyoj sbaik bitʼil te Faye te ay ta Filipinas, jich ya yal: «Leknax te aplicación ini, melel bayal bin yichʼoj te ya skoltayon yuʼun nopolxan ya kaʼiy jba ta stojol te Jehová. Ya jtuuntes yuʼun ay bin ya jkʼopon ta sab, ay bin ya jchʼam kaʼiy te kʼalal yakon ta aʼtel ta jna, ya jchajpan jba ta tsoblejetik sok ya jnop te Biblia. Te kʼalal maʼyuk bin ya jpas ya kil videoetik. Kʼalal ay bin yakon ta smaliyel, ya jkʼopon te Biblia sok te publicacionetik. ¡Bayal ya xtuun kuʼuntik te aplicación!».

 Maba wokol ta tuuntesel te kʼalal ya jcholtik skʼop Dios. Jtul hermana te ay ta Camerún, bayal la smulan jun texto te la stuuntes te sjoy ta scholel skʼop Dios. Cheʼoxeb semana ta patil, kʼan stuuntes-euk, pero ma jul ta yoʼtan bin textoil. Jich ya yal: «Lek te yato xjul ta koʼtan jpʼal kʼopil yuʼun te texto. Jich yuʼun, ochon ta aplicación ta sleel te Biblia sok la jtsʼibay te jpʼal kʼopile. Ta aplicación ya jta te textoetik te ya schʼay ta koʼtane».

 Ta swenta te majtan takʼin ya awakʼik ta donate.pr418.com, ya yichʼ chajpanel ta lek, achʼubtesel spisil-ora sok ya yichʼ lekubtesel te aplicación JW Library. Jich ya xkoltayotik te hermanoetik ta swolol Balumilal. Ya kalbeyexkotik bayal wokol yuʼun te yutsil awoʼtanike.

1. Ta octubre 2013: Lokʼ ta aplicación te Traducción del Nuevo Mundo ta ingles.

2. Ta enero 2015: La yichʼxan akʼel publicacionetik ta ingles, sok ta yantikxan kʼopiletik.

3. Ta noviembre 2015: La yichʼ akʼel yuʼun ya xjuʼ ta bonel.

4. Ta mayo 2016: La yichʼ akʼel te banti ya yal «Reuniones».

5. Ta mayo 2017: La yichʼ akʼel te banti ya jtsʼibaytik notaetik.

6. Ta diciembre 2017: La yichʼ akʼel te Biblia yuʼun Estudio ta ingles.

7. Ta marzo 2019: La yichʼ akʼel jun aplicación te ya xjuʼ ta pasel descargar audio, yilel videoetik, sok te ya xjuʼ ya kiltik referenciaetik yuʼun te Sleojibal temaetik.

8. Ta enero 2021: La yichʼ akʼel te bin-utʼil ya kakʼtik nojptesel sok te folleto Mulana.