Te Jehová ya smulan snojptesel te lum yuʼun, jaʼ yuʼun te organización schajpanoj escuelaetik yuʼun ya yichʼik nojptesel te hermanoetik swenta lek chapalik ta spasel te s-asignacionik. Jich bitʼil te escuela yuʼun Evangelizador (SKE). Te jaʼbil te kʼaxem tale, te organización ma jaʼuknax slekubtesoj te bitʼil ya xnojpteswanik, jaʼnix jich slekubtesoj te naetik te banti ya yichʼik pʼijubtesel te hermanoetik. Te bin swentail jaʼ te lekuk-nax ya yaʼiy sbaik te hermanoetik te ya yichʼik pʼijubtesel sok te machʼatik ya xpʼijubteswanik. ¿Bin-utʼil ya yichʼ tuuntesel te majtan takʼin yuʼun ya xjuʼ ta pasel ini?

 Bayalix tal jaʼbil, te escuelaetik yichʼoj tal pasel ta sNail Tsoblej o sNail mukʼul Tsoblej. Pero, achʼtonax la yichʼ pasel o achʼubtesel naetik swenta tey ya yichʼik pʼijubtesel-a te hermanoetik. ¿Bin yuʼun? Kiltik oxebuk skʼoplal.

 Bayal-xan ya skʼanik koltayel. Te hermano Christopher Mavor te jaʼ jtul jkoltaywanej yuʼun servicio yuʼun te Cuerpo Gobernante jich la yal: «Te Beteletik la yalbotik te ya skʼanikxan hermanoetik sok hermanaetik ta scholel skʼop Dios. Jich bitʼil ta 2019, te sucursal yuʼun Brasil la yalik te ya skʼanik 7,600 ta jtul hermanoetik te kʼoemik ta Escuela yuʼun Evangelizador yuʼun jich ya xjuʼ ya scholik skʼop Dios ta sucursal abi». Jaʼnix jich ta Estados Unidos ya xtuun bayal precursoretik te nojptesbilik ta lek yuʼun ya spʼijubtesik yantik ta scholel skʼop Dios te banti ya xkʼax bayal ants winiketik, ta puertoetik sok ta chukojibaletik. Jaʼnix jich ya xtuun hermanoetik te ya xkoltaywanik ta Departamento yuʼun Diseño sok Construcción soknix ta Comiteetik yuʼun Enlace ta swenta Hospital. Te machʼatik ya yichʼik nojptesel ta Escuela yuʼun Evangelizador jaʼ ya xjuʼ yuʼunik spasel te aʼtelil-abi.

 Bayalxan solicitud. Ta bayal Beteletik ya xkʼot bayal solicitud yuʼun ya skʼanik pʼijubtesel, pero maʼyuk lugar yuʼun bayal estudianteetik. Jich bitʼil ta Betel yuʼun Brasil ta jun-nax jaʼbil kʼot 2,500 solicitud, te bitʼil maʼyuk bayal naetik yuʼun pʼijubtesel jaʼnax 950 ta tul la yichʼik pʼijubtesel.

 Cuartoetik te lekikxan. Kʼalal te estudianteetik ya yichʼik pʼijubtesel ta sNail Tsoblej o sNail mukʼul Tsoblej ya xjilik ta sna hermanoetik. Jich ya yichʼ pasel teme ma bayal ya yichʼ pasel ta jun jaʼbil, pero teme bayal buelta ya yichʼ pasel ta jun jaʼbile te hermanoetik maba ya xjuʼ yuʼunik yakʼbeyel te bin ya xtuun yuʼunik te estudianteetik. Jich yuʼun la yichʼ nopel te ya yichʼ tuuntesel te naetik te pasbil yuʼun ya stuuntes te estudianteetik te nopol ay te banti ya yichʼik pʼijubtesel.

 Yuʼun ya yichʼ pasel naetik te banti ya yichʼ pʼijubtesel te estudianteetik, te banti ya xnainik, te bintik ya xtuun yuʼunik te jpʼijubteswanejetik sok te ayniwan 30 estudianteetik, yaniwan xtuun bayal millón dólar yuʼun ya yichʼ pasel ini, jaʼ chikan te banti ya yichʼ pasel sok te bintikxan ya xtuun.

 Te naetik yuʼun pʼijubtesel ya yichʼ pasel ta stiʼil bael ta jun mukʼul lum sok te banti nopol ya xkʼax carroetik yuʼun pasaje. Jaʼ ya yichʼ leel te lugaretik te banti ay bayal publicadoretik yuʼun ya xkoltaywanik ta skanantayel te naetik sok te lekuk ay te bintik ya xtuun tey-ae.

 Te naetik-abi ay biblioteca tey-a, te banti ya snopikxan ta stukelik, ay computadoraetik, te banti ya spasik imprimir, te banti ya xweʼik te estudianteetik sok te jpʼijubteswanejetik, te banti ya spasik ejercicio sok yantikxan.

 Te bin mukʼxan skʼoplale, jaʼ te banti ya yichʼik pʼijubtesel te estudianteetik. Te hermano Troy te ya x-aʼtej ta Departamento Mundial yuʼun Diseño sok Construcción ta Warwick (Nueva York), jich ya yal: «La kalbeytik te Departamento te ya schajpan Escuelaetik yuʼun sKʼop Dios te yakuk skoltayotik ta yilel bin-utʼil ya yichʼ pasel te naetik te banti maʼyuk bin ya xchʼaytesbot yoʼtan te estudianteetik. Te hermanoetik-abi la yalbotik bin smukʼul, bin yilel te slusil soknix te equipo yuʼun audio sok video». Te hermano Zoltán te jaʼ jpʼijubteswanej ta Escuela yuʼun Evangelizador ta Hungría jich la yal ta swenta te equipo yuʼun audio: «Te bitʼil maʼyuk micrófono-a, ya kalbeytik te estudianteetik te tulanuk ya xkʼopojik, pero ta ora ini ay jun micrófono ta jujun escritorio..., ¡maʼyukix jwokoltik!»

 ¿Bin lek lokʼem yuʼunik-a te estudianteetik sok te jpʼijubteswanejetik ta swenta te bin yichʼoj lekubtesel? Te Angela te kʼot ta Escuela yuʼun Evangelizador ta Palm Coast (Florida, Estados Unidos), jich ya yal: «Lamalnax kʼinal tey-a. Leknax pasbil spisil, yuʼun jaʼnax ya kakʼ ta koʼtantik te pʼijubtesel». Te Csaba jtul jpʼijubteswanej ta Hungría, ya smulan te ya sjokin ta weʼel te estudianteetik sok bayal bin lek ya xlokʼ-a. Jich ya yal: «Te estudianteetik ya yalik te bin ay ta yoʼtanik sok te bin yilel te skuxlejalik jich ya skoltayotik ta snaʼbeyel sbaik ta lek sok ya jtuuntestik ta yalbeyel skʼoplal te banti ya skʼan ya x-aʼtejik te estudianteetik».

 Te estudianteetik sok te jpʼijubteswanejetik jich ya yilik bitʼil jun bendición te talem ta stojol te Mukʼul Jpʼijubteswanej te bintik lekubtesbil (Isaías 30:20, 21). Jich bitʼil ta Filipinas la yichʼ pasel jun edificio te banti ya yichʼ pasel te Escuela yuʼun Evangelizador. Jtul hermana te kʼot ta escuela ta lugar-abi jich ya yal: «Te bin yilel te lugar leknax la kaʼiy jbatik yuʼun sok jich la kaʼiytik te jaʼ ikʼbilotik tal yuʼun te Jehová. Jaʼ ya skʼan te ya jmulantik te nojptesel ta swenta te skʼope».

 Ta swenta te majtan takʼin ya awakʼike, ya xjuʼ ya yichʼ pasel, achʼubtesel sok skanantayel te naetik yuʼun pʼijubtesel. Te majtan takʼin ya xjuʼ ta akʼel ta donate.pr418.com. ¡Wokolawalik yuʼun te slekil awoʼtanik!