Ta jujun u ya jkʼan kiltikix te programa sok videoetik te ya smukʼubtes koʼtantik te ya yichʼ mojtesel ta JW Broadcasting. Pero ay bayal hermanoetik ta África ma xjuʼ ya yilik ta Internet. ¿Bin yuʼun?

 Ta África maʼyuk bayal yip te Internet. Te banti ay Internet toyol stojol sok maʼyuk bayal yip. Ta jun buelta, jtul superintendente yuʼun circuito ta Madagascar la spas descargar te JW Broadcasting ta cibercafé sok la stoj 320 peso (16 dólar). a Kʼaxemtoxan stojol-a te bitʼil ya spasik ganar ta jun semana te ants winiketik.

 Manchukme jich-abi, bayal ants winiketik ya smulanik yilel te JW Broadcasting te ma puersauk ya stuuntesik Internet. ¿Bin-utʼil ya xjuʼ ta pasel-abi?

 Jaʼto tal ta 2017, te machʼatik kuxinemik ta África subsahariana ya xjuʼ ya yilik te JW Broadcasting ta jun canal ta televisión ta satélite. Te canal ini ma tojbiluk ya xjuʼ ta ilel spisil-ora ta 16 ta chajp kʼopiletik.

 Te testigoetik yuʼun Jehová ya stojik jun servicio yuʼun televisión swenta ya yilik-a te videoetik. Te señal yuʼun satélite ya xkʼot ta 35 nacionetik yuʼun África, ta jujun u ya stojik 240 mil peso (12,000 dólar). Kʼalal ya yichʼxan kʼasesel yan programaetik ay baeltik te toyolxan ya yichʼ tojel, melel ya yichʼ tuuntesel yan canal. Ta swenta ini bayal ants winiketik ya yilik te mukʼul tsoblej yuʼun oxeb kʼajkʼal sok yantikxan programaetik te yichʼ kʼasesel kʼalal jtul representante yuʼun te central mundial ya yulaʼtay te Betel.

 Bayal ants winiketik ya yilik te canal ini manchukme ma Testigouk yuʼun Jehová. Pero ay bayal hermanoetik te ma xjuʼ yuʼunik smanel te equipo yuʼun ya yilik videoetik. Jaʼ yuʼun yichʼoj akʼel jun equipo te ya snit te señal ta 3,670 sNail Tsoblej. Jich te hermanoetik ya xjuʼ ya yilik te JW Broadcasting. Teme ayix televisión o jun proyector ta sNail Tsoblej yaniwan yichʼ tojel 1,400 peso (70 dólar). Teme maʼyuke, yaniwan yichʼ tojel 10,600 peso (530 dólar).

 Te hermanoetik tseʼelnax yoʼtanik yuʼun te jich la yichʼ pasel. Jtul anciano ta Camerún jich ya yal: «Te joʼon sok te jfamilia, jich ya kil bitʼil maná ta yolil takin kʼinal». Jtul hermano ta Nigeria te Odebode sbiil jich ya yal: «Oxeb buelta ta semana ya jtsob jbatik sok te jfamilia yuʼun ya kiltik te programaetik. Te jnichʼnab spisil-ora ya skʼan ya yilik. Ay ya yalbotik te yakuk jtsumbeytik yilik». Te Rose te jaʼnix slumal te Nigeria jich ya yal: «¡Kʼax tseʼel koʼtan! Ta nail kʼayemon ta yilel-a te noticiaetik, pero ta ora ini jaʼ ya kilix te canal JW. Kʼalal ya kil te noticiaetik oranax ya x-ilinon sok ya xmo jpresion. Pero te canal JW ya yakʼbon slamalil koʼtan... Jaʼ jun canal te kʼax ya jmulane. Jaʼ jun bendición yuʼun te Jehová».

 Jtul superintendente yuʼun circuito ta Mozambique ya yal te ta sNail Tsoblejetik te banti ya yulaʼtay la yichʼ akʼel equipoetik swenta jich ya staik te señal sok jich ya yilik te canal JW. Te hermanoetik ya xkʼotik ta sNail Tsoblej kʼalal ayto skʼan jun ora ya xjajch te tsoblej yuʼun ya yilik te JW Broadcasting.

 Ta yorail te mukʼul tsoblej internacional 2019 ta Johannesburgo (Sudáfrica), la yichʼ tuuntesel te canal ini yuʼun jich la yichʼ kʼasesel ta baluneb lugaretik te discursoetik te la yakʼik te Cuerpo Gobernante. Te Sphumelele te ay ta aʼtel ta Departamento yuʼun Broadcasting ta Betel yuʼun Sudáfrica jich ya yal: «Ta nailal ya jkʼasestik te discursoetik ta Internet. Yuʼun jich ya yichʼ kʼasesel-a ya skʼan te lekuknax te señal sok ya kotsestik saldo. Kʼalal ya yichʼ kʼasesel ta canal ta satélite jaʼ pekʼelxan stojol sok jaʼ lekxan-a».

 Ta swenta te slekil awoʼtanik sok te majtan takʼin ya awakʼik, te hermanoetik ta África ya xjuʼ ya yilikix te JW Broadcasting. Wokolawalik yuʼun te yanyantik bin-utʼil ya awakʼik te majtan takʼin jich bitʼil ta donate.pr418.com.