Te bin ya skʼan te Jehová jaʼ te yakuk xnaʼbot sba yuʼun spisil te ants winiketik sok te yakuk snaʼik ta swenta te Wentainel yuʼun, chikan bin yilel te skuxlejalike (1 Timoteo 2:3, 4). Te testigoetik yuʼun Jehová ya slokʼesik Bibliaetik sok junetik yuʼun jich ya skoltayik spisil te ants winiketik te bantito kʼalal ya xjuʼ yuʼunike, jaʼnixme jich tey ochem skʼoplalik-euk-a te kojkchikinetik. Te organización kuʼuntik ay spasoj bayal ta mil videoetik ta bayal ta chajp kʼopil seña. a ¿Bin-utʼil ya yichʼ pasel sok ya yichʼ pukel te junetik ini? Sok ¿bin-utʼil yichʼoj lekubtesel te bitʼil pasbil te junetik ini?

 Ta swolol Balumilal ay bayal equipo yuʼun traducción te yakik ta skʼasesel ta bayal ta chajp kʼopil seña. Te kʼalal ya yichʼ kʼasesel jun publicación ta kʼopil seña te jujun grupo ya yilbeyik lek skʼoplal. Ta patil ya yilik bin-utʼil ya skʼasesik ta kʼopil seña yuʼunik te bin ya yal te publicación. Ta patil ya spasik ta grabar ta video. Ta ora ini ay 60 equipo yuʼun traducción te ya skʼasesik spisil te junetik te ya xtuun ta snopel te Biblia, sok ayxan 40 equipo te ma spisiluk-ora ya spasik traducir.

 Ta namey tal, bayal takʼin ya yichʼ tuuntesel-a te kʼalal ya yichʼ pasel videoetik ta kʼopil seña. Te cámara sok te equipo te ya xtuun ta spasel te videoetik kʼax toyol stojol-a. Ma jaʼuknax-abi, jaʼnix jich ya yichʼ pasel grabar ta cabina yuʼun grabación te ya skʼan ya yichʼ pasbeyel snaul, ay baeltik la skʼan achʼubtesel naetik ta swenta-abi. Yuʼun chapal ya xjil te yaʼtejibik te jun grupo yuʼun traducción ta kʼopil seña, kʼaxem ta 600 mil peso b ya yichʼ lajinel.

 Swenta ya yichʼ tuuntesel ta lek te donacionetik, te organización kuʼuntik yiloj ta lek te bin-utʼil ya yichʼxan pasel ta lek te traduccione. Ta ora ini yakotik ta stuuntesel aʼtejibaletik te yachʼilikto ta lokʼel, te pekʼelik stojol sok te maba wokoluk ta tuuntesele. Jich bitʼil te maba ya jtuuntestikix jun cabina yuʼun grabación, te jujun grupo yuʼun traducción ya xjuʼ ya spasikix grabar teyto ta s-oficinaik te banti ya xjuʼ ya yakʼbeyik yaxal pakʼ o croma te banti ya spasik grabare. Te kʼalal ya xchiknaj bayal hermanoetik ta jun video, ta jujuntul ya xjuʼ ya spasik grabar teyto ta s-oficinaik o ta snaik te bin staojik ta spasel grabar.

 Jaʼnix jich jpasojtik programaetik ta computadora te ya xkoltayotik ta skʼasesel te junetik kuʼuntike. Ta swenta te programaetik ini maba ya yichʼix bayal tiempo ta kʼasesel ta kʼopil seña te junetike. Te hermanoetik ya yalik wokol yuʼun te lekubenix te bitʼil ya yichʼ kʼasesel te junetik ini. Te hermano Alexánder sbiile jich ya yal: «Tseʼel koʼtan yuʼun te ya kil te ya xlokʼix bayal videoetik ta kʼopil seña, ma jichuk te bitʼil nailal tale. Ta jujun kʼajkʼal ya kil te ya xlokʼ yachʼil videoetik ta jujun kʼajkʼal».

 Ta ora ini, kʼaxem ta 100 mil peso ya yichʼ lajinel yuʼun jich chapal ya xjil te yaʼtejibik te equipo yuʼun traducción ta seña. Ta swenta-abi, ya xjuʼ ta pasel bayalxan videoetik ta bayal ta chajp kʼopil seña.

 Te kʼalal la yichʼix pasel grabar ta video jun publicación ya yichʼik tikunbeyel te machʼatik ya xtuun yuʼunike. Te namey tale, te grabacionetik ya yichʼ tikunbeyel yan compañía yuʼun ya skʼases ta caset sok ta DVD, ta patil ya yichʼ tikunel bael ta stojol te congregacionetik, pero spisil ini ya yichʼ bayal tiempo, aʼtel sok takʼin-a. Jaʼnax ta 2013, kʼaxem ta 40 millón la yichʼ lajinel ta spasel DVD ta swenta te kʼopil seña.

 Te kermanotaktik te ma xyaʼiyik kʼinal tseʼel yoʼtanik yuʼun te videoetik ini. Pero ta smelelil aynix wokol la yaʼiyik stuuntesel ta skaj te ya xlokʼ bayal caset sok DVD. Jich bitʼil ta jun-nax libro yuʼun te Biblia, ya xjuʼ xlokʼ bayal DVD yuʼun. Jtul hermano ta Brasil te Gilnei sbiil jich ya yal: «Te kʼalal ya jkʼan jkʼopontik junuk texto ta Biblia, nail ya skʼan ya jletik te bin videocinta ay, patil ya jletik te versiculoe. Kʼax wokol ta pasel-abi». Jtul hermana te Rafayane sbiil, te ya stuuntes-a te DVD te ay ta seña kʼop, jich ya yal: «Te kʼalal ya jnop-a te Biblia ya xlujbon bayal-a. Melel ya yichʼbon bayal tiempo ta sleel-a te textoetik sok te referenciaetike». Jich yuʼun te kʼalal ya scholik skʼop Dios te hermanoetik ya skuchik bael te DVD o videocintaetik, yuʼun jich ya stsumbeyik yil te ants winiketik ta stelevisionik te ya smulanik snopel te skʼop Diose. Jaʼnix jich ay hermanoetik te jaʼnix la stuuntesik te DVD yuʼunik ta patil jaʼ jajch stuuntesik te aparato te ay spatallaul yuʼun tey ya stsumik ta ilel-a te disco, jaʼ ini maba wokol ta kuchel. Te Bobby te nainem ta Estados Unidos jich ya yal: «Te kʼalal ya jkʼan ya jkʼoponbeytikxan yan texto te ants winiketik bayal buelta la skʼan la kotsestik yan disco. Jich bitʼil te ya yichʼ bayal tiempo spasel ini ay wokol ya kaʼiytik stuuntesel-a te Biblia te kʼalal ya xkʼopojotik sok te ants winiketike».

 Ta jaʼbil 2013, te organización yuʼun te Jehová la yakʼbotik te aplicación JW Library Sign Language, jaʼ te banti ya xjuʼ ya spasik descargar videoetik te ay ta kʼopil seña ta celularik o ta stabletik te hermanoetik yuʼun jich ya yakʼik ta ilel te videoetike. Ta 2013, te aplicación ini jaʼnax ya stuuntesik-a te machʼatik ayik ta kʼopil seña yuʼun Estados Unidos. Jaʼ ini la yichʼ achʼubtesel ta 2017, yuʼun jich ya xjuʼ ya stuuntesik spisil te machʼatik ayik ta kʼopil seña. Kʼax tseʼel yoʼtan yuʼun te hermanoetike. Jtul hermano te Juscelino sbiil te ay ta Brasil, jich ya yal: «Kʼax tʼujbil ya kil te bayal kʼuxotik ta yoʼtan te Cuerpo Gobernante te joʼotik te ma xkaʼiytik kʼinale, melel jaʼ ya skʼan te yakuk xmukʼub te schʼuunel koʼtantik jich bitʼil te machʼatik ya yaʼiyik kʼope. Te kʼalal lokʼ te aplicación, la stijbonxan koʼtan ta snopel ta lek te Bibliae».

 Ta ora ini spisil te videoetik te ya yichʼ pasel ta kʼopil seña ya yichʼ moesel ta página kuʼunkotik soknix ta aplicación JW Library Sign Language. Ta swenta ini, maba ya xjalajix bayal jaʼbil o tiempo ta spasel traducir, spasel grabar sok ta spukel te videoetik te ya xlokʼ ta kʼopil seña te jaʼxanix ya yichʼ pasel cheʼoxeb kʼajkʼal. Bayal te kʼopil seña te jteb ma pajal ya xlokʼik sok te publicación yuʼunik te machʼatik ya xkʼopojike.

 Ilawilik bin ya yalik chaʼoxtul hermanoetik te ma xyaʼiyik kʼinal. Jtul hermana te Klízia sbiil jich ya yal: «¿Aybal jun organización te mukʼ skʼoplal ta yoʼtan te machʼatik ma xyaʼiyik kʼinal yuʼun ya yakʼbey bayal sweʼel ta swenta te schʼuunel yoʼtanike? Maʼyuk machʼa jich ya xjuʼ ya spas ta jtojoltik, jaʼnax te organización yuʼun te Jehová». Yan hermano te Vladimir sbiil jich ya yal: «Ta swenta te videoetik chikan ta ilel te jaʼnix jich kʼuxotik ta yoʼtan-euk te Jehová jich bitʼil te machʼatik ya yaʼiyik kʼinal».

 Te video yuʼun te kʼopil seña yichʼoj te kʼopetik ini: «Te jun ini maba ya yichʼ chonel ya yichʼ pukel ta swolol balumilal yuʼun ya skoltayotik ta snopel te Bibliae». Ya kaltik wokol yuʼun ta swenta te majtan takʼin te ya awakʼik ta donate.pr418.com. Te majtan takʼin ya awakʼike ya xkoltaywan yuʼun ya yichʼ paselxan Bibliaetik sok publicacionetik te ya xtuun yuʼun te ants winiketik, teyme ochem skʼoplal-a te kʼopil seña.