Te testigootik yuʼun Jehová ya jmel koʼtankotik ta stojol te kermanotaktik (1 Pedro 2:17). Jichwan ya kaʼiy jbatik bitʼil te Tannis, jtul hermana te ay ta Kenia te jich ya yal: «Ya jmulan snaʼel te bin yak ta kʼaxel ta stojol te kermanotak». ¿Bin-utʼil ya jnaʼtik te bin yak ta kʼaxel ta stojol te kermanotaktike? Jaʼ ta swenta te sección «Noticia», yuʼun te jw.org te lokʼ ta 2013.

 Ta sección ini ya yalbey skʼoplal te proyectoetik yuʼun construcción, te skoltayel te ants winiketik sok te bintik mukʼ skʼoplal ya yichʼ akʼel ta naʼel, jich bitʼil te kʼalal ya xlokʼ te yachʼil Biblia. Jaʼnix jich ya yalbey skʼoplal ta swenta te hermanoetik te ya yichʼik chukel. Soknix ya jtatik experienciaetik ta swenta te campañaetik yuʼun scholel skʼop Dios sok te Snaʼojibal slajel te Jesuse. ¿Pero bintik-a te ya yichʼ alel ta noticiaetik-abi, machʼatik ay ta swenta yakʼel ta naʼel sok bin-utʼil ya schajpanik?

 Te Oficina yuʼun te Información Pública, jaʼ ay ta swenta spasel te sección yuʼun «Noticia». Te departamento ini te ay ta central mundial ya x-aʼtej sok te Comité yuʼun te Coordinadoretik yuʼun te Cuerpo Gobernante, ay hermanoetik sok hermanaetik te ya xkoltaywanik kʼalalto ta snaik te kʼaxemniwan ta 100 ta tul. Te hermanoetik ini ya stsʼibayik, ya slebeyik skʼoplal, ya skʼasesik ta yan kʼopil sok ya schajpanik ta lek. Jaʼnix jich ya xkʼopojik sok te machʼatik mukʼ yaʼtelik sok te machʼatik ya xpʼijubteswanik ta universidadetik. Jaʼnix jich kʼaxem ta 80 seccionetik yuʼun te Información Pública te ayik ta sucursaletik ta swolol balumilal ya xkoltaywanik ta departamento ini.

 Te Oficina yuʼun Información Pública, jun yoʼtan ya x-aʼtej sok te seccionetik yuʼun te Información Pública yuʼun ya schajpanik jun noticia. Kʼalal te hermanoetik ya yaʼiybeyik skʼoplal te ay bin kʼoem ta pasel te ya xjuʼ ya xkʼot bitʼil noticia, ya slebeyik skʼoplal ta lek. Yuʼun lek ya xlokʼ-a te noticiae, ya spasik entrevistaetik o ya xkʼopojik sok te machʼatik pʼijubenik ta lek. Kʼalal slebeyojikix skʼoplal ta lek-a, ya stsʼibayik, ya spasik editar sok ya yilik ta lek. Ta patil ya yotsesik fotoetik sok ya stikunbeyik bael te Comité yuʼun te Coordinadoretik jaʼ ya yilik teme leke.

 ¿Bin ya yalik chaʼoxtul hermanoetik ta swenta te sección yuʼun «Noticia»? Jtul hermana te Cheryl sbiil, te kuxinem ta Filipinas, jich ya yal: «Ta jujun sab ya jmulan skʼoponel noticiaetik ta swenta te organización sok te kermanotake».

 Bayal ta tul ya smulanik yilel te noticiaetik te ayik ta jw.org, melel maba pajal sok te yantik noticiaetike. Te Tatiana te ay ta Kazajistán, jich ya yal: «Ay skʼoplal ta koʼtan te noticiaetik yuʼun te jw.org, melel jaʼ ya yalik te bin smelelil». Jtul hermana te Alma sbiil te ay ta México, jich ya yal: «Te banti ya xkʼaxik te yantik noticiaetik bayal bin ma lekuk ya xkʼax tey-a, pero te noticiaetik te ay ta página kuʼuntik ya yakʼ bayal smukʼul koʼtantik».

 Te sección yuʼun «Noticia», ma jaʼuknax ya yalbotik te bin ya xkʼot ta pasel, jaʼnix jich ya smukʼubtes te schʼuunel koʼtantike. Te Bernard te ay ta Kenia, jich ya yal: «Wokolayal te noticiaetik ni ya kilix te hermanoetik jich bitʼil jfamilia, chikan banti ayik. Kʼalal ya jkʼopon te Jehová ya kaltiklanbey sbiil, soknix ya kalbey te bintik yak ta kʼaxel ta stojolike». Te Bybron jtul hermana te kuxinem ta Kenia, jich ya yal: «Kʼax tseʼel koʼtan ya kaʼiy te kʼalal ya kil jun artículo te ya yalbey skʼoplal te la yichʼ kʼasesel ta yan kʼopil te Biblia. Ya sjultesbon ta koʼtan te kʼuxotik ta yoʼtan ta jpisiltik te Jehová».

 Jaʼnix jich te noticiaetik ta stojol te kermanotaktik te yak yichʼbelik utsʼinel, ya xjuʼ ya yakʼ smukʼul koʼtantik. Ilawil te bin ya yal te hermana Jackline te kuxinem ta Kenia: «Kʼalal ya jnop ta koʼtan te maʼyuk xiwelik, ya yakʼ te ya stsakxan yip ta lek te schʼuunel koʼtan. Spisil-ora ya jlebey skʼoplal bin-a te koltayotik yuʼun ta stsʼikel te swokolike. Te bin koltayotik yuʼun te hermanoetik, jaʼ te oración, te skʼoponel te Biblia sok te kʼayojiletike».

 Jtul hermana ta Costa Rica te Beatriz sbiil, ya yal wokol yuʼun te noticiaetik te ya yalbey skʼoplal te kʼalal ya xkʼax jun wokolil: «Chajpnax ya kil-a te bitʼil te organización ya skoltay ta oranax te hermanoetik te ya xkʼax swokolike. Ya spasik sok skʼuxul yoʼtanik sok leknax te bin-utʼil ya spasike. Ya yakʼbon kil te yuʼunix jaʼ-a te organización yuʼun te Jehová».

 ¡Ya kaltik wokol yuʼun te bitʼil ay ta página kuʼuntik, te sección yuʼun «Noticia»! Ta swenta te noticiaetik ini, ya jnaʼtik te bintik yak ta kʼaxel ta stojol te kermanotaktik ta swolol Balumilal. Spisil ini ya xjuʼ ta pasel ta swentanax te majtan takʼin ya awakʼik ta donate.pr418.com. Bayal wokolawalik yuʼun te slekil awoʼtanike.