Te Biblia ya yal te ta slajibal kʼajkʼal ya x-ayin guerraetik, tulan nijkel, tulan chamel sok te «bintik xiʼbantik sba» (Lucas 21:10, 11). Ta jaʼbil yuʼun servicio 2022 a la kiltik te yak ta kʼoel ta pasel te albilkʼop ini. Jun ejemplo, bayal millón ta tul ants winiketik la sta swokolik ta skaj te guerra ta Ucrania. Te ants winiketik ta swolol balumilal yaktonax ta lekubel te skuxlejalik yuʼun te chamel COVID-19. Jaʼnix jich, bayal ants winiketik kʼax swokolik yuʼun te bintik ya xjinawan jilel, jich bitʼil nijkel ta Haití, tulan yikʼal jaʼal ta Centroamérica, Filipinas sok ta sureste yuʼun África. ¿Bin-utʼil koltaywanik te testigoetik yuʼun Jehová?

 Ta jaʼbil yuʼun servicio 2022, te organización yuʼun Jehová la skoltay te machʼatik la sitintayik 200 ta chajp wokoliletik te ya xjinawan jilel. Ta spisil, la yichʼ lajinel jteb ma sta 12 millón ta dólar. b Kiltik te bin-utʼil la yichʼ tuuntesel te majtan takʼin ta skoltayel te ants winiketik kʼalal kʼax cheb tulan wokoliletik te ya xjinawan jilel.

 Ta 14 yuʼun agosto ta 2021, kʼax jun tulan nijkel ta sur yuʼun Haití te 7.2 yip. Mel-oʼtantik sba te lajik chaʼtul hermanaetik sok jtul hermano. Te nijkel ini la yakʼbey jilel yejchen ta sbakʼetal te ants winiketik sok ta swenta te bin yaʼiyel ya yaʼiy sbaike. Jtul hermano te Stephane sbiil la yal: «Bayal ants winiketik lajik, ta cheb u, bayal machʼatik la yichʼ mukel ta jujun semana». Yan hermano, te Éliézer sbiil, jich ya yal: «Bayal hermanoetik laj te snaik, maʼyuk skʼuʼ spakʼik, xanabik o stepik sok yantikxan te bin ya xtuun yuʼunik. Jaʼnix jich, te bitʼil bayal buelta kʼax, bayal u xiwik te ants winiketik».

 Ta oranax, te organización yuʼun Jehová jajch ta koltaywanej. Te Betel yuʼun Haití la spuk tiendaetik yuʼun campaña, lonaetik, colchonetik, cargadoretik te ya xkʼixnaj ta kʼajkʼal yuʼun te celularetik sok kʼaxem ta 53 tonelada weʼelil. Jaʼnix jich la yichʼ lekubtesel o la yichʼik chaʼpasel kʼaxem ta 100 naetik. Ta swenta te koltayel ini la yichʼ tuuntesel kʼaxem ta jun millón ta dólar.

 Te hermanoetik ya yalik bayal wokol yuʼun. Te Lorette ya yal: «Te nijkel la slajin ta jkʼaxel te jnatik sok te jnegociotik. Ni jaʼuk ay kuʼuntik te jweʼeltik. Pero te organización yuʼun Jehová bayal la skoltayotik, la yakʼbotik spisil te bin ya xtuun kuʼuntik ta spisil-ora». Te Micheline ya yal: «Te cheb jnichʼnab sok te joʼon kuxinemotik ta jun chʼin na te ma mero lek pasbile, jich yuʼun te nijkel la slajin ta jkʼaxel. Te bin-nax juʼ kuʼun spasel jaʼ te oración, sok te Jehová la sjakʼbon ta swenta te organización yuʼun. Wokolayal te hermanoetik, ta ora ini ayix jnatik te lekxane sok ya xjuʼ xkuxinotik tey-a. Te Jehová bayal bin spasoj ta jtojol, jich yuʼun ya jkʼan kalbey wokol ta jujun kʼajkʼal».

 Te koltayel la kakʼtik la staik ta ilel te j-aʼtelpatanetik. Te director yuʼun ayuntamiento yuʼun LʼAsile ya yal: «Ya kutsilkʼoptayex yuʼun te oranax talex ta koltaywanej. ¡Sok ma jaʼuknax-abi! Jaʼnix jich, ya awichʼik ta wenta te j-aʼtelpatanetik. Ya jmulan yilel te ma jaʼuk ya amel awoʼtanik yuʼun te takʼin, jaʼ te ants winiketik. Chikan ta ilel te ya apasik ta swenta skʼuxul awoʼtanik».

 Ta 24 yuʼun enero ta 2022, te tulan yikʼal jaʼal Ana kʼot ta Mozambique ta patil kʼax bael ta Malaui. Te sutuikʼ la yichʼ tal tulan jaʼal sok tulan ikʼ te ya xbeen 100 kilómetro ta jun ora. Ta skaj-abi bajt te luz, la slajin tsʼajkʼetik sok noj jaʼetik yuʼun.

 Kʼaxem ta 30 mil ta tul stestigotak yuʼun Jehová ta Malaui sok Mozambique la sta swokolik yuʼun te tulan yikʼal jaʼal. Te Charles, jtul hermano te ya x-aʼtej ta jkoltaywanej, jich ya yal: «Jich la kaʼiy te ma xjuʼ ya jkoltayik. Kʼalal la kil te swokol te hermanoetik sok te bin chʼay yuʼunik, bayal la jmel koʼtan». Jaʼnix jich, te jteb weʼelil ay yuʼunik-a sok te bin stsʼunojik lajinot yuʼun te tulan yikʼal jaʼal. Bayal machʼatik laj snaik. Mel-oʼtantik sba te jtul hermano laj te yinam sok te cheb yantsil snichʼnab; la sjikʼik jaʼ kʼalal botkʼij te lancha te ikʼotik bael-a.

 Kʼax xiʼbantik sba te tulan yikʼal jaʼal. Ta la una de la mañana, ta Nchalo, Malaui, te familia Sengeredo ay bin la yaʼiy te kʼax xiʼbantik sba: te jaʼe yak ta noptsajel talel ta sna. ¡Melel cheb mukʼul jaʼetik bayal nojik! Te hermano Sengeredo sok te sfamilia la staik ta nopel te ya xlokʼik ta anel. Kʼax lek te jich la spasike, ma jaluk ta patil te nojel jaʼe la slajin ta jkʼaxel te nae sok te bintik ay ta yutil. Te familia bajtik ta sNail Tsoblej, te ay 30 minuto snamalil, pero ta ora ini jalajik cheb ora yuʼun ya xkʼotik. Mero ajchʼemik sok lujbenik-a kʼotik, pero ma la staik wokol.

 Te Betel ta Malaui sok Mozambique oranax jajchik ta koltaywanej. La skʼanbeyik te superintendenteetik yuʼun circuito sok te ancianoetik te yakuk yilik te bin ya xtuun yuʼun te hermanoetik sok te yakuk yakʼbeyik koltayel ta swenta te bin yaʼiyel ya yaʼiy sbaik sok ta swenta te schʼuunel yoʼtanik. La yichʼ chajpanel bayal Comiteetik yuʼun Socorro yuʼun ya yilik te aʼtelil ini. Ta swenta ini, ma jaluk ta patil, te hermanoetik la yichʼik akʼbeyel weʼeliletik sok yantikxan te bin ya xtuun yuʼunik ta bayal. La yichʼik tuuntesel kʼaxem ta 33 mil dólar yuʼun yakʼel koltayel, sok kʼaxem ta 300 mil dólar yuʼun slekubtesel sok schaʼpasel naetik.

 Te Comiteetik yuʼun Socorro la stuuntesik ta lek te majtan takʼin, mukʼ skʼoplal te jich la spasik ta skaj te bayal toyem stojol te biluketik. Jun ejemplo, te sbabial jukeb u, kʼalal jach ta akʼel te koltayel, te stojol te harina —te jaʼ te bin ya xtuun yuʼunik ta jujun kʼajkʼal ta Malaui— mo 70% te stojol. Jaʼnix jich, mo stojol te gasolina. Swenta ma slajinik bayal takʼin, te hermanoetik te nopolnax ayik la smanik bayal weʼelil. Jich pejkʼanbotik te stojol sok jich ma la slajinikix takʼin yuʼun ya yichʼik tikunbeyel te weʼelile.

 Spisil te bin la spasik la stijbey yoʼtan te j-abatetik yuʼun Jehová. Felisberto, jtul hermano te ay ta Mozambique, jich ya yal: «Maʼyuk bin-ora kiloj te ay jun organización te ya yakʼ te bin ya xtuun kuʼuntike: ya yakʼik te bin ya xtuun ta spasel naetik, j-aʼteletik, weʼeliletik sok ya stojobtesat sok yutsil yoʼtan. La yakʼik ta ilel te kʼuxul oʼtanil te bin la yal te Jesús ta Juan 13:34, 35». Ester, jtul hermana te ay ta Malaui te jaʼ meʼba ants, te laj te snae, jich ya yal: «¡Ma jnaʼix te bin ya jpas! Maʼyuk jtakʼin yuʼun ya jpas yan buelta te jnae. Kʼalal te hermanoetik julik sok la spasbonik te jnae, jich la kaʼiy jba te ayonix ta Nichimal Kʼinal».

 Te bitʼil mato xtal te achʼ balumilal, yananix xkʼax-a te bintik ya xjinawan jilele (Mateo 24:7, 8). Wokolawalik yuʼun te majtan takʼin te ya awakʼike, jnaʼojtik te lum yuʼun Jehová ya yichʼ spisil-ora te bin ya xtuun yuʼunik. Ta donate.pr418.com ya xjuʼ ya awil bin-utʼil ya awakʼ te majtan takʼin. ¡Yame kaltik wokol yuʼun te yutsil awoʼtanik!