Ta jujun jaʼbil ya yichʼik jaʼ bayal ta jmil ants winiketik. Jich yuʼun ya skʼan te ya yichʼ pasel mukʼul naetik te banti ya kichʼtik ta mukʼ te Jehová. Te Departamento yuʼun Diseño sok Construcción ta swolol Balumilal la snopik te ya spasik o ya slekubtesik 2,700 naetik ta jaʼbil 2020. a

 Ta swenta te chamel COVID-19 bayal bin la smakotik yuʼun ya yichʼ pasel te bin la yichʼ tael ta nopele. Te Comité yuʼun Publicación la yal te yakuk yichʼ komel te aʼtelil te yak ta pasel-ae. Pero ta jaʼbil 2020 juʼ ta pasel sok ta lekubtesel kʼaxem ta 1,700 naetik te banti ya kichʼtik ta mukʼ te Dios te kʼalal mato jajchem-a te coronavirus. Jaʼnix jich juʼ ta pasel kʼaxem ta 100 proyectoetik te mukʼik skʼoplal ta sucursaletik. Kiltik cheb proyecto te juʼ ta pasel sok te bintik lekilal staojik te hermanoetik.

 Betel ta Camerún. Te Betel te ay ta lum Duala, kʼax chʼin sok ya skʼan lekubtesel. Te Comité yuʼun Publicación la staik ta nopel te ya yachʼubtesik te Betel, pero la yilik te bitʼil jaʼ toyolxan la xlokʼ-a te bitʼil stojolnanix-ae. Jaʼnix jich la staik ta nopel teme ya spasik yachʼil na o ya smanik o ya yachʼubtesik jun edificio. Pero ma jichuk kʼot ta pasel yuʼunik.

 Te hermanoetik ta Duala, la yaʼiyik stojol te ya yichʼ pasel jun carretera te ya xkʼax te banti ay te sNail mukʼul tsoblej. Ya xjuʼ te ya xkʼootik ta Betel ta swenta te la yichʼ pasel te carretera-abi sok te ya x-och bael te luz sok yantikxan te bin ya xtuune. Te Cuerpo Gobernante lek la yil te ya yichʼ pasel te Betel ta skʼinalul te sNail mukʼul tsoblej.

 Swenta ya yichʼ pasel te proyecto, te hermanoetik la stojik jun empresa yuʼun ya spasik te construcción, jich ora juʼ ta pasel sok ma la yichʼ lajinel bayal takʼin. Yuʼun-nix jich-a, maba laj te takʼin te bitʼil nopbil-ae: ayto jil dos millón yuʼun dólar. Te betelitaetik kʼaxik bael ta yachʼil Betel te kʼalal mato xjajch-a te COVID-19.

 Te betelitaetik jun yoʼtan ya x-aʼtejik sok jich ya yilik bitʼil jun majtanil yuʼun Jehová te yachʼil Betel. Jtul hermano sok yinam jich ya yal: «Ta ora ini ya jkʼan ya x-aʼtejotikxan, melel jich ya kiltik bitʼil jun majtanil».

 Oficina yuʼun Traducción ta tojolabal (México). Te traductoretik yuʼun tojolabal, bayal jaʼbil aʼtejik ta Betel yuʼun Centroamérica te nopol yiloj sba sok te México. Te machʼatik ya xkʼopojik ta tojolabal, ayik ta municipio yuʼun Altamirano sok ta Las Margaritas, te yiloj sba 1,000 kilómetro sok te Betel. Jich yuʼun te traductoretik wokol ya yaʼiyik te ya xjul ta yoʼtanik te bitʼilnix ya xkʼopojik te slumalik. Te Betel wokol ya yaʼiyik te ya staik hermanoetik te ya xkoltaywanik ta traducción sok ta spasel grabar.

 Jich yuʼun, te Comité yuʼun Redacción la staik ta nopel te ya stikunik bael te traductoretik te banti ya xkʼopojik ta tojolabal. Ta swenta-abi, te Betel la sman sok la yachʼubtesik te nae. Jaʼ pekʼelxan lokʼ stojol-a te bitʼil lajuk spasik oficinaetik o la smajanik naetik.

 Jtul traductor ya schol kaʼiytik te bin yaʼiyel ya yaʼiy sbae, jich ya yal: «Te lajuneb jaʼbil ayon ta traductor ta Betel yuʼun México, maʼyuk la jta ni junuk familia te ya snaʼ te jkʼope. Ta ora ini ayix te oficina te banti ya xkʼopojik ta tojolabal. Ta jujun kʼajkʼal ya xkʼopojon sok te ants winiketik ta jkʼopnix. Jaʼ skoltayejon yuʼun ya jnaʼ te bitʼilnix ya xkʼopoj-a te jlumal sok ta spasel ta lek te kaʼtele».

 Ta jaʼbil 2021 teme jich ya xjuʼe, ya yichʼ pasel 75 oficinaetik yuʼun traducción sok sNail Pʼijubtesel yuʼun skʼop Dios. Jaʼnix jich ya yichʼ pasel te waxakeb proyectoetik te kechajtik ta yanyantik Betel, jich bitʼil te Rámapo (Nueva York) sok la yichʼ jelbeyel slugaril te Betel ta Argentina sok ta Italia. Ya yichʼ pasel kʼaxem ta 1,000 sNail Tsoblej sok ay 6,000 naetik te banti ya stsob sbaik te ya skʼan chaʼpasel, melel maba lek ayik sok ay 4,000 sNail Tsoblej te ya skʼan achʼubtesel.

 ¿Bin-utʼil ya xjuʼ te ya yichʼ pasel te proyectoetik ini? Te hermano Lázaro González te ya x-aʼtej ta Comité yuʼun Sucursal ta Centroamérica, jaʼ ya yalbey skʼoplal te Oficina yuʼun Traducción ta tojolabal, jich ya yal: «Maʼyuk bayal stakʼinik te hermanoetik te banti smakoj te Betel kuʼuntik. Te manchuk jaʼ ta swenta te koltayel ya yakʼik te hermanoetik ta swolol Balumilal, maniwan juʼ ta pasel te jichuk te oficina yuʼun traducción ta stojol te hermanoetik te ya xkʼopojik ta yan kʼopiletik. Ta swenta-abi, te traductoretik la yichʼ tikunel bael ta slumalik. Ya kalbeytik bayal wokol te hermanoetik ta swenta te yutsil yoʼtanike». Te bitʼil juʼ spisil te proyectoetik ini, jaʼ ta swenta te majtan takʼin la yakʼik te hermanoetik ta swolol Balumilal soknix te ya yichʼ akʼel ta donate.pr418.com.