Te Jesús jich la yalbey te jnopojeletik: «Testigo ya xcʼohex cuʼun [...] cʼalal ta stiʼil bahlumilal» (Hechos 1:8). Te Testigoetik ya spasik tulan ta skʼotesel ta pasel sok stseʼelil yoʼtanik te aʼtelil-abi. Manchukme jich ya jpastik, ay lugaretik te banti ma jcholojtik skʼop Dios, jich bitʼil te mukʼul lugaretik te bayal ants winiketike. Jaʼnix jich, ay nacionetik te maʼyuk bayal Testigoetik tey-a (Mateo 9:37, 38). ¿Bin yakotik ta spasel yuʼun bayalxan ants winiketik ya jcholbeytik skʼop Dios?

 Swenta ya xkʼot ta pasel te mantalil la yal te Jesuse, te Comité yuʼun Servicio yuʼun te Cuerpo Gobernante yuʼun te stestigotak te Jehová ya stikun misioneroetik te banti ya skʼan cholelxan skʼop Dios. Ta kʼajkʼal ini, ay 3,090 misioneroetik te ya x-abatinik ta swolol Balumilal. a Jteb ma spisilukik yichʼojik pʼijubtesel ta escuela, jich bitʼil ta Escuela yuʼun Evangelizador. Te misioneroetik-abi yijkitayojik snaik sok baemik ta yan nación. Te bitʼil tulan te schʼuunel yoʼtanik, te pʼijubenik ta lek sok ay experiencia yuʼunik, jich ya xkoltaywanik ta scholel skʼop Dios sok ya yakʼik ta ilel lekil ejemplo ta stojol te machʼatik ochelikto ta organización.

 Ta jujun Betel, te Sección yuʼun te Departamento yuʼun Servicio jun-nax ya x-aʼtej sok te Comité yuʼun Betel, swenta ya yilik te bin ya xtuun yuʼunik te misioneroetik. Ya x-akʼbotik te banti ya x-nainik, ya xkoltayotik te kʼalal ya stsajkik ta chamel sok ya yichʼik akʼbeyel jtebuk stakʼinik yuʼun ya smanik te bin ya xtuun yuʼunik. Ta jaʼbil 2020, te testigoetik yuʼun Jehová jteb ma sta 27 millón yuʼun dólar slajinojik ta stojol te misioneroetik. Ta swenta te koltayel-abi, te misioneroetik jaʼ ya xbajt ta yoʼtanik scholel skʼop Dios sok ya yakʼbeyik yip yoʼtanik te hermanoetik ta congregación.

 ¿Bin-utʼil ya xkoltaywanik te misioneroetik ta scholel skʼop Dios? Te hermano Frank Madsen, te ya x-aʼtej ta Comité yuʼun Betel ta Malaui, jich ya yal: «Te bitʼil ma xiwik sok te ya snaʼik ta lek scholel skʼop Dios te misioneroetik, skoltayoj te congregacionetik yuʼun ya scholik skʼop Dios te banti wokolxane, jich bitʼil ta lugaretik te namal ayik sok te ya xkʼopojik ta yantik kʼopiletik. Ya spasik tulan ta snopbeyel te scostumbreik sok ya snopbeyik te skʼopike, jaʼ lekil ejemplo ta stojol te yantike. Jaʼnix jich, ya stijbeyik yoʼtan te jchʼieletik yuʼun ya x-abatinik ta tiempo completo. Ya kalbeytik wokol te Jehová te bitʼil ay misioneroetik».

 Jtul hermano te ya x-aʼtej ta Comité yuʼun Betel ta yan nación jich ya yal: «Te misioneroetik ya yakʼik ta ilel te jun-nax ya x-aʼtejotik te testigootik yuʼun Jehová ta swolol Balumilal. Te machʼatik ma Testigouk ya staik ta ilel te jun-nax ayotik manchukme yanyantik te jcostumbretik. Te bin ya jnoptik ta Biblia, jaʼ ya yakʼ te jun-nax ayotik ta swolol Balumilal».

 Te misioneroetik, ¿bin-utʼil ya skoltayik te publicadoretik? Te Paulo, te ay ta Timor Oriental, ya yal bayal wokol te ya xkoltaywanik te misioneroetik ta scongregacion. Jich ya yal: «Kʼux kʼajkʼal te banti yakotik ta kuxinel. Manchukme talemik ta sikil kʼinal te misioneroetik, ma jaʼuk ya xkomotik yuʼun te kʼux kʼajkʼale. Jujun sab ya x-ayinik ta tsoblej yuʼun scholel skʼop Dios sok ta olil kʼajkʼal ay baeltik ya xjilik ta spasel revisitaetik, manchukme kʼux kʼajkʼale. Jaʼnix jich ya scholik skʼop Dios ta mal kʼajkʼal. Bayal machʼatik skoltayojik yuʼun ya snaʼbeyik sba te Jehová, jich bitʼil te joʼone. Sok sbujtsʼ yoʼtan ya x-abatinik ta stojol te Jehová, jaʼnix jich ya stijbey yoʼtan te hermanoetik ta congregación yuʼun jichuk ya spasik-euk».

 Jtul precursora regular ta Malaui, te Ketti sbiil, ya schol kaʼiytik bin-utʼil koltayot te sfamilia yuʼun jtul hermano sok te yinam te jaʼik misioneroetik: «Kʼalal kʼotik ta congregación, joʼon-nax Testigoon ta jfamilia. Bayal la skoltayonik sok la yamigoinik te jfamilia. Te alaletik kuʼun kʼot ta yoʼtanik te ya yakʼ stseʼelil oʼtanil te ya x-abatinotik ta stojol te Jehová. Ta swenta te lekil ejemplo yuʼunik, ochik ta precursora regular te oxtul achʼixetik kuʼun jaʼnix jich te jmamalal ya xkʼotix ta tsoblejetik».

 ¿Banti ya yichʼ tael te takʼin yuʼun ya yichʼ koltayel te misioneroetik? Jaʼ ta swenta te majtan takʼin ya yichʼ akʼel ta obra mundial. Bayal machʼatik ya yakʼik ta donate.pr418.com. Wokolawalik yuʼun te yutsil awoʼtanike.