Te testigoetik yuʼun Jehová maʼyuk bin ora kichʼojtik bayal weʼelil yuʼun skʼop Dios te yichʼoj tuuntesel te tecnología. Pero, ta bayal lugaretik, te hermanoetik ma xjuʼ stojbelik te Internet. Ay yantik hermanoetik te nainemik ta jun lugar banti jujuntsʼin ya xbajt te Internet, maʼyuk yip o jkʼaxel maʼyuk.

 Pero ta ora ini, bayal hermanoetik ya xjuʼ spasikix descargar te publicacionetik manchukme ma spas sbaik conectar ta Internet. ¿Bin-utʼil ya spasik?

 Jaʼ ta swenta te JW Box jun chʼin caja te ya xtikunel bael ta stojol te congregacionetik te banti maʼyuk lek yip te Internet. Jaʼ jun modem te la yichʼ manel ta jun empresa, banti te hermanoetik te ya x-aʼtejik ta Computación ta Betel, la yotsesik jun programa te tey yichʼoj otsesel te videoetik sok te publicacionetik te ayik ta jw.org. Te stojol jujun caja jaʼniwan 1500 peso o kʼaxem-a (75 dólar).

 Ta sNail Tsoblej, te hermanoetik ya spasik conectar te celularik o te stabletaik ta JW Box ta swenta wifi, jich ya xjuʼ spasik descargar te publicacionetik sok te videoetik. Hasta te celularetik te namey lokʼikix tal o te pekʼel stojolik ya xjuʼ yichʼ spasel conectar tey-a. Pero, teme ta jun congregación maʼyuk Internet tey-a ¿Bin-utʼil ya yachʼubtesik te bin ay ta JW Box? Te sucursal baeltik ya stikun memoriaetik yuʼun USB ta congregacionetik, te ayniwan 80 peso (4 dólar) stojol jujun pʼij, sok te yichʼoj te yachʼil publicacionetik te ay ta jw.org. Te memoriaetik ini ya yichʼ pasel conectar ta JW Box yuʼun ya xjuʼ skojtesik te yachʼil información te hermanoetike.

 ¿Bin-utʼil staojik koltayel te hermanoetik ta swenta te JW Box? Te Nathan Adruandra, te ay ta kuxinel ta República Democrática del Congo, jich ya yal: «Bayal buelta la jkʼan jkʼotes te video ‹Jehová, jaʼat smukʼulinejat koʼtan› sok te Julukme ta awoʼtanik te yinam Lot, pero maʼyuk bin-ora juʼ kuʼun spasel descargar. Bayal la jmel koʼtan yuʼun. Ta ora ini ya xjuʼix kuʼun spasel descargar ta jtelefono te videoetik, jich ya skoltayotik ta snojptesel ta lekxan te kal jnichʼnabtik».

 Jtul hermano te ya xkoltaywan ta spasel instalar te JW Box ta congregacionetik yuʼun Nigeria jich ya yal: «Te hermanoetik jich ya yilik bin-utʼil jun mukʼul majtanil yuʼun Jehová te JW Box. Ta ora ini kʼax tseʼelix yoʼtanik te bitʼil ya xjuʼix ya spasik descargar ta oranax te publicacionetik sok te videoetik te ayik ta aʼtejibaletik yuʼun nojpteswanej».

 Kʼaxem ta 1,700 JW Box te yichʼojix tikunel bael ta congregacionetik ta África, Oceanía sok Sudamérica, sok yichʼoj nopel te ya yichʼ tikunel bael ta yantik congregacionetik te chʼin aparatoetik ini. ¿Banti ya xtal te takʼin te ya yichʼ tuunel ta swenta ini? Jaʼ te majtan takʼin te ya yichʼ akʼel ta obra mundial. Sok te donacionetik ini ya yichʼ akʼel ta donate.pr418.com. Wokolawalik yuʼun te yutsil awoʼtanike.