Ta sbabial buelta, te testigoetik yuʼun Jehová ta swolol Balumilal jun-nax te grabación la yilik ta swenta te mukʼul tsoblej yuʼun oxeb kʼajkʼal 2020, jun-nax sfechaul la yilik ta yuilal julio sok agosto. Swenta juʼ ta pasel ini, la yichʼ kʼasesel kʼaxem ta 500 ta chajp kʼopil te programae. Te bitʼil kʼayemotik tal ta pasel te aʼtelil ini ya xjuʼ ya yichʼ jun jaʼbil o kʼaxem-a. Pero, ta swenta te tulan chamel coronavirus, te traductoretik ma la sta chaneb u te la spasik te programa yuʼun mukʼul tsoblej yuʼun oxeb kʼajkʼal 2020 «¡Tseʼeluk awoʼtanik spisil-ora!».

 Te Departamento Mundial yuʼun Compra sok te Departamento te ya skoltay te traductoretik te ay ta Betel yuʼun Estados Unidos koltaywanik ta spasel te mukʼul aʼtelil ini. Te Departamento te ya skoltay te traductoretik la sta ta ilel te bayal equipoetik yuʼun traducción ya skʼanikxan bayal yaʼtejibik ta spasel te aʼtelil ini, jich bitʼil lekil microfonoetik. Te Departamento Mundial yuʼun Compra la sman 1,000 microfonoetik sok jteb ma sta 200 yanyantik lugaretik te banti la yichʼ tikunele.

 Swenta ma xlaj bayal takʼin, la yichʼ manel te microfonoetik ta mayoreo, ta jun-nax lugar te banti kʼot ta akʼele, ta patil la yichʼ akʼel ta cajaetik. Tey-abi, la yichʼ pukel bael ta lugaretik ta swolol Balumilal. Te kʼalal la yichʼ manel ta mayoreo te microfonoetike, ayniwan lokʼ 3,400 peso te jujun microfonoe (ayniwan 170 dólar), tey ochemix stojol-a te bitʼil la yichʼ tikunele. Jich la jpastik ahorrar kʼaxem ta 20%.

 Te Departamento Mundial yuʼun Compra jaʼ la smanik te microfonoetik ini sok la stikunik ta u yuʼun abril sok mayo ta 2020, ta yorail-abi ma orauknax ta manel te biluk ta skaj te coronaviruse. Pero, ta slajibal te u yuʼun mayo, jteb ma spisiluk ayix-a te yaʼtejibik te oficinaetik yuʼun traducción, beteletik sok yantikxan lugaretik te banti ya yichʼ pasel traducción.

 Te Jay Swinney te jaʼ ay ta swenta yilel te Departamento Mundial yuʼun Compra, jich ya yal: «Te kʼalal jajch tal ta pasel te aʼtelil ini, te empresaetik te ya schonik te biluketike leknax aʼtejik sok te departamentoetik yuʼun Betel. Jaʼnax te chʼul espíritu yuʼun te Jehová ya xjuʼ ya yakʼbey te bintik ya xtuun yuʼun te hermanoetik ta oranax sok te maba laj bayal takʼin yuʼune».

 Te hermano Nicholas Ahladis te ya x-aʼtej ta departamento te ya yakʼbey koltayel te traductoretik, jich ya yal: «Te traductoretik te makalike akʼbotik bayal stseʼelil yoʼtanik te kʼalal kʼot te yaʼtejibike. Manchukme ma junuknax lugar ayik, juʼ yuʼunik te jun-nax aʼtejik, juʼ yuʼunik ta skʼasesel sok spasel grabar te discursoetik, videoetik sok kʼayojiletik ta kʼaxem ta 500 ta chajp kʼopiletik».

 Bayal aʼtelil la yichʼ pasel yuʼun te mukʼul tsoblej yuʼun oxeb kʼajkʼal 2020 «¡Tseʼeluk awoʼtanik spisil-ora!». Ta ora ini jaʼnax jun la kalbeytik skʼoplal, juʼ ta manel spisil te microfonoetik ini ta swenta te majtan takʼin la awakʼik ta donate.pr418.com sok te yantikxan bin-utʼil la awakʼike.