Te carritoetik kʼaxemix ta lajuneb jaʼbil te yak ta tuuntesel. Te bitʼil ya yakʼ ta ilel te publicacionetik maʼyuk machʼa ma sta ta ilel ta swolol Balumilal. Kʼalal ya kakʼtik jun carrito, te ants winiketik ya yilotik sok ya snaʼikix machʼaotik-a. Tʼujbilik ta ilel sok ma wokol ta tuuntesel. Jich bitʼil la yal jtul hermana ta Polonia te Asenata sbiil: «Ma jaʼuknax te tʼujbilik ta ilel te carritoetik. ¡Oranax ta chajpanel sok bayuk ya xjuʼ ya kichʼtik bael!»

 ¿Aybal ajojkʼoybeyoj aba bin-utʼil la yichʼ pasel te carritoetik sok banti ya yichʼ tael?

 Ta 2001, te Cuerpo Gobernante lek la yil te hermanoetik ta Francia yakuk spasik prueba chaʼoxchajp bin-utʼil ya scholik skʼop Dios ta komonsitil, la stuuntesik exhibidoretik te ya xjuʼ ta ichʼel bael. Jich bitʼil, la skʼatpʼunik ta exhibidor te maletaetik sok carritoetik te ya yichʼ tuuntesel ta smanel biluketik yuʼun ya yakʼik ta ilel te publicacionetik. Ta patil, te sucursal la stsa jun modelo te lek la yile, ta bayal jaʼbil te hermanoetik la stuuntesik.

 Te prueba la yichʼ pasel ta Francia kʼax lek lokʼ. Jaʼ yuʼun ta 2011 te Cuerpo Gobernante la yakʼ permiso te nail ya yichʼ pasel ta Nueva York (Estados Unidos) te ya yichʼ tuuntesel te carritoetik sok mesa ta scholel skʼop Dios ta komonsitil. Te precursoretik te jich la spasik la yilik te bayal bin lek yichʼoj te carritoetik-abi. Jich bitʼil, te bayuk banti ya xjuʼ ya yakʼ sbaike. Pero jaʼnix jich la yilik te ay banti ya xjuʼ ya yichʼ lekubteselxane jaʼ yuʼun la yakʼik ta naʼel. Te sbabial carritoetik yichʼoj pasel ta teʼ, jaʼ yuʼun wokol ta moesel ta escaleraetik. Jich yuʼun la slekubtesik te bin-utʼil pasbil te manchuk kʼax aluk sok te ma xlikot bael yuʼun te ikʼe. Sok la smukʼubtesbeyik te sllantail yuʼun maba ya stsʼilaj kʼalal ay banti ya smaj sba sok te ya xjuʼ ta ichʼel bael te banti chujkultik sba te bee. Jaʼnix jich la spasbeyik jun scajonil yuʼun ya xjuʼ ya yichʼikxan bael publicacionetik.

 Te bitʼil la yichʼ pasel ini, ay bin lek lokʼ-a. Jaʼ yuʼun ta 2012 te Cuerpo Gobernante la yakʼ ta tuuntesel te carritoetik ta swolol Balumilal. La spasik acuerdo sok jun fábrica yuʼun ya spasik bayal carritoetik ta materialetik te ma kʼax aluk pero te ya xjalaje.

 Te jayeb tiempo kʼaxem talele ay bintik yichʼoj jeltayel yuʼun ya xlekub te carritoetike. Jich bitʼil, ta 2015 la yichʼ pasbeyel spojtsil yuʼun ma x-ajchʼ ta jaʼal. Te Dina, te nainem ta Georgia, la smulan te jich ya yichʼ pasele. Jich la yal: «Kanantaybil ta lek te junetike, melel te carrito jich kʼoem te yichʼoj skʼuʼ yuʼun ma x-ajchʼ ta jaʼal». Ta 2017, ta cheʼoxeb kʼopiletik jajch yichʼ tuuntesel letreroetik te ya xjuʼik ta jeltayel. Te Tomasz, jtul hermano ta Polonia, jich la yal: «Kʼax wokol ta jeltayel-a te junetik te pakʼbile. ¡Pero ta ora ini oranax ta jeltayel!». Ta 2019, ay binxan la yichʼ jeltayel ta materialetik sok te bin-utʼil ya yichʼ pasel yuʼun jich te carritoetik bayal tiempo ya xjalaj.

 Jun-nax fábrica ya spas te carritoetik, patil ya spuk ta swolol Balumilal. Ta ora ini jujun carrito kʼaxemniwan ta 700 peso stojol (43 dólares) maba ochem stojol tey-a te bin-utʼil ya yichʼ tikunel sok yantikxan gastoetik. Jaʼto tal-abi, yichʼoj tikunel kʼaxem ta 420 mil carritoetik ta congregacionetik ta swolol Balumilal, yichʼoj lajinel kʼaxem ta 250 millón ta peso (16 millón ta dólar).

 Yuʼun ya jtuuntestik ta lek te majtan takʼin ta bayal ya jmantik te carritoetik. Jaʼnix jich, te congregacionetik ma puersa ya smanik yachʼil carritoetik, melel ya xjuʼ ya smanikix te bintik ya stsʼilaj yuʼune.

 Te hermanoetik ya smulanik. Te Martina, te jaʼ slumal te Ghana ya yal: «Te kʼalal ya jcholtik te skʼop te Diose, joʼotik ya jletik te ants winiketik. Pero te bin ya jmulan ta scholel skʼop Dios ta carrito jaʼ te jaʼnix ya xtalik ta jtojoltik te ants winiketike. Te jayeb machʼatik ya xkʼaxik sok ya yilik jich kʼoem te la yichʼik cholbeyel skʼop Diose.

 Ta yan nación yuʼun África, jtul winik noptsaj ta jun carrito sok la yichʼ bael cheʼoxeb junetik te ay ta skʼop. Jun semana ta patil, sujt tal sok jich la yalbey te hermanoetik. «La jkʼoponix spisil te junetik te bin ya yale kʼax mukʼ skʼoplal, jaʼ yuʼun ya xboon ta jlumal yuʼun ya skʼoponik-euk te jfamiliae». Ayniwan 500 kilómetro (ayniwan oxeb kʼajkʼal sbelal) ta banti kuxinem te sfamilia te winik ini. Cheb u ta patil, chaʼsujt te winik sok jich la yal: «Ta jlumal lajix skʼoponbelik spisil te junetike sok bayal la smulanik te bin ya yale. La staik ta nopel te ya skʼan ya x-ochik ta testigo yuʼun Jehová. Pero ay cheʼoxeb te bin ya sjojkʼoyik. Jich bitʼil, ya snaʼik te ya skʼan ya yichʼik mulel stejkʼelik te kʼalal ya yichʼik jaʼe. Pero ta lugar te banti nainemik maʼyuk mukʼul jaʼ tey-a. Jaʼ yuʼun, ¿yabal skʼan ya yal-abi te liʼto ya xtalike?». Te hermanoetike la sleik jtul precursor te ya xkʼopoj ta skʼop te winike. Teyto-abi spisil-ora ya xkʼopojik.

 ¡Kʼax tʼujbil ta ilel te carritoetik ya yichʼ tuuntesel yuʼun ya spuk ta alel te lek yachʼil kʼop ta swolol Balumilal! (Mateo 24:14). Wokolayal te majtan takʼin la yichʼ akʼel ta swolol Balumilal ya xjuʼ ya yichʼ pasel te carritoetik te ya yakʼik ta ilel te publicación kuʼuntike, bayal buelta ya yichʼ akʼel ta donate.pr418.com. ¡Kʼax wokolawalik yuʼun te yutsil awoʼtanike!