Ta marzo 2020 te Organización Mundial de la Salud la yal te chiknaj te COVID-19, maʼyuk jich snopojik-a te kʼaxemix ta jun jaʼbil te chamel ini yak ta yakʼbeyel swokol te ants winiketik ta swolol Balumilal. Ta swenta te tulan chamel ini, bayal millón ta tul ants winiketik, jich bitʼil te testigoetik yuʼun Jehová, ay tsakotikix ta chamel, ay ma lek ya yaʼiy sbaik sok maʼyuk stakʼinik. ¿Bin spasojik te Testigoetik yuʼun ya skoltayik te hermanoetik te ayik ta wokol?

 Te Comité yuʼun Coordinadoretik yuʼun te Cuerpo Gobernante yuʼun te sTestigotak te Jehová, la schajpanik kʼaxem ta 950 Comiteetik yuʼun Socorro, wenta ya yichʼ ilel te bin yak ta kʼaxel ta swolol Balumilal ta skaj te COVID-19. Te comiteetik ay jaʼnax ya xkoltaywanik ta slumalik, sok ay Testigoetik ta yantik lumetik te schʼuunejik te koltayel ya yakʼik te machʼatik ay yaʼtelike. Jaʼnix jich, te Comiteetik yuʼun Socorro mo yajtalul te bitʼil ya xkoltaywanik.

 Kiltik te bin yak ta kʼaxel ta stojol te machʼatik ayik ta Paraguay. Jun periódico la yal te maʼyuk lek stakʼinik ta skaj te tulan chamel, jich yuʼun maʼyuk bayal sweʼelik. Pero te Comité yuʼun Socorro ta Paraguay jajchemix ta spukel-a te paqueteetik yuʼun weʼelil, te ya xtuun yuʼunik ta cheb semana te hermanoetik te ayik ta wokol. Ta jujun paquete ayniwan 600 peso stojol (30 dólar) melel, yichʼoj weʼelil, biluketik ta swenta limpieza sok te bintik ya xtuun yuʼunik ta jujuntul, jaʼnix jich tikʼnax ya xtuun yuʼunik chantul ta jun familia-a.

 ¿Bin ya spasik te voluntarioetik yuʼun ma stsakotik ta COVID-19 sok jich ya skanantayik-a te yantike? Ya stuuntesik cubreboca sok maba nopol ya yakʼ sbaik ta stojol te yantike. Jaʼnix jich ya yilik ta lek teme ya skanantay sbaik te machʼatik ya schonik te biluketik sok teme ya schʼuunik te mantalil akʼbile. Sok ya yilik teme skanantayoj sbaik ta lek te machʼatik ya yakʼik ta jujun paquete te biluketik, te kusbiluk ta lek, pasbiluk desinfectar te scarroik sok te banti ya yakʼik te paqueteetik pasbiluk desinfectar. Te machʼatik ya spukik te paqueteetik maba ya xnoptsajik ta stojol te hermanoetik.

 Ta enero 2021, te Comité yuʼun Coordinadoretik la yalik te ya yichʼ tuuntesel kʼaxem ta 25 millón yuʼun dólar swenta ya skoltayik te machʼatik ayik ta wokol yuʼun te COVID-19. Te Beteletik sok te Comiteetik yuʼun Socorro ya yilik ta lek bin-utʼil ya yichʼ tuuntesel te majtan takʼin sok ya spasik tulan te pekʼeluk stojol te bin ya smanik. Jich bitʼil ta Chile, te ay ta swentaik yakʼel koltayel, snopoj ya smanik 750 kilo yuʼun lenteja (1,653 libras). Pero ta jun-nax u toy stojol te lentejaetik. Manchukme la stoybeyik stojol, te hermanoetik la schʼuunik stojel. Cheb ora ta patil, te jchonbajel winik, la yalbey te hermanoetik te ay machʼa la sujtes te lenteja manbotike. Jich yuʼun, ma toyol la skʼanbey stojol, jich la skʼan te bin-utʼil jun u ta nailal-ae.

 Kʼalal te hermanoetik bajt yichʼik talel te lentejaetik, te jchonbajel winik ma kʼan schonix. Akʼbot smulinik te malaj stojiluk ya spukik te weʼeliletik, jich bitʼil ya spasik yan organizacionetik. Jtul hermano la skʼopon Dios ta yoʼtan sok ta patil la yalbey te jchonbajel winik te la yichʼ ilel ta spisil te congregacionetik te machʼanix ya skʼanik koltayel-ae. Jaʼnix jich te hermanoetik la yaltiklanbey te kʼalal ya yichʼ pasel te paqueteetik, ya yichʼik ta wenta te bin yilel skuxlejalik te hermanoetik. Jaʼ yuʼun ya yichʼ alel te bintik yichʼoj jujun paquete sok ya yichʼ akʼel te bin-nix ya xtuun yuʼunik ta jujun familia. Ta slajibal, la scholbeyik yaʼiy te spisil te majtan takʼin sok te aʼtelil ya spasik te testigoetik yuʼun Jehová, jich lokʼem ta yoʼtanik spasel. Te winike, chamnax yoʼtan yuʼun. Jaʼnix jich, la yakʼ ta majtanil 400 kilo (882 libras) yuʼun lenteja ta yan pedido.

 Kiltik te bin kʼax ta stojol jtul hermana te ayix yaʼbilal te Lusu sbiil te lajemix te smamalal sok yak ta kuxinel ta Liberia sok joʼtul sfamilia. Ta jun buelta, te kʼalal yakik ta weʼel ta sab sok yakik ta skʼoponel te texto yuʼun te jujun kʼajkʼal, te schʼin mam te jukeb yaʼbilal, la snaʼ stojol te maʼyukix weʼelil. Jich la sjojkʼoy: «¿Bin ya jweʼtikix-a?». Te hermana la slamantesbey yoʼtan te chʼin kerem la yalbey te la skʼoponix te Jehová, te la skʼanbeyix koltayel sok snaʼoj te yananix xkoltayotik-ae. Ta mal kʼajkʼal-abi, te ancianoetik ta congregación la skʼoponik te Lusu sok la yichʼik albeyel te yakuk xbajt yichʼik tal te sweʼelike. Jich la yal: «Te jchʼin mam kʼot ta yoʼtan te ya yaʼiy stojol jkʼoptik te Jehová, melel la yaʼiybon te kuʼune».

 Jtul ants te yak ta kuxinel ta República Democrática del Congo te slakʼoj ta kuxinel jun familia te jaʼik Testigoetik. Kʼalal la yil te spatxujk te yakik ta akʼbeyel sweʼelik yuʼun yan Testigoetik, jich la yal: «Kʼalal ya xkʼax te COVID-19, ya x-ochotik ta testigo yuʼun Jehová, melel ya smel yoʼtanik ta stojol te yermanotakik ta yorail te tulan wokoliletik». Te smamalal jich jojkʼoybot yuʼun: «¿Jaʼnaxbal ya x-ochat ta testigo yuʼun Jehová ta swenta jun bolsa yuʼun arróz?». Jich la sjakʼbey: «Maʼuk, maba jaʼuk ta swenta-abi. Pero ta swenta te arroz-abi, ya yakʼik ta ilel te kʼux ya yaʼiy sbaik ta smelelil».

 Ta swenta te majtan takʼin ya awakʼike, te testigoetik yuʼun Jehová juʼem skoltaybelik ta oranax te hermanoetik ta yorail te COVID-19. Ya kalbeyexkotik bayal wokol yuʼun te yutsil awoʼtanik sok te bayal ta chajp te bin-utʼil ya awakʼik te majtan takʼin jich bitʼil ta donate.pr418.com.