Te mukʼul tsoblej yuʼun oxeb kʼajkʼal 2020 ma xchʼay ta koʼtantik te bitʼil la yichʼ pasel. Pajalnix te programa la spasik grabar yuʼun ya yichʼ ilel ta swolol Balumilal sok la smoesik ta Internet. Pero spisil te hermanoetik ta Malaui sok ta Mozambique, juʼ yilbelik te mukʼul tsoblej manchukme maʼyuk Internet. ¿Bin-utʼil-a te jich kʼot ta pasele?

 Te Comité yuʼun Coordinadoretik sok te Comité yuʼun Enseñanza yuʼun te Cuerpo Gobernante, la yalik te ya yichʼ kʼasesel ta radio sok ta televisión te mukʼul tsoblej yuʼun oxeb kʼajkʼal ta Malaui sok ta Mozambique. ¿Bin yuʼun te jich la yichʼ pasele? Ta Malaui, jaʼ kʼax toyemxan stojol te datoetik yuʼun Internet ta swolol Balumilal. Jaʼ yuʼun te testigoetik yuʼun Jehová ta nación-abi, maʼyuk bayal machʼatik ay Internet yuʼunik. Te hermano William Chumbi, te ya x-aʼtej ta Comité yuʼun Betel ta Malaui, jich ya yal: «Ta swentanax te radio sok te televisión ya xjuʼ ya yaʼiyik te skʼop Dios te hermanoetik». Te hermano Luka Sibeko te ya x-aʼtej ta Comité yuʼun Betel ta Malaui, jich ya yalxan: «Manchukme ay te radio sok te televisión, maʼyuk bayal hermanoetik la yaʼiyik stojol te mukʼul tsoblej ta jterritoriotik». Ta Mozambique jichnix kʼot ta pasel. Bayal hermanoetik ma xjuʼ yuʼunik smanel celularik sok stableik o yantikxan aparato, jaʼuktobalix-a te ya stojik Internet.

 Ta skaj te COVID-19, ay estación yuʼun radio sok televisión te yakik ta skʼasesel te tsoblejetik ta jujun semana. a Te hermanoetik la skʼanbeyik te yajwal radio sok te televisión te yakuk yakʼik bayal ora yuʼun ya yichʼ kʼasesel te mukʼul tsoblej yuʼun oxeb kʼajkʼal.

 Te hermanoetik ta Malaui, jaʼnix jich la sitintayik te wokolil-abi. Te estación yuʼun radio sok televisión jaʼnax ya yakʼ kʼaxuk jun ora te programaetik, melel ma skʼan te ya xchʼajubik ta yaʼiyel te ants winiketik teme najt te programaetike. Pero te hermanoetik la scholbeyik yaʼiy te jaʼ ta swenta skoltayel te ants winiketik. Manchukme ma xlokʼ ta snaʼik te ants winiketik, pero ya xjuʼ ya yaʼiyik te lek yachʼil kʼope. Jaʼme ya xkoltayotik yuʼun lekil ants winiketik ya xkʼotik sok ay stseʼelil yoʼtanik ta sfamiliaik. Te kʼalal la yaʼiyik te bin la yichʼik albeyel yuʼun te hermanoetik, la yakʼik te ya xkʼax bayal ora te programaetik.

 Ta Malaui, jun estación yuʼun radio sok televisión la skʼasesik te mukʼul tsoblej yuʼun oxeb kʼajkʼal. Te schebal estación ya xkʼot yip ta spamal te nación-abi. Ta Mozambique, 85 estación yuʼun radio sok jun canal yuʼun televisión la yichʼ kʼasesel te mukʼul tsoblej.

 Ta schebal nacionetik kʼaxemniwan 564,500 peso (28,227 dólar) b la yichʼ lajinel yuʼun ya yichʼ kʼasesel te mukʼul tsoblej ta televisión sok jteb ma sta 400,000 peso (20,000 dólar) yuʼun ya yichʼ kʼasesel ta radio. Ma pajaluk la yichʼ tojel te radio yuʼun la yichʼ kʼasesel te mukʼul tsoblej, ayniwan la yichʼ tojel 300 peso sok 55,000 peso (15 sok 2,777 dólar) jaʼ chikan bantito kʼalal ya xkʼot señal yuʼun te radio.

 Te hermanoetik la snaʼik stuuntesel ta lek te majtan takʼine. Ta Malaui, la spasik tulan te hermanoetik ta stael estación yuʼun radio sok televisión te ma toyoluk ya stojike. Ay la staik 30 porciento te la skoesbeyik stojol sok ayniwan 34,200 peso (1,711 dólar) te ma la yichʼ lajinele. Ta Mozambique ay cheʼoxeb estación te la skoesbeyik stojol ta skaj te lek stalelik te testigoetik yuʼun Jehová sok te oranax ya stojike.

 Te hermanoetik ya yalik wokol yuʼun te la schʼam yaʼiyik o la yilik te mukʼul tsobleje. Te Patrick te jaʼ anciano ta congregación ta Malaui, jich la yal: «Ya kalbeytik wokol te Cuerpo Gobernante te jich la yakʼ ta pasel ta jtojoltik ta yorail te tulan chamel». Yan hermano te ay ta Malaui, te Isaac sbiil, jich la yal: «Maʼyuk yantik aparatoetik kuʼuntik. Jich yuʼun ya kaltik wokol te la kaʼiytik stojol te mukʼul tsoblej ta radio. Jaʼ jun mukʼul majtanil la yakʼbotik te organización yuʼun Jehová. Ta swenta te jich la yichʼ pasele, te jfamilia la yaʼiy stojol te programa. Ya schʼuun koʼtantik te Jehová kʼux ta yoʼtan te lum yuʼune».

 Jtul publicador ta Mozambique, kʼot ta sbabial buelta ta mukʼul tsoblej yuʼun oxeb kʼajkʼal 2020. Jich la yal: «Kʼalal la kil te mukʼul tsoblej ta televisión, jul ta koʼtan te jaʼ Jehová te Machʼa spisil ya xjuʼ yuʼune. Manchukme ay tulan chamel maʼyuk bin makot te Jehová yuʼun ya yakʼbotik te weʼelil ta swenta skʼop Dios sok la kichʼtik akʼbeyel ta jnatik. Jamal la kil te kʼux ya yaʼiy sbaik te j-abatetik yuʼun Jehová sok ya schʼuun koʼtan te jaʼ smelelil religión».

 Jtul anciano ta congregación te Wyson sbiil, jich la yal: «Ya kalbey wokol te j-abat te jun yoʼtan sok pʼij te ya skoltayotik ta yorail te tulan chamel. Maʼyuk bayal bin ay kuʼuntik sok yakotik ta kuxinel ta jun nación te banti kʼax pobre te ants winiketike. Ta swenta te la kaʼiytik stojol te mukʼul tsoblej ta radio sok ta televisión, la jmulantik sok bayal bin lek lokʼ kuʼuntik-a».

 Te Comité yuʼun Coordinadoretik sok te Comité yuʼun Enseñanza la yalik te ya yichʼ kʼasesel te mukʼul tsoblej yuʼun oxeb kʼajkʼal 2021 ta chaʼoxchajp lugaretik ta radio sok ta televisión. ¿Banti ya yichʼ tael te takʼin swenta ya yichʼ tojel te programa ya xkʼax ta radio sok ta televisión? Jaʼ te majtan takʼin te ya yichʼ akʼel ta swenta te obra mundial te yanyantik bin-utʼil ya yakʼik ta donate.pr418.com. Wokolawalik yuʼun te yutsil awoʼtanike.