Ta slajibal kʼajkʼal ini, ma yanuk sba ya kaʼiytik-a te ay guerraetik sok te ya kaʼiybeytik skʼoplal te ay guerraetik ta bayuk (Mateo 24:6). Bayal hermanoetik ya xkʼax swokolik yuʼun te guerraetik, pero yananix yichʼik koltayel-a. La yakʼbotik bayal stseʼelil koʼtantik te la kaʼiytik ta Informe 3 yuʼun te Cuerpo Gobernante ta jaʼbil 2022 te bitʼil ta Europa del Este yak ta akʼel te koltayel ta stojol te kermanotaktik te ay swokolik yuʼun te guerra ta Ucrania. ¿Bin-utʼil juʼem yuʼunik yakʼel koltayel manchukme ay guerra? ¿Bin-utʼil ya yaʼiy sbaik te kermanotaktik ta Ucrania yuʼun te koltayel ini?

 Ta 24 yuʼun febrero ta 2022 —te jaʼnix skʼajkʼalel te jach te guerrae—, te Comité yuʼun Coordinadoretik la yalik te ya xjuʼ ta akʼel takʼin ta skoltayel te kermanotaktike. Ta oranax, te Betel ta Ucrania jajch smanik te bintik ya xtuune, sok te 27 ta chajp Comiteetik yuʼun Socorro jajchik ta spukel te biluketike.

 Jaʼnix jich, te hermanoetik ta Betel ta Estados Unidos oranax jajch snopik te bin-utʼil ya xjuʼ ya skoltayik te hermanoetik ta Betel ta Ucrania. Te Comité yuʼun Coordinadoretik sok te Comité yuʼun Publicación yuʼun te Cuerpo Gobernante la yalik te jaʼuk ya schapik te bitʼil ya xkoltaywanik te hermanoetik te ya x-aʼtejik ta Departamento Mundial yuʼun Compra soknix te hermanoetik ta Betel yuʼun Ucrania sok Polonia. Te hermanoetik te ya x-aʼtejik ta departamento yuʼun Compra, ta Envíos, ta Departamento yuʼun Schajpanel Kʼopetik ta swenta Legal yuʼun te Beteletik-abi, la stsob sbaik ta jujun kʼajkʼal ta yilel te bitʼil ya yakʼik te koltayele, jaʼnix jich tey ay-euk-a jtul hermano yuʼun te Comité yuʼun Betel ta Ucrania soknix chaʼoxtul hermanoetik te ya x-aʼtejik ta Departamento Mundial yuʼun Compra.

 Te hermano Jay Swinney te ya x-aʼtej ta Departamento Mundial yuʼun Compra, jich la schol: «Ta nail ya skʼan ya jnaʼtik te bintik ya xtuun yuʼunik-a te hermanoetike. Ya jkʼan ya kakʼbeytik weʼelil te ya snaʼbey sbaike soknix xapon, papel higiénico sok yantikxan te bintik ya xtuun yuʼunike. Pero ma jaʼuknax wokol la jnaʼtik te bintik ya xtuun yuʼunike, jaʼnix jich wokol la kiltik te bin-utʼil leknax sok oranax ya xkʼot te biluketik ta Ucrania».

 Ta 9 yuʼun marzo ta 2022, naʼbilix-a te bin ya yichʼ tikunel baele. Ya yichʼ tael ta nopel te ya yichʼ otsesel ta caja te bintik ya yichʼ tikunel baele, jich bitʼil tiʼbal sok chay te ay ta lataetik, trigo, arroz, chenekʼ, xapon sok papel higiénico. Te kʼalal la yichʼ chajpanele, la yilik te ayniwan ya xlokʼ 1,300 peso (65 dólar) stojol te bin ya yichʼ manel ta swenta jtul ants winik te chanebniwan semana ya xjalaj yuʼun. Te bitʼil bayal ta mil hermanoetik ya xbajt tuunuk yuʼunik te biluketik-abi, te Comité yuʼun Coordinadoretik lek la yilik te ya yichʼ tuuntesel bayal takʼin yuʼun ya yichʼ manel te bintik ya xtuun yuʼun te hermanoetike. Pero, ¿bin ya skʼan ya spasik swenta ma ya sta swokolik te kʼalal ya spuktiklanik te biluketik-abi?

 Ta 13 yuʼun marzo, chaʼtul hermanoetik yuʼun Polonia la spasik jun prueba: jaʼ te la yichʼik bael te biluketik te ay ta Betel yuʼun Polonia kʼalalto ta jun almacén ta Ucrania, te nopol ay ta Leópolis (Lviv). Juncheb kʼajkʼal ta nail, te hermanoetik ta Betel yuʼun Ucrania sok Polonia koltaywanik ta schajpanel te bin-utʼil ya xbajtike. La schajpanik te junetik te ya yakʼ ta naʼel te ya xkʼaxik bael ta Ucrania swenta ya yichʼik bael koltayel, la yichʼ ilel te ayuk smarcail te carroetik te ya yichʼ bael te biluketik swenta ya yichʼ naʼel te jaʼ carroetik te ya skuch bael te koltayele, jaʼnix jich koltaywanik te hermanoetik te jaʼ slumalik te Ucrania yuʼun ya snaʼik te bin beil ya xjuʼ ya stʼunik yuʼun oranax ya xkʼotik te banti ay te almacén. Te kʼalal ayikix-a te biluketik ta Leópolis, mato sta 24 ora te la yichʼ akʼtiklanbeyel te Comiteetik yuʼun Socorro. Te hermanoetik te bajtik yijkitayik te biluketike leknax sujtik bael ta Polonia, maba la staik swokolik. Lek lokʼ spisil ta swenta te lek la schajpanike sok te koltayel akʼbotik yuʼun te Jehová.

 Lek lokʼ te sbabial prueba, ma sta jun tonelada te la spuk te hermanoetike. Yato skʼan yichʼxan pukel 200 tonelada. Pero, ¿bin-utʼil ya yichʼik bael sok te ya yichʼ pukel ta oranax?

 Bayal te machʼatik la skʼoponik ta jw.org te bitʼil te guerra yak ta yakʼbeyel swokol te hermanoetik, la skʼan yakʼik koltayel. Te machʼatik namal nainemik ta Ucrania la yakʼik majtan takʼin ta swenta te aʼtelil ya spasik te testigoetik yuʼun Jehová ta swolol te Balumilal, melel snaʼojik te ya yichʼ tuuntesel ta lek te takʼin. Te yantik nacionetik te nopol ayik sok, la yakʼik stiempoik, te bintik ay yuʼunik sok te yipik ta koltaywanej. Kiltik cheʼoxebuk ejemplo.

 Ta Polonia, kʼax bayal te machʼatik la sjap sbaik ta koltaywanej, la schajpanik bayal ta mil cajaetik te yichʼoj te bin ya xtuun yuʼun te hermanoetik, jaʼnix jich bayal chʼin alaletik la spasik dibujoetik ta stojol te hermanoetik. Te hermano Bartosz Kościelniak te ya x-aʼtej ta Departamento yuʼun Compra ta Betel yuʼun Polonia, la yal: «Te Salmo 110:3 ya yal te pueblo yuʼun te Jehová jun yoʼtan ya yakʼ sba ta swenta. Bayal buelta jkʼoponoj te texto-abi, la kil te yuʼun-nix jich-a, melel la kil te bayal ta 100 ta tul talemik ta koltaywanej ta oranax».

 Jtul hermano te ay camionetik yuʼun te ya yichʼ tuuntesel ta empresa yuʼun la yakʼ ta majanel te camionetik sok jaʼnix la stoj te gasolina te la yichʼ tuuntesel, jich la yal: «Jich ya kaʼiy te ya kakʼbey yil te Jehová sok te kermanotak te bayal kʼuxik ta koʼtan. Tseʼel koʼtan yuʼun te koltaywanone». Swenta ya yichʼ pukel spisil te bintik la yichʼ akʼel ta stojol te hermanoetike, la yakʼik ta majtanil kʼaxem ta 7,700 litro yuʼun gasolina, jaʼnix jich te hermanoetik la slokʼes stiempoik sok yipik ta sbeentayel jteb ma sta 48 mil kilómetro.

 Ta swenta te skʼuxul yoʼtanik sok te tulan aʼtejik te machʼatik la sjap sbaik ta koltaywanej, ta 28 yuʼun marzo —te kʼalal kʼaxemix 15 kʼajkʼal-a te sujtik tal ta spasel te sbabial prueba— ichʼbilix bael ta Ucrania 100 tonelada yuʼun weʼelil, poxetik sok yantikxan. Kʼax bayal bintik la skʼebanik te hermanoetik soknix te machʼatik ya schonik te bintik ya xtuune, jaʼ yuʼun ma bayal la slajinik te takʼin yuʼun ya schajpanik te cajaetik te yichʼoj te biluketik ta skoltayel te hermanoetik. Ta ora ini, te stestigotak te Jehová stikunojikix bael kʼaxem ta 190 tonelada te biluketik ta Ucrania. ¿Bin yaʼiyel la yaʼiy sbaik te hermanoetik te la yichʼik te koltayele?

 Kʼalal kʼot ta Leópolis te cajaetik, te Comiteetik yuʼun Socorro ta Ucrania la spukik ta stojol te machʼatik ya xtuun yuʼunike. Ta Leópolis aytoxan lumetik te 1,300 kilómetro snamalil yiloj sba soke, teyto bajt ta ijkitayel-a te cajaetik. Manchukme la spasik tulan te oranax ya spukik te biluketike, lananix yichʼ bayal tiempo-a. a

 Te hermano Markus Reinhardt, te ya x-aʼtej ta Comité yuʼun Betel ta Ucrania, jich la yal: «Ta swenta te bin yak ta kʼoel ta pasele, bayal hermanoetik staojik ta ilel te skʼuxul yoʼtan te Jehová soknix staojik ta ilel te ya staik lekilal yuʼun te kʼalal ya schʼuunik te bintik ya yal te organización te kʼalal mato sitintayojik jun wokolil. Jich bitʼil, jpisil albilotik te yakuk jkʼejtik weʼelil sok jaʼ swenta cheʼoxeb semana. Ta swenta ini, jtul anciano te Anton sbiil te ay ta congregación ta Kiev jich la yal: ‹Ya kaltik bayal wokol yuʼun te bitʼil schajpanojotik te organización ta sitintayel wokolil jich bitʼil ini. Te bitʼil jkʼejojtik jaʼ, jweʼeltik sok jun radio jaʼ la skoltayotik-abi›. Kʼax lek te schʼuunojik ini te hermanoetike, melel jich akʼbot tiempo te Betel yuʼun ya schajpanik-a te koltayele».

 ¿Bin-utʼil la yaʼiy sbaik te hermanoetik kʼalal kʼot ta stojolik te koltayele? Te Míkola sok te Zinaida, te kuxinemik ta Járkov, jich la yalik: «Te bitʼil bayal ya smel yoʼtanik ta jtojoltik ya stij koʼtantik. Kʼax wokolawalik yuʼun te weʼelil sok te poxetike. Chikan ta ilel te jaʼ yak ta koltaywanej te Jehová». Te Valentina, te jaʼ slumal-euk te Járkov, jich la yal: «Kʼalal jach te guerra, kʼax bayal machʼatik ya schol sbaik ta smanel te weʼelil, sok aynix baeltik te maba ya jtatik te bin ya xtuun kuʼuntike. Pero, te Jehová snaʼoj ta lek te jwokoltike. Jaʼ yuʼun la stijbey yoʼtan te hermanoetik yuʼun ya yichʼik bael ta jnatik te cajaetik te yichʼojik te bin-nix ya xtuun kuʼuntik-ae. Kʼalal kʼax tulanix-a te jwokoltik sok te jich yilel te maʼyuk bin ya xjuʼix kuʼuntik spasele, ya awil bin-utʼil kʼax tʼujbil ya skanantayat te Jehová sok te organización yuʼune. Ya xkux kʼinal kaʼiytik kʼalal ya kiltik te bitʼil mero yorail ya kichʼtik akʼbeyel te koltayele».

 Te Evguen, Irina sok Mikita, te anik lokʼel ta Mariúpol, jich la yalik: «Kʼax wokolawalik yuʼun te kanantayel sok te yutsil awoʼtanik awakʼojik ta ilel ta stojol te jfamiliatik. La kichʼtik te koltayel te bin-nix ora ya xtuun kuʼuntik-ae. Jnaʼojtik-a te bitʼil te cajaetike yichʼojik biluketik, pero kʼalal la jamtike la kiltik te nojel ta kʼuxul oʼtanil».

 Chikan ta ilel te jaʼ ya stojobtesotik te schʼul espíritu te Jehová te kʼalal ya jpuktik te koltayel ta yorail te guerra. Pero jaʼnixme jich kʼax mukʼ skʼoplal te majtanil takʼin la awakʼik ta swenta te aʼtelil ya spasik te testigoetik yuʼun Jehová ta swolol Balumilal, ayniwan jaʼ la awakʼik ta donate.pr418.com. ¡Mero wokolawalik yuʼun te yutsil awoʼtanik!

La jpastik tulan te lekuk sok te orauk ya kakʼtik te koltayel

1. 24 yuʼun febrero ta 2022: Te Comité yuʼun Coordinadoretik la yalik te ya xjuʼ akʼel takʼin ta stojol te Betel yuʼun Ucrania yuʼun ya skoltayik te hermanoetik te ayik ta wokol.

2. 24 yuʼun febrero kʼalal 8 yuʼun marzo ta 2022: Te Betel ta Ucrania la sman te bintik ya xtuun sok jajch spuktiklan ta swenta te Comiteetik yuʼun Socorro. Te hermanoetik yuʼun te Betel ta Ucrania la schajpan sbaik yuʼun ya yichʼik te koltayel te ya stikunik tal te hermanoetik ta Polonia soknix te yakuk spuktiklanike.

3. 9 yuʼun marzo ta 2022: Te Comité yuʼun Coordinadoretik lek la yilik te ya yichʼ tikunel koltayel ta stojol te hermanoetik ta Ucrania.

4. 10 kʼalal 12 yuʼun marzo ta 2022: La yichʼ chajpanel te bin-utʼil ya xbajt ijkitayel te weʼelil sok yantik biluketik te la yichʼ tsobel ta Polonia yuʼun ya xbajt ijkitayel ta Leópolis (Ucrania).

5. 13 yuʼun marzo ta 2022: La yichʼ pasel te sbabial prueba te bitʼil ya xbajt ijkitayel te weʼelil sok yantikxan biluketik. Lokʼik ta Polonia bajtik kʼalal ta Leópolis.

6. 14 kʼalal 16 yuʼun marzo ta 2022: Ta Polonia, te hermanoetik te ya xkoltaywanik ta Departamento yuʼun Diseño sok Construcción la stsob sbaik ta jun sNail mukʼul tsoblej te nopol ay ta Poznań yuʼun ya yotsesik ta cajaetik te weʼelil sok yantikxan biluketik.

7. 17 yuʼun marzo ta 2022: Chaneb kʼajkʼal ta patil te kʼalal la yichʼ pasel te sbabial pruebae, jach ichʼel bael 13 tonelada yuʼun koltayel ta stojol te hermanoetik ta banti stiʼil skʼinal te Ucrania.

8. 21 kʼalal 27 yuʼun marzo ta 2022: La yichʼxan chajpanel cajaetik ta Polonia sok la yichʼ tikunel bael ta Ucrania. Mato sta 24 ora-a, te la yichʼ puktiklanel ta stojol te hermanoetik te ya xtuunxan yuʼunike.

9. 28 yuʼun marzo ta 2022: Ayix 20 kʼajkʼal te la yichʼ alel te ya yichʼ tikunel bael koltayel ta Ucrania, jaʼto tal-abi puktiklanbilix 100 tonelada yuʼun weʼelil, poxetik sok yantikxan biluketik.

 Jaʼto ta ora ini, te testigootik yuʼun Jehová jtikunojtikix bael 190 tonelada yuʼun biluketik ta Ucrania.