Te música jaʼ jun tʼujbil majtanil te yakʼojbotik te Jehová. Ya xjuʼ ya sjeltay te jpensartik, te bin yaʼiyel ya kaʼiy jbatik sok ya stij koʼtantik. Jaʼ jich ya kaʼiy jbatik te kʼalal ya kaʼiytik te kʼayojiletik, jich bitʼil te ay ta JW Broadcasting^®. Te kʼayojiletik-abi ya yakʼ xnoptsajotik ta stojol te Jehová.

 Jaʼto tal ta 2014 kʼaxem ta 70 kʼayojiletik yichʼoj pasel sok ay jun te kʼaxem ta 500 ta chajp kʼopiletik yichʼoj kʼasesel. Yaniwan ajojkʼoybey aba: «¿Bin-utʼil ya yichʼ pasel te kʼayojiletik-abi? Sok ¿machʼatik ya spasik?».

 Te Comité yuʼun Enseñanza yuʼun te Cuerpo Gobernante, jaʼ ya swentain te hermanoetik te ya x-aʼtejik ta Audio sok Video te ay ta swentaik schajpanel te kʼayojiletik, jich bitʼil te ay ta JW Broadcasting sok yantikxan. Ay 13 ta tul hermanoetik sok hermanaetik te jaʼ ay ta swentaik yilel te aʼtelil, jich bitʼil schajpanel te sletraul, te smusicaul sok yantikxan aʼtelil te yichʼoje. Jaʼnix jich te Comité yuʼun Enseñanza lek yiloj te ya xkoltaywanik voluntarioetik ta swolol Balumilal swenta ya spasik te aʼtelil-abi. Ay machʼatik ya snaʼik chajpanel te sletraul, te smusicaul sok ya snaʼik kʼayoj. Sok spekʼelil yoʼtanik ya stuuntesik ta lek te bin ya snaʼik spasel sok ma jaʼuk ya skʼanik te ya x-ichʼotik ta mukʼe.

 ¿Bin-utʼil ya yichʼ pasel te kʼayojiletike? Sbabial, te Comité yuʼun Enseñanza jaʼ ya sta ta nopel bin versiculoetik yuʼun Biblia ya xlokʼ te kʼayojiletik sok bin yaʼiyel ya skʼan ya yaʼiy sbaik te kʼalal ya schʼam yaʼiyike. Ta patil te Equipo yuʼun Música jaʼ ya sta ta nopel machʼa ya schajpan te música sok te sletraule. Ya yichʼ pasel jun grabación yuʼun ya yil sok ya yaʼiy te Comité yuʼun Enseñanza yuʼun jich ya yal te bantixan ya skʼan lekubtesele. Ta patil te Equipo yuʼun Música ya slekubtesik sok ya schaʼpasik grabar te bitʼil ya jilixe. Te kʼayojiletik ya yichʼ pasel grabar ta yanyantik lugaretik, jich bitʼil ta Betel o ta sna te hermanoetik.

 Yuʼun ya yichʼ pasel te sletraul sok ya yichʼ pasel grabar te kʼayojiletik ya stuuntesik programaetik ta computadora. Jaʼnix jich ya yichʼ tuuntesel aʼtejibaletik yuʼun música, jich bitʼil te mezcladora yuʼun sonido, amplificador, bocinaetik sok microfonoetik. Jujun micrófono yaniwan yichʼ tojel 2 mil o kʼaxemniwan ta 20 mil peso (100 o mil dólar). Ta 2020 la yichʼ lajinel kʼaxemniwan ta 2,320,000 peso (116 mil dólar) ta swenta te equipo yuʼun grabación.

 ¿Bin ya yichʼ pasel swenta ma xlaj bayal takʼin? Ma bayal hermanoetik ya x-aʼtejik ta Betel ta Equipo yuʼun Música, jaʼ ya xkoltaywanik te voluntarioetik. Jaʼnix jich ya yichʼ pasel te música ta computadora ma jaʼuk te ya stsob sbaik ta stijele.

 ¡Te hermanoetik bayal ya smulanik te kʼayojiletik! Jich bitʼil te Tara te ay ta Alemania, jich ya yal: «Kʼalal ya jmel koʼtan ya slamantesbon koʼtan te kʼayojiletike. Kʼalal ya kaʼiy ta jkʼopnix, jich ya kaʼiy te ya smeyon o ya speton te Jehová». Te Dimitri te yak ta kuxinel ta Kazajistán, jich ya yal: «Ya jmulan yaʼiyel te kʼayojiletik, melel leknax te bin ya yale sok lokʼem tal ta Biblia. Jaʼ ya skoltayon yuʼun ya xbajt ta koʼtan te bintik ya skʼan te Diose».

 Te Delia te yak ta kuxinel ta Sudáfrica ya yal te bin yaʼiyel ya yaʼiy sba te kʼalal ya schʼam yaʼiy te kʼayojiletike: «Jaʼ bayal ya skoltayon. Te kʼalal ya jmel koʼtan o ay ta kʼaxel jwokol, spisil-ora aynanix jun kʼayojil-a te bayal ya skoltayon. Ay baeltik te jaʼnax te kʼalal ya kaʼiy te smusicaul, lekix ya kaʼiy jba-a».

 Ay machʼatik bayal ya smulanik cheʼoxeb kʼayojiletik. Te Lerato te yak ta kuxinel-euk ta Sudáfrica, jich ya yal: «Kʼalal ya kaʼiy stojol te kʼayojil Nopolix ya xkʼot ta pasel sok Te bin ya jmaliytik, jich ya kaʼiy te yakon ta yilel te jmama kʼalal ya xchaʼkuxaj tale. Ta jujun buelta te ya jchʼam kaʼiy te smusicaul, jich ya xtal ta koʼtan te ya smeyon o ya speton te jmamae».

 Ay jun kʼayojil te bayal koltayot jtul achʼix te yak ta kuxinel ta Sri Lanka, jich ya yal: «Te jmaestra te ya xnojpteswan ta Ciencia bayal bintik ma lek la yalbon ta sit te yantik ta skaj te testigoon yuʼun Jehová. Bayal xiwon sok ma la jnaʼ bin la kalbey. Te kʼalal kʼoon ta jna, te jmama la yalbon te akʼa jchʼam kaʼiy te kʼayojil Fuerte tú serás. Te kʼayojil-abi la skoltayon ta yilel te mukʼ skʼoplal te ya jchajpan jba yuʼun ya kakʼbey sujtib te jojkʼoyeletik. Ta yan kʼajkʼal kʼopojon sok te jmaestra. La schʼam yaʼiy te bin la jcholbey sok kʼot ta yoʼtan te bintik jchʼuunoje. Ya kalbey bayal wokol te organización yuʼun Jehová ta swenta te kʼayojiletik te ya yakʼ yip oʼtanile».

 ¿Banti ya yichʼ tael te takʼin yuʼun ya yichʼ pasel te kʼayojiletike? Jaʼ ta swenta te majtan takʼin ya yichʼ akʼel ta obra mundial te yanyantik bin-utʼil ya yakʼik ta donate.pr418.com. Wokolawalik yuʼun te yutsil awoʼtanike.