Te Testigoetik yuʼun Jehová ya spasik aʼteliletik ta swenta Dios sok yakʼel koltayel ta stojol ants winiketik, te kʼaxem ta 200 nacionetik sok territorioetik. Pero jaʼnax 35 nacionetik ya xjuʼ stojik te bin ya xtuun yuʼunik ta swenta te majtan takʼin ya yakʼ te hermanoetike. Jich yuʼun ¿bin ya xkʼot ta pasel ta lugaretik te banti maʼyuk lek stakʼinike?

 Te Cuerpo Gobernante yuʼun te Testigoetik yuʼun Jehová ya yil ta lek te aʼteliletik sok te bin ya xtuun ta swenta yichʼel ta mukʼ Dios yuʼun te Testigoetik ta swolol Balumilal. Te majtan takʼin te ya yichʼ akʼele ya yichʼ tuuntesel ta lek. Teme ta jun sucursal ya yichʼ akʼbeyel bayal takʼin pero ma xlaj stuuntesel, ya yakʼbey yan sucursal te takʼin yuʼun jaʼ ya stuuntes. Jich ya jpastik melel jaʼ ya jtʼunbeytik stalel te sbabial jchʼuunjeletik, te la stuuntesik te takʼin te maba tuun yuʼunik, swenta ya skoltayik te yantik jchʼuunjeletik te maʼyuk lek stakʼinik swenta jich pajal ay bin ay yuʼunik (2 Corintios 8:14).

 ¿Bin yaʼiyel ya yaʼiy sbaik te hermanoetik te ya x-akʼbotik te takʼin, te ma xlajix ta tuunel yuʼun te yantik sucursaletik? Ta lum Tanzania, jteb ma spisil te yajwal te lum-abi, te ma sta 40 peso (2 dólar) ya stuuntesik ta jun kʼajkʼal, jaʼ la yichʼ tuuntesel te takʼin ta swenta yachʼubtesel sNail Tsoblej yuʼun te Congregación Mafinga. Te hermanoetik yuʼun te congregación ini jich la yalik: «Kʼalal la yichʼ achʼubtesel te sNail Tsoblej, mo te yajtalul te machʼatik ya xkʼotik ta tsoblej. Ya kalbeytik bayal wokolayal te organización yuʼun te Jehová sok te hermanoetik ta swolol balumilal yuʼun te yutsil yoʼtanik, ta ora ini ayix kuʼuntik jun tʼujbil sNail Tsoblej yuʼun ya kichʼtik ta mukʼ te Jehová».

 Ta swenta te chamel Coronavirus ay chaʼoxtul hermanoetik ta Sri Lanka maʼyuk lek sweʼelik. Jich bitʼil te hermana Imara Fernando sok te schʼin kerem, te sbiil Enosh. Pero, wokolayal te takʼin te la yakʼik te yantik nacionetik, la yichʼik akʼbeyel te koltayel te bayal ya xtuun yuʼunike. Patil la stsʼibayik jun tarjeta, te banti jich ya yal: «Ya kalbeytik bayal wokolayal te hermanoetik te la yakʼbotik ta ilel skʼuxul yoʼtanik ta yorail tulan wokol. Kʼax tseʼel koʼtankotik yuʼun te ayotik ta familia ini, sok ya jkʼanbeytik ta oración te Jehová te akʼa skoltay spisil te hermanoetik ta skaj te ayotik ta kuxinel ta slajibal kʼajkʼal».

 Chikan bayuk ayik te kermanotaktik, spisilik ya smulanik yakʼel te bin ay yuʼunike. Jich bitʼil te Enosh, jaʼnix ta stukel la spas chʼin caja banti ya yotses te sdonacion yuʼun jich ya skoltay te familiaetik te ya xtuun yuʼunike. Jaʼnix jich te Guadalupe Álvarez bayal yutsil yoʼtan, te nainem ta jun lugar ta México banti jteb ma spisil te ants winiketik maba ya staik lek stakʼinik sok jtebnax ants winiketik te ya xtojotik ta lek. Manchukme jich-abi, ya spas tulan ta yakʼel koltayel. Te Guadalupe jich ya yal: «Ya kalbey wokol te Jehová yuʼun te skʼuxul yoʼtan sok te slekil yoʼtan. Kʼoem ta koʼtan te jdonacion sok te yuʼun te yantik hermanoetik ya xtuun ta yakʼbeyel koltayel te hermanoetik te ayik ta wokole».

 Te sucursaletik te ya stikunik bael takʼin kʼax tseʼel yoʼtanik te jich ya xjuʼ ya spasik. Te hermano Anthony Carvalho, te ya x-aʼtej ta Comité yuʼun Betel ta Brasil jich ya yal: «Ta bayal jaʼbil, yantik sucursaletik la stikunbotik tal koltayel ta swenta takʼin». «Wokolayal te koltayel la yakʼike, bayal bin juʼem kuʼuntik spasel ta kaʼteltik. Ta ora ini, jelonix te bin-utʼil ayotik ta swenta te takʼin, sok ya xjuʼ ya jkoltaytikix te yantik sucursaletik. Te hermanoetik ya snaʼik te ya yichʼ cholel te skʼop Dios ta swolol balumilal sok ya snaʼik te ya xjuʼ xkoltaywanik bitʼil jnopojeletik yuʼun Cristo».

 ¿Bin-utʼil ya xjuʼ skoltay te yantik hermanoetik te Testigoetik yuʼun Jehová te yak ya kʼaxel swokolike? Te bin ya skʼan ya spasik jaʼ te ya yakʼik sdonacionik ta obra mundial, ma jaʼuk te ya stikunik ta yan sucursaletik o yan nación te stakʼinik. Ya xjuʼ ya yakʼ te sdonacionik ta congregación ta caja ta banti ya yal «Obra Mundial» o ta página donate.pr418.com. Spisil te adonacionik kʼax mukʼ skʼoplal.