Ta jaʼbil yuʼun servicio 2021, a te COVID-19 bayal wokolil la yakʼ. Jich bitʼil la yichʼ alel ta artículo «Koltayel ta swolol Balumilal ta yorail te COVID-19» yichʼoj lajinel bayal millón ta dólar b yuʼun ya yichʼ akʼel koltayel, sok yichʼoj chapel kʼaxem ta 950 Comité yuʼun Socorro.

 Kʼalal yak ta kʼaxel te COVID-19 ta swolol Balumilal, jaʼnix jich kʼax wokoliletik ta skaj te tulan yikʼal jaʼal sok yantikxan, soknix te wokoliletik ya yakʼ te ants winiketik, ta skaj-abi staoj swokolik te kermanotaktik. Jaʼ yuʼun, te Comité yuʼun Coordinadoretik yuʼun te Cuerpo Gobernante la yal te ma jaʼuknax ya yichʼ tuuntesel takʼin ta swenta te COVID-19, jaʼnix jich la yal te ya yichʼ tuuntesel 8 millón ta dólar yuʼun ya yichʼ ilel kʼaxem ta 200 ta chajp te wokoliletik-abi. Kiltik te bin-utʼil la yichʼ tuuntesel te majtan takʼin la awakʼik ta cheb wokoliletik te matonax jaluk skʼaxele.

 Ta 22 yuʼun mayo ta 2021, tʼom te volcán Nyiragongo, te ay ta República Democrática del Congo. La slajin naetik, escuelaetik sok te yaʼalike. Jaʼnix jich la schʼoj lokʼel tan te kʼot ta mukʼul lum Goma sok bayal buelta kʼax nijkel. Jaʼ bayalxan te ants winiketik te la yichʼik lokʼesel baele. Bayal ants winiketik lokʼik ta anel sok ay machʼatik kʼotik kʼalalto ta Ruanda.

 Te machʼatik la yichʼik lokʼesele, kʼaxem ta 5 mil ta tul Testigoetik tey ayik-euk-a. Ay machʼatik jin te snaik ta skaj te volcán, sok ay yantik te ochik ta elkʼanbeyel te sbilukik. Te comiteetik yuʼun socorro ta Ruanda sok ta República Democrática del Congo jun-nax ochik ta koltaywanej. Te machʼatik ayik ta Betel ta Congo jich ya yal ta swenta te bin la yal jtul hermano te ya x-aʼtej ta comité yuʼun socorro: «Te kʼalal mato xyichʼik albeyel-a te ya xlokʼik baele, te comité jajch spuk weʼelil, jaʼ, colchonetik, sok kʼuʼul pakʼal, manchukme yakik ta kʼaxel ta tulan wokolil te mukʼul lum-abi». Kʼaxem ta 2 mil ta tul hermanoetik bajtik ta yan mukʼul lum, jun comité yuʼun socorro la yakʼtiklan casa de campaña, la spuktiklan cubreboca sok la yaltiklanbeyik te bin-utʼil ya skʼan ya skanantay sbaik yuʼun maba ya stsakotik ta COVID-19 sok ta cólera.

 Ta oxebnax u, te hermanoetik la spukik kʼaxem ta wakeb tonelada arroz, wakeb tonelada harina te pasbil ta ixim, kʼaxem ta 8 mil litro yuʼun aceite sok 8 mil litro yuʼun jaʼ. Yuʼun maba ya yichʼ lajinel bayal takʼin, teynix la smanik-a te bintik la yichʼ pukel yuʼun maba kʼejel ya yichʼik talel.

 Jtul hermana jich ya yal: «Yakotik ta kʼaxel ta tulan wokolil». Jin sna yuʼun te volcán, ta patil la yichʼ koltayel te sfamilia ta swenta te bintik ya xtuun yuʼunik sok ta swenta schʼuunel yoʼtanik. Jich la yalxan: «Ya kalbeytik wokol te Jehová, melel ay te bintik ya xtuun kuʼuntik. Kilojtik te jaʼ Jehová te ya skoltayotik yuʼun ya xjuʼ kuʼuntik stsʼikel te jwokoltike».

 Bayalix jaʼbil te yakik ta woklajel ta Venezuela ta skaj te maʼyuk takʼin, maʼyuk bayal weʼelil sok yak ta toyel te machʼatik ya x-utsʼinwanike. Bayal wokolil ya xkʼax yuʼunik te hermanoetik. Pero te organización yuʼun Jehová yakʼojbey te bin ya xtuun yuʼunik.

 Te jaʼbil kʼaxe, te organización la slajin kʼaxem ta jun millón sok olil ta dólar yuʼun ya yichʼ manel weʼelil sok xapon te la yichʼbeyik bael te machʼatik ayik ta wokol. Te Betel ta Venezuela jich ya yal: «Wokol ta ichʼel bael 130 tonelada weʼelil ta jujun u chikan te bantito ayik te hermanoetik». Te hermanoetik jaʼ ya stikunik bael te bintik ma xtsʼilaje. Te Betel jich ya yalxan: «Jteb ma spisiluk te weʼelil jaʼ ya jmantik te bintik pekʼel stojole, te bin yak ta chonele sok bayal ya jmantik. Yuʼun ya yichʼ ichʼel bael jaʼ ya jtuuntestik te banti pekʼelxan stojole».

 Te Leonel te ya x-aʼtej ta Comité yuʼun Socorro ta Venezuela, ya smulan te bin ya spase. Jich ya yal: «Mukʼ skʼoplal ta koʼtan skoltayel te hermanoetik te ya xkʼax swokolike. Jaʼ skoltayejon yuʼun lek ya kaʼiy jba te bitʼil laj te kinam ta COVID-19. Jaʼnix jich, spisil-ora ay bin yakon ta spasel sok ya jkoltay te hermanoetik te ay swokolik. Jamal kiloj te maʼyuk bin-ora ya yijkitay Jehová te j-abatetik yuʼun».

 Aʼiya awaʼiy stojol te bin la yal jtul hermano te ay aʼtejem ta jun comité yuʼun socorro: «Ta ora ini joʼon ya jkʼan te ya skoltayonik. Ma jaʼuknax la kichʼtik akʼbeyel te bin ya xtuun kuʼuntik. Te joʼon sok te kinam la kichʼtik akʼbeyel slamalil koʼtantik, smukʼul koʼtantik, sok la kichʼtik kanantayel yuʼun te hermanoetik».

 Ma naʼbiluk te bin-ora ya xtal wokolil. Manchukme jich-abi, te organización oranax ya yakʼ te koltayel ta swenta te majtanil takʼin ya awakʼike. Ta donate.pr418.com ya xjuʼ ya awil bin-utʼil ya awakʼ te majtan takʼin. ¡Yame kaltik wokol yuʼun te yutsil awoʼtanik!