Ta julio 2022 bayal machʼatik lajemik ta swolol Balumilal ta swenta te machʼatik ya xtujkʼaywanik:

•   «Te kʼalal la yichʼ milel te político te kʼax naʼbilxan sba ta Japón [jaʼ te Shinzo Abe te aʼtej ta jwolwanej yuʼun jun partido] chamnax yoʼtan te snacion soknix te ants winiketik ta swolol Balumilal, melel ta Japón maʼyuk bayal te jich ya xkʼot ta pasel ta swenta te ay leyetik te bitʼil ya yichʼ tuuntesel te tujkʼe» (10 yuʼun julio 2022, The Japan Times).

•   «Jtul jmilawal la yotsesbey xiwel te ants winiketik ta Dinamarca kʼalal la smil oxtul ants winiketik ta jun mukʼul tienda te ay ta Copenhague» (4 yuʼun julio 2022, Reuters).

•   «Ta Sudáfrica chaʼoxtul winiketik jajchik ta tujkʼaywanej te banti ya yuchʼik trago te ants winiketik ta Soweto sok la smilik jilel 15 ta tul» (10 yuʼun julio 2022, The Guardian).

•   «Ta Estados Unidos lajik kʼaxem ta 220 ta tul ants winiketik ta swenta te la yichʼik tujkʼayel te semana te la yichʼ pasbeyel skʼinul te 4 yuʼun julio» (5 yuʼun julio 2022, CBS News).

 ¿Aybal bin-ora ya xlaj skʼoplal te miltamba? ¿Bin ya yal te Biblia?

 Te Biblia ya yal te yakotik ta kuxinel ta «slajibal kʼajkʼale», te banti kʼaxto ya x-utsʼinwanik te ants winiketik sok kʼax chopol stalelik (2 Timoteo 3:1, 3). Te kʼalal ya spasik te bin xiʼbantik sba, ya yotsesbeyik xiwel ta yoʼtan te ants winiketik (Lucas 21:11). Pero, te Biblia ya yal te ya xlaj skʼoplal te miltamba sok ya xnainik te ants winiketik te banti ay «lamal qʼuinal, ta nahetic te jun-oʼtanil tey a soc ta lugaretic yuʼun cux-oʼtanil» (Isaías 32:18). Pero, ¿bin-utʼil ya xlaj skʼoplal te miltamba?

 Te Dios ya xbajt slajin te chopol ants winiketik sok te aʼtejibaletik yuʼun miltamba.

•   «Te machʼatic chopolic ya me yichʼic loqʼuesel ta qʼuinal» (Proverbios 2:22).

•   «[Te Dios] ya yacʼ quehchajuc guerrahetic cʼalal ta stiʼil bahlumilal; ya swacʼ te tʼihmalteʼ soc te lanza, soc ya schicʼ ta cʼahcʼ te carretahetic yuʼun guerra» (Salmo 46:9).

 Te Dios yame snojptes te ants winiketik yuʼun ma x-utsʼinwanikix, jich ya slajinbey skʼoplal te miltamba.

•   «Ma ba ya xʼutsʼinwan soc ma ba ya xlajinwan ta spisil te chʼul wits cuʼun, como hich te bin utʼil nojel ta haʼ te mar, hich ya xnaʼbot sba te Jehová ta spahmal qʼuinal» (Isaías 11:9).

•   Ta ora ini, te Dios yak ta snojptesel te ants winiketik ta swolol Balumilal te manchuk ya yaʼiyik utsʼinwanej sok te manchuk ya stuuntesik te bintik ya xmilawan, sok te yakuk «scʼatpʼunic ta azadonetic te espadahetic yuʼunic, soc ta hocetic te slanzahique» (Miqueas 4:3).

 Teme ya akʼan ya anaʼbeyxan skʼoplal te mukʼul oʼtanil te ya yal te Biblia ta swenta jun balumilal te banti maʼyukix xiwel, kʼopona te artículo «¿Es posible librarse del miedo?».

 Teme ya akʼan ya anaʼbeyxan skʼoplal te bin-utʼil ya xlaj skʼoplal ta jkʼaxel te miltamba, kʼopona te artículo «¡Por fin paz en la Tierra!».