Bayal ta jpam lumetik te j-aʼtel patanetik yalojik ta mantal, te ants winiketik ma xjuʼ ya slakʼ sbaik sok skomojik te tsoblejetik. Te Testigoetik yuʼun Jehová ya jkʼan ya jchʼuuntik te bin yalojike yuʼun jich ya jkanantay jbatik, pero maba ya skʼan te ya jkejchantik ta stsobilanel jbatik. Jaʼ yuʼun te congregacionetik yak stuuntesbelik te Zoom yuʼun ya yil sbaik ta video ta jujun tsoblej.

 Te Cuerpo Gobernante la yal te ya xjuʼ ya yichʼ tuuntesel te majtan takʼin yuʼun ya yichʼ manel cuentaetik yuʼun Zoom ta stojol te congregacionetik. Jaʼ ini skoltayoj bayal congregacionetik te ma xjuʼ yuʼunik stojel jteb ma sta 300 o 400 peso (15 o 20 dólar) stojol te cuentaetik ini. Te congregacionetik ini jaʼ bayal ya stuuntesik-a te Zoom te ma tojbiluk pero ma bayal tiempo ya xjalaj sok ma bayal machʼa ya xjuʼ ya x-och. Jaʼnix jich ma mero seguro te tsoblejetik. Spisil te congregación te ya stuuntesik te cuenta yuʼun Zoom te tojbil yuʼun te organización, ya xjuʼ ya skanantay sbaik kʼalal stsoboj sbaik sok ma ajtaybiluk te jaytul ya xjuʼ x-ochik ta tsoblej. Ta ora ini, kʼaxem ta 65,000 congregacionetik yakik ta stuuntesel te Zoom te tojbile kʼaxem ta 170 jpam lumetik.

 Te congregación Kairagi, yuʼun te lum Manado (te ay ta provincia yuʼun Célebes Septentrional, Indonesia), jaʼ la yijkitayik stuuntesel te aplicación te ma tojbiluk sok jaʼ la skʼanik te cuenta yuʼun te Zoom te ya stoj te organización. Te hermano Hadi Santoso ya yal: «Te hermanoetik te ma mero ya snaʼik stuuntesel te tablet sok te celularetik ya xjuʼ smulanik te tsoblejetike, melel maba jujuntsʼin ya spasulan sbaik conectar ta jujun tsoblej».

 Te Lèster Jijón hijo, jaʼ jtul anciano ta congregación Guayacanes Oeste, ta Guayaquil (Ecuador), jich la yal: «Jich bitʼil te hermanoetik maʼyuk lek stakʼinik, bayal congregacionetik maniwan xjuʼ yuʼunik stojel jun cuenta yuʼun Zoom sok te ya yakʼ te spisilik ya x-ayinik ta tsoblej. Pero, jokoyal te organización yuʼun te Jehová, yakʼbeyoj jun cuenta yuʼun Zoom te congregacionetik swenta jun-nax ya x-ayinik ta tsoblejetik. Jaʼ yuʼun ya xjuʼ ya jpastik invitar chikan jayeb ta jtul ants winiketik ta jtsoblejtik».

 Johnson Mwanza, jtul hermano yuʼun te congregación Norte Ngwerere, yuʼun te lum Lusaka, (Zambia), jich la stsʼibay: «Bayal buelta, te hermanoetik jich yalbeyejotik: ‹Te Zoom te ya stoj te organización ma jaʼuknax nopol ya kaʼiy jbatik ta stojol te hermanoetik, jaʼnix jich ya kiltik te skʼuxul yoʼtan sok te yutsil yoʼtan te Jehová ta jtojoltik›».

 Te takʼin te kʼejbil te ya yichʼ tuuntesel kʼalal ay bin ya xkʼax te ya xlajinwan jilele jaʼ la yichʼ tuuntesel yuʼun ya yichʼ manel te cuentaetik yuʼun te Zoom. Te takʼin ini, ya yichʼ tael jaʼ wokolayal te majtan takʼin te ya yichʼ akʼel ta swenta te obra mundial. Te majtan takʼin ini jaʼ te ya yichʼ pasel ta donate.pr418.com. Kʼax wokolawalik te ya apasik tulan ta yakʼel te majtan takʼine, melel jaʼnix jich ya yichʼ tuuntesel ta yakʼel koltayel kʼalal ya xkʼax te bin ya xlajinwan jilel ta swolol te Balumilale (2 Corintios 8:14).