«Bayalniwan machʼatik te ya skʼoponik te jpublicaciontik ya snaʼbeyik sba te machʼatik ma xyilik kʼinale», jich la yal te revista The Watch Tower (La Torre del Vigía) te lokʼ ta 1 yuʼun junio 1912, jaʼnix jich la yal te ay publicacionetik ta stojol te machʼatik ma xyilik kʼinal. La yalxan: «Te revista-abi la yichʼ pasel yuʼun ya spikik te letraetik swenta jich ya xjuʼ ya skʼoponik-a. Te machʼatik ma xyilik kʼinal bayal skʼoplal ta yoʼtanik snaʼel te ya xkʼot skʼajkʼalel te ya x-ayin bayal bendicionetik».

 Te kʼalal jich la yichʼ alele, te testigoetik yuʼun Jehová ya spasikix publicacionetik-a te ya xjuʼ ta pikel te sletraul manchukme mato ayuk-a te bin-utʼil ta tsʼibayel ta braille ta inglés. Ta ora ini yato yichʼ pasel publicacionetik kʼaxem ta 50 ta chajp kʼopiletik ta stojol te machʼatik ma xyilik kʼinal.

 Te bin nail ya yichʼ pasele, jaʼ te ya yichʼ kʼasesel ta braille te información. Te Michael Millen te ay ta Patterson (Nueva York) te ya x-aʼtej ta skʼasesel ta braille, jich ya yal: «Ta sjajchibal ya jtuuntestik programaetik yuʼun ya jkʼasestik ta braille, pero maba ya xjuʼ ta pasel ta yanyantik kʼopiletik. Ta ora ini ya jtuuntestik te Watchtower Translation System, swenta ya jkʼasestik ta yanyantik kʼopiletik. Maʼyuk yan programa te pajal soke».

 Ma jaʼuknax ya yakʼik te información, jaʼnix jich ya scholbeyik skʼoplal te bin ya xchiknaj ta fotoetik. Jich bitʼil te dibujo te ay ta yelaw te libro Mulana jich ya scholbey skʼoplal ta braille: «Jtul winik te yak ta beel ta be te ma tojuke, te ay nichimetik, te pamalnax te kʼinale sok ay witsetik». Te Jamshed te ma xyil kʼinal te jaʼ siervo ministerial sok ochem ta precursor jich ya yal: «Te bin ya xchiknaj ta fotoetik o dibujoetik mukʼ skʼoplal ta koʼtan».

 Te kʼalal la yichʼix kʼasesel ta braille-a te información, ya yichʼ tikunel bael ta Betel yuʼun ya spasik imprimir. Ya stuuntesik junetik te ma orauk ya schʼiʼ te kʼalal ya yichʼ akʼel te letraetik ta braille sok ya xjalaj ta tuuntesel. Ta patil ya spasik jich bitʼil libro, ta sbabial ya scholanik te paginaetik ta patil ya snupʼtiklanik. Ya yichʼ tikunel bael sok te publicacionetik ta congregacionetik, jaʼnix jich ya xjuʼ ta akʼel bael ta servicio postal teme jaʼ majtanil ta stojol te machʼatik ma xyilik kʼinal. Teme oranax ya xtuun yuʼunik te publicacionetik, te Betel ya spas tulan yuʼun ya yakʼik bael ta ora.

 Kʼalal ya yichʼ pasel spisil-abi ya yichʼ tiempo sok takʼin. Te imprenta te ay ta Wallkill (Nueva York) pajal ya xjalaj kʼalal ya yichʼ pasel imprimir 50 mil Bibliaetik kʼalal ya yichʼ pasel cheb Bibliaetik ta braille. Te jpajk Biblia ta braille te ay ta inglés grado 2 yichʼoj 25 volumen, te aʼtejibaletik te ya xtuun swenta ya yichʼ pasel te Biblia-abi, kʼaxem ta 123 buelta stojol te bin-utʼil ya yichʼ pasel jpajk Biblia. a ¡Te jpajk Biblia te yichʼoj 25 volumen yaniwan xlaj 3 mil peso (150 dolar) yuʼun ya yichʼ akʼbeyel spat!

 ¿Bin yaʼiyel ya yaʼiy sbaik te machʼatik ya x-aʼtejik ta publicacionetik-abi? Te Nadia te ay ta Betel ta Sudáfrica jich ya yal: «Wokol ya yaʼiyik te machʼatik ma xyilik kʼinal sok te machʼatik ma xyilikix ta lek kʼinal, jaʼ jun majtanil te ya x-aʼtejon ta stojolik. Sok ya jnaʼ te kʼux ya x-aʼiyotik yuʼun te Jehová».

 Jaxan teme ay machʼa ma xyil kʼinal te ma snaʼ skʼoponel te braille, ¿bin ya xjuʼ ya spas? Aytonax cheʼoxeb jaʼbil te lokʼ te folleto Aprenda a leer Braille, tey tsʼibaybil te información sok kʼasesbil ta braille. Yuʼun jich pajal ya stuuntesik te machʼa ma xyil kʼinal sok te machʼa ya yil kʼinal. Te folleto-abi yichʼoj regleta positiva sok jun punzón yuʼun ya stʼunik te letraetik. Te machʼa yak ta snopel te kʼopil-abi ya xjuʼ ya stuuntes te aʼtejibal swenta ya stsʼibay ta braille. Kʼalal jich ya spase ya xjil ta yoʼtan te bitʼil ta stsʼibayel te braille sok ya snaʼ bin letraetik te kʼalal ya spike.

 Te publicacionetik te ayik ta braille ya xkoltayotik te hermanoetik te ma xyilik kʼinal sok te machʼatik ma xyilikix ta lek kʼinal. Kiltik bin kʼot ta stojol te Ernst te yak ta kuxinel ta Haití, spisil-ora ya xbajt ta tsoblejetik, pero maʼyuk información yuʼun ta braille. Jaʼ yuʼun ya yakʼ ta yoʼtan kʼalal ay bin ya skʼases ta tsoblej sok te ya yakʼ scomentario. Te Ernst jich ya yal: «Ta ora ini ma jichukix, ta biluk-ora ya kakʼix te jcomentario sok ya kaʼiy te jun-nax ayon sok te congregación jich jun-nax pajal ya kichʼtik nojptesel yuʼun te Jehová».

 Jtul anciano te Jan sbiil, te yak ta kuxinel ta Austria te ma xyil kʼinal jaʼ ya skʼases te snopel Te J-ilkʼinal ta toyol sok te snopel Skʼop Dios ta congregación. Jich ya yal: «Te jpublicaciontik ta braille jaʼ chikanikxan ta aʼiyel, melel ay snumeroil te jujun página sok ma wokoluk ta tael te notaetik sok ya scholbey ta lek skʼoplal te bin ya xchiknaj ta fotoetik o dibujoetik».

 Jtul precursora te Seon-ok sbiil, te ay ta Corea del Sur te jaʼ kojkʼ chikin sok ma xyil kʼinal. Ta nail tal ay machʼa ya stsakbey skʼab yuʼun ya x-akʼbot snaʼ te bin ya xkʼax ta tsoblejetik, ta ora ini stukelxanix ya skʼopon te publicacionetik ta braille. Jich ya yal: «Wokol ya kaʼiy skʼoponel yantik publicacionetik ta braille, melel maʼyuk spuntoil, ma tojuk tsʼibaybil o kʼax jay te sjunile. Pero te publicacionetik ya spas te testigoetik yuʼun Jehová ma wokoluk ta kʼoponel stukel, melel lekxan te junetik ya stuuntesik sok jaʼ chikanxan ta pikel te puntoetik. Ta nail tal ay machʼa ya skoltayon yuʼun ya jkʼopon te publicacionetik, pero ta ora ini jtukelxanix ya jkʼopon. Ya jmulan xchajpanel jba ta tsoblejetik sok te ya kakʼ jcomentario. Ya jkʼopon spisil te publicacionetik te ay ta braille ¡bayal ya skoltayon!».

 Te publicacionetik te ay ta braille sok te yantikxan yichʼoj tal te parte ini: «Te jun ini maba ya yichʼ chonel. Ya yichʼ pukel ta swolol Balumilal yuʼun ya skoltayotik ta snopel te Bibliae». Ta swenta te yanyantik bin-utʼil ya awakʼik te majtan takʼin ta donate.pr418.com, jich ya xkʼot ta stojol te ants winiketik te bin ya yakʼ ta nopel te Jehová soknix ta stojol te machʼatik ma xyilik kʼinal. Ya kaltik wokol yuʼun te slekil awoʼtanike.