Ta enero yuʼun 2021, te Cuerpo Gobernante la yakʼ ta naʼel te ya xbajt ayinuk jun yachʼil libro te ya xbajt tuunuk ta swenta snojptesel te ants winiketik, jaʼ te libro Mulana. a ¿Bin yaʼiyel la awaʼiy aba te kʼalal la awaʼiy te anuncio ini? Te Matthew te talem ta Canadá, jich ya yal: «¡Ma jchʼuun ya yaʼiyel-a! Te kʼalal la kaʼiy te discursoetik, te laj kil te videoetik te bin yuʼun la yichʼ pasel te libro ini, sok te kʼalal la yilik sok la stuuntesik te hermanoetik, la yakʼbon stseʼelil koʼtan ya jkʼan ya kilix-a sok te yakuk jtuuntesix-ae».

 Te libro ini yanyantik-a te bintik yichʼoj yuʼun ya kaʼiytik nojpteswanej, pero ma jaʼuknax te ma pajaluk sok te yantik libroetik. Teme ayix awuʼun te libroe, lajniwan ataix ta ilel te bin jeloneme. ¿Yabal akʼan ya anaʼ bin-a? Jaʼ ta swenta te bin-utʼil la yichʼ pasel te libroe.

 Te spimil te june. Yuʼun ya yichʼ pasel-a te libro Mulana ya skʼan te pimxan-a te june. ¿Bin yuʼun? Melel kʼaxem ta 600 lokʼombaetik yichʼoj te tʼujbilnax scoloril, kʼaxtoxan-a te bin-utʼil yichʼoj te libro ¿Bin ya yakʼ ta nopel ta smelelil te Bibliae? Te bitʼil ay banti jochol te maʼyuk sletraul sok slokʼombail ay bin ma xjuʼ ta pasel yuʼun, melel kʼalal jaynax te june ya xjuʼ te ya jtatik ta ilel te lokʼomba ta yan página. Jaʼ yuʼun te hermanoetik te ya x-aʼtejik ta Departamento Internacional yuʼun Impresión ta Wallkill, New York la spasik prueba sok chanchajp junetik te ya yichʼ tuuntesel ta imprenta. Te Comité yuʼun Redacción yuʼun te Cuerpo Gobernante, jaʼ la stsaik te banti pim-xan te june, manchukme kʼaxemxan 16 porciento stojol te bitʼil kʼayemotik ta stuuntesele. Jich te machʼatik ya snopik te libro Mulana maba ya schʼaytesbotik yoʼtanik yuʼun te lokʼomba te jil ta yan página.

 Te bin yilel te spat. Ma jichuk te bin-utʼil te yantik libroetik, melel yan bin-utʼil yichʼoj pasel te spate. Te yantik libroetik xlipetnax te spate, pero te libro ini ma jichuk, yuʼun jich lekxan ya xchiknaj te slokʼombaile. Sok jich ma stsʼilaj ta ora te spat te kʼalal ya yichʼ tuuntesele. Kʼaxemxan stojol te bin-utʼil jun libro te xlipet te spate. Jaʼ yuʼun te sucursaletik la sleik te banti pekʼelxan stojole.

 Te bitʼil kʼax toyol stojol, ¿bin yuʼunix-a te jaʼ la yichʼ tuuntesele? Jtul hermano te machʼa ya x-aʼtej ta Departamento Internacional yuʼun Impresión, jich ya yal: «Te bitʼil bayal buelta ya yichʼ tuuntesel te libro ini, ya jkʼantik te yakuk xjalaje». Te Eduardo te ya x-aʼtej ta imprenta yuʼun te sucursal ta Brasil, jich ya yal: «Kʼax tseʼel koʼtantik yuʼun te bitʼil te organización ya stuuntes jun libro te kʼax tʼujbil sok te ya xjalaje, yuʼun jich ya jmulantik stuuntesel sok jich ya yichʼ tuuntesel ta lek te majtan takʼin».

 Jajchotik ta spasel imprimir te libro Mulana ta marzo yuʼun 2021 te kʼalal ay te chamel COVID-19, jaʼ yuʼun la jsitintaytik bayal wokoliletik. Te bitʼil ochik ta cuarentena te betelitaetik, ma xjuʼ ya xbajtikix te voluntarioetik sok ma xjuʼ ya yichʼik ikʼel yachʼil betelitaetik. Jich maʼyukix bayal j-aʼteletik sok ay imprentaetik te la yichʼ makel ta skaj te jich la yal te ajwalil.

 ¿Bin-utʼil la yichʼ sitintayel te wokolil ini? Kʼalal ya xjuʼix ta pasel imprimir, la yichʼik kʼanbeyel chaʼoxtul betelitaetik yuʼun ya xkoltaywanik ta spasel te aʼtelil-abi. Te Joel te ya x-aʼtej ta Departamento Internacional yuʼun Impresión, jich ya yal: «Te bitʼil lek stalelik sok te ya skʼanik aʼtel, juʼ kuʼuntik spasel spisil te aʼtelile».

 Manchukme kʼax bayal wokolil, bayal millón la yichʼix pasel imprimir te libro Mulana. Bayal bintik la yichʼ tuuntesel, jich bitʼil te plancha yuʼun impresión, laminado, jun, tinta sok pegamento. Ta joʼebnax u te la yichʼ pasel imprimir, laniwan yichʼ lajinel 46 millón (2.3 millón yuʼun dólar). Yuʼun ma bayal ya yichʼ lajinel takʼin, jaʼnax ya yichʼ pasel imprimir te bantinax ya xtuun yuʼun te congregacionetike.

 ¿Bin-utʼil ya yaʼiy sba te machʼa ya xnojpteswan sok te estudiante kʼalal ya stuuntesik te libro ini? Jtul hermano ta Australia te Paul sbiil, jich ya yal: «¡Kʼax bayal ya jmulan yakʼel nojptesel sok te libro ini! Tʼujbilnax ta ilel, ta nopel sok leknax te bintik yichʼoj, melel ay videoetik, jojkʼoyeletik, lokʼombaetik, recuadroetik sok te bin ya skʼan ya spas te estudiante. Kʼax tʼujbilnax, ya jkʼan te lekil jnojpteswanej ya xkʼoon».

 Jtul estudiante te talem ta Estados Unidos, jich ya yal: «Kʼax ya jmulan te yachʼil libro, melel te lokʼombaetik oranax ya xkʼot ta koʼtan sok te videoetik ya yakʼ te ya jpas ta jkuxlejal te bin ya jnope». Te estudiante ini ya xkʼot ta spisil te tsoblejetik sok cheb buelta ta semana ya yichʼ estudio.

 Yato skʼan ya yichʼ pasel imprimir te libro ini ta yanyantik kʼopiletik. Jich yuʼun te Cuerpo Gobernante, la yal te ya xjuʼ ya yichʼ pukel ta 710 ta chajp kʼopiletik, Kʼaxemxan ta 340 te bitʼil te libro ¿Bin ya yakʼ ta nopel ta smelelil te Bibliae?

 ¿Banti ya yichʼ tael te takʼin yuʼun ya yichʼ pasel? Jaʼ te majtan takʼin te ya yichʼ akʼel yuʼun te obra mundial, spisil te majtan takʼinetik ya yichʼ akʼel ta donate.pr418.com. Bayal wokolawalik yuʼun, jich ya xjuʼ ya yichʼ pasel aʼtejibaletik yuʼun ya yichʼ akʼel nojptesel ta Biblia. Jich te ants winiketik te machʼatik ya skʼan ya snaʼbeyik sba te Jehová, ya xjuʼ ya sta skuxlejalik ta sbajtelkʼinal (Salmo 22:26).