Ta sjajchibal te marzo yuʼun 2022 la yichʼ akʼel te noticia ini ta jw.org: «Ta 1 yuʼun abril, te congregacionetik ta swolol Balumilal ya xjajch stsobix sbaik ta sNail Tsoblej yuʼun ya spasik te tsoblejetik ta olil semana sok ta slajibal semana, jaʼnax teme ayix permiso yuʼun te j-aʼtel patanetik ta jlumaltik». Kʼax tseʼel koʼtantik te testigootik yuʼun Jehová ta swenta te bin la yichʼ kʼoponele. Pero mato lajem skʼoplal-a te chamele. a Swenta ya yichʼ kanantayel te machʼatik ya xkʼotik ta tsoblejetik, ya skʼan te ay bintik ya yichʼ tuuntesel. Te bitʼil ayix cheb jaʼbil te maba ya jtsob jbatik ta sNail Tsoblejetik, ¿bin-utʼil la yichʼ chajpanel ta lek?

 Te hermanoetik bayalix u yakik ta schajpanel sbaik yuʼun jich ya yichʼix pasel-a te tsoblejetik.

 Ta 2020, jun u ta patil te kʼalal la yichʼ alel te ma xjuʼ ya jtsobix jbatik ta sNail Tsoblejetik, te Departamento Mundial yuʼun Diseño sok Construcción te ay ta Warwick, Nueva York, jajch yilik bin-utʼil ya yutsʼin te sNail Tsoblejetik te chamel COVID-19 sok bintik la skʼan pasel yuʼun ya xjuʼ ya jtsob jbatik-a.

 Yanyantik-a te bin yak ta kʼaxel ta jujun lugar. Te Matthew De Sanctis, te ya x-aʼtej ta Departamento Mundial yuʼun Diseño sok Construcción, jich la yal: «Ay lugaretik te banti wokol ta tael te banti ya jpok jkʼabtik. Teme maʼyuk jaʼ ta sNail Tsoblej, ya yichʼ manel o ya yichʼ ichʼel tal ta mukʼul jaʼ o ta jun pozo. Ay lugaretik te banti te j-aʼtel patanetik la sjelontesik te bin-utʼil ya yichʼ tuuntesel te aire acondicionado, te bin-utʼil ta tuuntesel ta lek te ikʼ sok te letreroetik te banti ya yal te bin-utʼil ya skʼan ya jkanantay jbatik».

 ¿Bin la spasik te hermanoetik? Te Matthew la yal «te bayal sNail Tsoblejetik la snaʼik bin-utʼil ta chajpanel te ma bayal stojol ya xlokʼ, pero te bayal ya xtuun». Jich bitʼil te kermanotaktik ta Papúa Nueva Guinea, la sleik te bin-utʼil ya xjuʼ ya spok skʼabik, la stuuntesik garrafonetik yuʼun 20 litro te la yakʼbeyik sllaveul yuʼun ya xjuʼ ya yichʼik-a te jaʼe te lokʼniwan ta 800 peso stojol. Jaʼnix jich, ta África la yichʼ manel kʼaxem ta 6 mil spojkil kʼabal te talemik ta Asia.

 Ay sNail Tsoblejetik te banti la yichʼ akʼel ventiladoretik o aire acondicionado yuʼun jich ya xbeen ta lek-a te ikʼe. Ay bayal congregacionetik te la smanbeyik yok te micrófono yuʼun jich ma stsakik-a te kʼalal ya yakʼ scomentarioik. Jaʼnix jich la spasik tulan yuʼun ya yichʼ kusel ta lek te banti ya yichʼ pikel yuʼun jich ma stsakotik chamel-a. Jich bitʼil te ya jamtik te puerta o te ya jpok jkʼabtik, ay congregacionetik te banti la yakʼik sensoretik ta baño yuʼun stukel ya sjam sok ya smak sba te jaʼe. Ta Chile laniwan slajinik 28 mil peso yuʼun la schajpanik-a te sNail Tsobleje.

 Manchukme jaʼ mukʼ skʼoplal te lek chapaluk te sNail Tsobleje, te hermanoetik tulan aʼtejik yuʼun jich leknax ya stuuntesik-a te majtan takʼine. Ay nacionetik te banti te hermanoetik la skʼanik te koltayel ya yakʼ te ajwalil yuʼun jich ya stojik-a te banti ya yichʼ pokel kʼabal sok te yok te microfonoetik. Jaʼnix jich, te Beteletik la syom sbaik yuʼun bayal ya smanik te biluketik yuʼun jich ma bayal ya slajinik takʼin-a. Te Beteletik sok te Departamento Mundial yuʼun Compra ya skʼoponik te machʼatik ya spasik te biluketik, jich ma kʼax toyol ya stojik sok oranax ya yichʼik akʼbeyel.

 Leknax ya yaʼiy sbaik te machʼatik ya xkʼotik ta sNail Tsoblejetik ta swenta te bintik la yichʼ pasel yuʼun jich ma stsakotik ta chamel-a. Jtul hermana yuʼun Perú, te Dulcine sbiil la yal te la xiʼ jtebuk kʼalal la yaʼiy te ya xchaʼsujtotik ta sNail Tsoblej, jich ya yal: «La stsakon te chamel COVID-19 kʼalal jajchelto-a. Jaʼ yuʼun la jmel koʼtan, melel la jkuy teme ya xboon ta sNail Tsoblej ya xjuʼ ya xchaʼtsakon te COVID-19. Pero te kʼalal kʼoon ta sNail Tsoblej, la kil te bayal bin spasoj te ancianoetik yuʼun ma stsakotik te chamel. Ay te gel antibacterial sok te yok te microfonoetik yuʼun jich ma jtsaktik-a, jaʼnix jich ya yichʼ kusel te sNail Tsoblej kʼalal mato xjajch-a te tsoblej sok te kʼalal ya xlaje. Ta patil ma la jmelix koʼtan, melel lek la kichʼtik kanantayel». b

 Pero yan-a te bin kʼax ta stojol te hermana Sara te kuxinem ta Zambia. Jich la yal: «Ayix tal cheʼoxeb u te laj te jmamalal ta skaj te COVID-19. Ya jmel koʼtan yuʼun-a te bin yaʼiyel ya kaʼiy jba te kʼalal jtukelxanix ya xboon ta sNail Tsoblej». ¿Bin yaʼiyel la yaʼiy sba te kʼalal bajt ta sNail Tsoblej? Jich ya yal: «Te tsoblejetik la yakʼbon kil te maʼyuk bin-ora ya yijkitayotik te Jehová te bitʼil nopolix te slajibal kʼajkʼal. Ta tsoblejetik ya jta smukʼul koʼtan, kʼuxul oʼtanil sok ya skoltayonik te ancianoetik soknix te yantik hermanoetik».

 Bayal hermanoetik ta swolol Balumilal ya yalik wokol yuʼun te ya xjuʼix ya jtsob jbatik ta sNail Tsoblej. Ya kaltik wokol yuʼun te majtan takʼin ya awakʼik te ya yichʼ akʼel ta donate.pr418.com. Jich te hermanoetik leknax ya yaʼiy sbaik kʼalal ya xkʼotik ta sNail Tsoblejetik.