Te videoetik yuʼun te mukʼul tsoblejetik ya xkʼot ta koʼtantik sok ya skoltayotik ta yichʼbeyel swentail te Biblia. Ta mukʼul tsoblej ta oxeb kʼajkʼal 2020, te sbiilinej «¡Tseʼeluk awoʼtanik spisil-ora!». Yichʼoj 114 videoetik, banti 43 jaʼ discursoetik yuʼun te Cuerpo Gobernante sok te jkoltaywanej yuʼunike. ¿Anaʼojbal jayeb aʼtel yichʼoj sok jayeb takʼin ya skʼan yuʼun ya xjuʼ te videoetike?

 Ayniwan 900 ta tul hermanoetik ta swolol balumilal la yakʼ stiempoik sok spʼijilik yuʼun ya yichʼ pasel te programa yuʼun te mukʼul tsoblej ini. Ta cheb jaʼbil te jalaj ta pasel te aʼtel ini, jteb ma sta 100,000 ora aʼtejik ta spasel. Ta spisil, 70,000 ora la yichʼ tuunel ta swenta pasel te película, te ya xjalaj 76 minuto te sbiilinej Nehemías: Te tseʼel-oʼtanil yuʼun Jehová ya yakʼ yip koʼtantik.

 Nopa ta swenta skanantayel spisil te voluntarioetik, te spasel te bintik ya yichʼ tuunel, sleel te equipo yuʼun spasel te video, sok te naetik te banti ya yichʼ pasel te aʼtelil ini, bayal la yichʼ lajinel takʼin yuʼun.

 Te Jared Gossman, te jaʼ ay ta swenta te Audio sok Video, jich ya yal: «Te Comité yuʼun Enseñanza yuʼun te Cuerpo Gobernante, ay skʼoplal ta yoʼtan te bayal ta chajp tsʼumbaliletik sok lugaretik te yakuk xchiknaj ta videoetik kuʼuntik. Jich ya xchiknaj ta ilel te yan yantik stsʼumbal te hermanoetik ta swolol balumilal. Te kʼalal la yichʼ pasel aʼtejik 24 equipo te talemik ta 11 nacionetik, te jun-nax aʼtejik ta swenta te proyecto internacional, yuʼun ya xkʼot ta pasel ini bayal bintik tuun, la yichʼ chajpanel ta lek sok komon aʼtel».

 Ta spasel bayal te videoetik kuʼuntik la yichʼ tuuntesel lekil equipoetik sok yanyantik te bitʼil la schʼalik. Jun ejemplo, kʼalal la yichʼ pasel te película Nehemías: Te tseʼel-oʼtanil yuʼun Jehová ya yakʼ yip koʼtantik, la yichʼ pasel te schʼalel tey ta yutil snaul grabación ta Mount Ebo, ta stsʼeel Patterson (Nueva York). Yuʼun leknax ya yichʼ tuuntesel te majtan takʼin sok jichuknix ya yichʼ pasel te bitʼil te nameyix yilele, te hermanoetik la spasik te tsʼajkʼetik te maba alik te jichuk nix yilel te bitʼil antiguo lum Jerusalén. Jujun pajkʼ ay 6 metro stoyolil, sok pasbil ta teʼ sok ay bin potsbil-a te jich yilel bitʼil ton. Spisil ini ya xjuʼ ta jeltaybeyel yawil yuʼun yanyantik yilel lugaretik ya yichʼ pasel-a, yuʼun jich ma bayal ya yichʼ pasbeyel schʼalel-a. Manchukme jich, te bitʼil jaʼnax la yichʼ pasel ini la yichʼ lajinel jteb ma sta 2 millón peso (100,000 dólar). a

 Ta swenta spisil ini, ya yakʼ ayuk skʼoplal ta koʼtantik te mukʼul tsoblej yuʼun oxeb kʼajkʼal yuʼun te jaʼbil ini. Kʼoem ta koʼtantik te spisil te bin ya yichʼ pasel ya yakʼ ta ichʼel ta mukʼ te Jehová ta swolol Balumilal. Wokolawalik yuʼun te amajtan takʼinik te ya awakʼik sok yutsil awoʼtanik ta swenta te aʼtelil ta swolol Balumilal ta donate.pr418.com sok ta yantikxan.