Ta jaʼbil 2020 kʼax bayal wokoliletik sok jajch te COVID-19. ¿Bin la spasik te testigoetik yuʼun Jehová yuʼun ya skoltayik te machʼatik ay swokolike?

 Ta jaʼbil yuʼun servicio 2020, a te Comité yuʼun Coordinadoretik la yalik te la yichʼ tuuntesel 28 millón yuʼun dólar b yuʼun ya skoltayik-a te machʼatik ay swokolik. Te takʼin ini la yichʼ tuuntesel te kʼalal kʼax 200 ta chajp wokoliletik jich bitʼil te COVID-19, te tulan ikʼ ta bayuk, te snojel jaʼ ta África, te maʼyuk weʼelil ta Venezuela sok te takin kʼinal ta Zimbabue. Te majtan takʼin, la yichʼ tuuntesel yuʼun ya yichʼ manel weʼelil, jaʼ, te banti ya xnainik, kʼuʼul pakʼal sok ya yichʼik ilel ta doctor. Jaʼnix jich la yichʼ manel te bintik ya xtuun ta swenta limpieza sok ya yichʼ lekubtesel naetik. Kiltik cheʼoxeb ejemplo te bin-utʼil la yichʼ akʼel te koltayel.

 Te COVID-19. Ta swolol Balumilal yakʼojbey swokol te hermanoetik ta sbakʼetalik, te bin yaʼiyel ya yaʼiy sbaik sok te maʼyuk stakʼinik. Jaʼ yuʼun ay kʼaxem ta 800 Comité yuʼun ya xkoltaywanik. Te Comité yuʼun Socorro ya yilik te bin ya xtuun yuʼun te hermanoetik sok ya yakʼbeyik snaʼ te Comité yuʼun Coordinadoretik yuʼun ya yakʼik te koltayel.

 Te jaʼbil kʼaxe te Comité yuʼun Socorro koltaywanik ta yakʼel weʼelil, jaʼ, te bintik ya xtuun ta swenta limpieza sok poxiletik. Sok ay lugaretik te jun-nax aʼtejik sok te ancianoetik yuʼun ya staik koltayel te hermanoetik yuʼun te Gobierno.

 Te koltayel yichʼoj akʼel, jaʼnix jich staojik ta ilel te ants winiketik. Jich bitʼil te Field Simwinga te jaʼ ya swol te policía ta Nakonde (Zambia), jich la yal ta stojol te hermanoetik: «Jich ya kaʼiytik te ay jbetik ta atojolik, melel la akoltayik te machʼatik ay swokolik».

 Maʼyuk weʼelil ta Angola. Ta swenta te COVID-19 maʼyuk bayal weʼelil ta Angola, jaʼ yuʼun toy stojol. Te kermanotaktik wokol la yilik te ya sman te sweʼelik.

 Jaʼ yuʼun la yichʼ kʼanbeyel te Betel ta Brasil te yakuk skoltay te hermanoetik ta Angola yuʼun ya stikunbeyik te bin ya xtuun yuʼunik. Yuʼun ya yichʼ tuuntesel ta lek-a te takʼine, te hermanoetik la sleik bin-utʼil ya smanik sok ya stikunik bael te weʼelil sok jaʼ lek la yilik te bayal ya smanik. Te bitʼil jich la spasike, jaʼnaxniwan la slajinik 440 peso (22 dólar) ta smanel sok ta stikunel jujun paquete, te yichʼoj arróz, chenekʼ sok aceite ta spisil 20 kilo yalal. Jaʼto tal-abi yichʼoj tikunel 33,544 paquete, te jaʼ 654 tonelada (721 toneladas americanas). Ta spisil-abi sok te bintik ay ta slumalik, la yichʼ koltayel kʼaxem ta 50 mil ta jtul hermanoetik.

 ¿Bin yaʼiyel ya yaʼiy sba te kermanotaktik? Te Alexandre te kuxinem ta Angola, jich ya yal: «Jamal ya kil te kʼuxon ta yoʼtan te Jehová, te maba jtukel ayon sok te mukʼ jkʼoplal ta organización yuʼun». Te Mariza te stukel ay sok te yalatak, jich ya yal: «Te Jehová la yaʼiybon te j-oracion. Ya kalbey bayal wokol ta stojol sok te organización yuʼune».

 Takin kʼinal ta Zimbabue. Ta jaʼbil 2020 ma la yakʼ jaʼal ta Zimbabue, jaʼ yuʼun bayal millón ta tul ants winiketik kʼan lajukik ta wiʼnal. Bayal ta jmil hermanoetik maʼyuk lek sweʼelik.

 La yichʼ chapel joʼchajp Comité yuʼun Socorro yuʼun ya stikunik bael te bin ya xtuun yuʼunik te hermanoetik. Bayal ta tul hermanoetik koltaywanik ta yakʼel ta paquete te bin ya stikunik bael, ay la skuchik sok ay la yakʼik ta majanel te scarroik. c Ta jaʼbil yuʼun servicio ta 2020, la yichʼ lajinel 691,561 dólar yuʼun ya yichʼ manel-a te bin ya xtuun yuʼunik te kʼaxem ta 22,700 ta tul hermanoetik.

 Ay hermanoetik te maʼyukix te bin ay yuʼunik-a te kʼalal kʼot te koltayel. Te hermanoetik la yalbeyik bayal wokol te Jehová sok ay machʼatik jajchik ta skʼayojtayel te Jehová.

 Ta jun lugar la stsob sbaik te yajwal te comunidad, tey bajtik-euk-a te chaʼtul hermanaetik te meʼba antsetik ta yaʼiyel stojol te koltayel ya yakʼ jun organización te maba wentainbil yuʼun te gobierno (ONG). Pero ta tsoblej-abi jajch yalbeyik skʼoplal te política, te hermanaetik ma la yichʼik te koltayel, melel ma la schʼuunik spasel te bin kʼanbotik. Kʼalal lokʼik bael ta tsoblej, la yichʼik labanel sok jich albotik: «Ta patil mame ayuk bin ya xtal akʼanik». Pero cheb semana ta patil, kʼot te hermanoetik ta yakʼbeyel te bin ya xtuun yuʼunik te hermanaetik te kʼalal mato xkʼot te koltayel yuʼunik-a te ants winiketik.

 Te koltayel la yichʼ akʼel ta Zimbabue, jaʼnix jich ay bin lek la yichʼ alel. Kiltik te bin kʼax ta stojol te Prisca te kuxinem ta chʼin lum. Manchukme ay swokol yuʼun te maʼyuk jaʼal, te Prisca ya xlokʼ ta scholel skʼop Dios ta jujun miércoles sok ta viernes, manchukme jaʼ yorail te ya x-aʼtejik ta skʼinal. Te ants winiketik ta slumal ya slabanik sok jich ya yalbeyik: «Ya amil ta wiʼnal te afamilia, jaʼnax baem ta awoʼtan scholel skʼop Dios». Pero te Prisca, jich ya sut: «Te Jehová maʼyuk bin-ora ya yijkitay te j-abatetik yuʼun». Cheʼoxeb kʼajkʼal ta patil te organización kuʼuntik la stikunbeyik te bin ya xtuun yuʼun te hermana. Te spatxujk chamnax yoʼtanik yuʼun sok jich la yalbeyik: «Te Diose maʼyuk bin-ora yijkitayojat, yame jkʼan jnaʼbeytikxan sba-euk». Ta ora ini juktul ya schʼam yaʼiyik te tsoblejetik yuʼun te congregación te ya xkʼax ta radio.

 Te bitʼil nopolix te slajibal kʼajkʼal, yame jsitintaytik tulan wokolil (Mateo 24:3, 7). Ya kalbeykotik bayal wokol yuʼun te yutsil awoʼtanik sok te bayal ta chajp te bin-utʼil ya awakʼik te majtan takʼin jich bitʼil ta donate.pr418.com. Jichme ya yichʼ koltayel-a te hermanoetik te ayik ta wokol.