Ta jujun jaʼbil, bayal hermanoetik ya yichʼik pʼijubtesel ta Escuela yuʼun Galaad te ya yichʼ pasel ta Patterson (Nueva York). a Te escuela-abi ya skoltay te hermanoetik ta spasel ta lek te yaʼtelik ta organización. Ta swenta te pʼijubtesel ya yichʼike ya xkoltaywanik ta yakʼbeyel yip te congregacionetik sok te beteletik te ay ta swolol Balumilal.

 Te machʼatik ya xkʼotik ta Escuela yuʼun Galaad yanyantik nación banti talemik. Jich bitʼil ta 2019, ta clase 147, te 56 ta tul hermanoetik te kʼotike talemik ta 29 ta chajp nacionetik. Te hermanoetik te ya xbajtik ta escuela-abi jaʼik te machʼatik ya x-abatinik bitʼil betelita, misionero, precursor especial o superintendente yuʼun circuito.

 Bayal tiempo nail ya yichʼ chajpanel te escuela ini. Jich bitʼil, te Departamento yuʼun Viaje yuʼun te Central Mundial ya sman te boleto yuʼun avión yuʼun te machʼatik ya xbajtik ta escuelae. Ta jujuntul te machʼatik kʼotik ta clase 147 ta Patterson lajniwan 21 mil peso (1,075 dólar) ta spasajeik. Te machʼatik jajchik tal ta islas Salomón la stsakik chaneb avión swenta ya xkʼotik ta Patterson sok oxebxan te kʼalal sujt ta snaike. Beenik ta avión 35,400 kilómetro. Te stojole lokʼ ta 46 mil peso (2,300 dólar) ta jujuntul. Swenta ma bayal takʼin ya yichʼ lajinel, te Departamento yuʼun Viaje ya stuuntes jun programa te ya sle te boleto yuʼun avión te pekʼelxan stojole. Te kʼalal kʼubanbilix-a te boletoe, te programae yato smaliyxan teme yato xpejkʼajxan stojole. Te Departamento yuʼun Viaje jaʼnix jich ya stuuntes te puntoetik yuʼun avión te ya yakʼik tal ta majtanil.

 Bayal hermanoetik ya xtuun yuʼunik visa swenta ya x-ochik ta Estados Unidos. Te Departamento yuʼun Schajpanel Kʼopetik ta swenta Legal, jaʼ ya slokʼesik te visa ya xtuun yuʼunike. Schajpanel te junetik-abi yaniwan xlokʼ ta 10 mil peso (510 dólar) ta jujuntul.

 ¿Bin-utʼil ya skoltayotik te pʼijubtesel ya yichʼik te hermanoetik-abi? Jtul hermano sok yinam te kʼotik ta Escuela yuʼun Galaad yakik ta abatinel ta jun congregación ta Sureste Asiático. Te anciano te tey ay-ae te Hendra Gunawan sbiile, jich la yal: «Maʼyuk precursoretik ta congregación-a. Pero te kʼalal julik te hermanoetik ini, la stijbey yoʼtan te yantik swenta ya x-ochik ta precursor. Ta patilxan bael jtul hermana te ay ta jcongregaciontik-ae bajt ta Escuela yuʼun Evangelizador».

 Ta Betel te ay ta Sureste Asiático te Sergio Panjaitan ya sjokin ta aʼtel chaʼoxtul hermanoetik te kʼoemik ta Galaad, jich la yal: «Te pʼijubtesel la yichʼik te hermanoetik ini ma jaʼuknax la staik bendición yuʼun, jaʼnix jich la jtatik bendición te joʼotike. ¡Kʼax bayal bin la snopik! Pero ma jaʼuk ya stoy sbaik yuʼun, ya snojptesik-euk te yantike. Ya yakʼ smukʼul koʼtantik te bin ya spasike, jich te joʼotike, ya kakʼbeytik smukʼul yoʼtanik-euk te yantike».

 ¿Banti ya yichʼ tael te takʼin te ya yichʼ tuuntesel ta swenta te escuelae? Jaʼ te majtan takʼin te ya yichʼ akʼel ta swenta te obra mundial. Bayal ta chajp bin-utʼil ya yichʼ akʼel jich bitʼil ay ta donate.pr418.com. Wokolawalik yuʼun te majtan takʼin yak awakʼik sok slekil awoʼtanik, melel jich ya xjuʼ ya yichʼik pʼijubtesel te hermanoetik te talemik ta swolol Balumilal.