«Te kʼalal chʼinonto-ae te jbankil spisil-ora la smajon sok la sbolkʼoptayon. Te kʼalal nujpunon jaʼnix jich te kalib meʼel la yutsʼinon. Te kalib meʼel sok te kalib mamal la smosoinonik. La jnop ta koʼtan te ya jmil jbae»(Madhu, a India).

 Te Organización Mundial de la Salud jich ya yal: «Te utsʼinel ta stojol te antsetik pujkem ta swolol Balumilal». Jaʼnix jich ya yal, ta oxtul antsetik, jtul yichʼoj majel o yichʼoj tsakel ta utsʼinel.

 Teme ay jich kʼaxem ta atojol, jichniwan ya awaʼiy te chikan banti ya xbaat ya awichʼ utsʼinel, bolkʼoptayel o tsakel ta utsʼinel. Ta swenta te bayal yichʼoj utsʼinel te antsetik, yaniwan anop ta awoʼtan te maʼyuk skʼoplalike. Pero, ¿aybal skʼoplalik ta yoʼtan te Diose?

 Texto yuʼun Biblia: «La spas te winik sok te ants» (Génesis 1:27).

 Te bin ya skʼan ya yal: Te Dios la spas te winik sok te ants, ta schebalik ya skʼan te ya yichʼik ichʼel ta mukʼ. Jaʼnix jich te mamalalil ya skʼan te kʼuxuk ya yaʼiy ta yoʼtan te yinam jich te bin utʼil kʼux ya yaʼiy sbae, ma jaʼuk te ya sbolkʼoptay o te ya smaj sok te jaʼ ya yakʼ ta chʼuunel te bin ya skʼan yoʼtan stukele (Efesios 5:33; Colosenses 3:19). Chikan ta ilel-abi te Dios ya skʼan te kʼuxuk aʼiybil ya yaʼiy sba te ants sok te kanantaybiluk.

 «Te kʼalal chʼin achʼixonto-a bayal machʼatik ta jfamilia la stsak yutsʼinonik. Kʼalal ayix 17 kaʼbilal-a te kajwal ta aʼtel la yalbon te ya slokʼeson ta kaʼtel teme maba ya jokin ta wayel. Te kʼalal ayix kaʼbilal-a, te jmamalal, te jmeʼ jtat sok te jpatxujk maʼyuk jkʼoplal la yilonik. Pero patil la jnaʼbey sba te Jehová, b jaʼ te Jpaswanej. La jnop te ya yichʼ ta mukʼ te antsetik, kʼot ta koʼtan te ya skʼanon sok te ay jkʼoplal ta yoʼtan» (María, Argentina).

 Texto yuʼun Biblia: «Ay machʼatic te cʼax hich jun yoʼtan sbahic te bin utʼil te machʼa jun smeʼstat soque» (Proverbios 18:24).

 Te bin ya skʼan ya yal: Jtul lekil amigo spisil ora chapal yuʼun ya skoltayat. Teme ya akʼane ya xjuʼ ya acholbey yaʼiy te bin yaʼiyel ya awaʼiy aba te machʼa ya smukʼulin awoʼtan.

 «Kʼax 20 jaʼbil, maʼyuk machʼa la kalbey te la kichʼ tsakel ta utsʼinel. Maʼyuk stseʼelil koʼtan-a, la yakʼbon ansiedad sok tulan mel-oʼtan. Pero te kʼalal ay machʼa la jcholbey yaʼiy te sok skʼuxul yoʼtan la yaʼiybon te jkʼope, la yakʼbon bayal slamalil koʼtan» (Elif, Turquía).

 Texto yuʼun Biblia: «Akʼbeyaik ta stojol [te Dios] spisil te bintik ya amel awoʼtanik yuʼun, melel ayex ta yoʼtan stukel» (1 Pedro 5:7).

 Te bin ya skʼan ya yal: Spisil-ora ya yaʼiybat akʼop te Dios (Salmo 55:22; 65:2). Bayal ya skʼanat te Diose, jaʼ yuʼun ya xjuʼ ya skoltayat ta yilel te bayal akʼoplale.

 «Te kʼalal la jnaʼbey sba te Jehová jajch ta lekubel te bin yaʼiyel ya kaʼiy jba. Ta ora ini ya xjuʼ ya jkʼopon yuʼun ya kalbey te bin ay ta koʼtan. Te Dios jaʼ jich bitʼil jtul amigo te ya xkʼot ta yoʼtan te bin yaʼiyel ya kaʼiy jba» (Ana, Belice).

 Texto yuʼun Biblia: «Yac achahpan te meʼbaʼ soc te machʼa ay ta utsʼinel, scuenta yuʼun ma ba ya yaqʼuix xiwel yan buelta te ants-winic te ay ta scuenta te lumqʼuinale» (Salmo 10:18).

 Te bin ya skʼan ya yal: Te Jehová nopol ya xbajt slajinbey skʼoplal te bin ma stojiluk ta pasel, jich bin-utʼil te utsʼinel ta stojol te antsetik.

 «Snaʼel te nopol ya xbajt slajin Jehová te utsʼinel ta stojol te antsetik sok te chʼin achʼixetik yakʼojbon bayal slamalil koʼtan» (Roberta, México).

 Teme ya akʼan ya anaʼxan ta swenta te mukʼul oʼtanil ya yakʼ te Biblia, bin yuʼun ya xjuʼ ya smukʼulin awoʼtan te bin jamal yaloj ya spas te Dios sok bitʼil ya yakʼik koltayel te testigoetik yuʼun Jehová, kʼana te ayuk machʼa ya yulaʼtayat.

 Pasa descargar te artículo ini yuʼun ya apas imprimir.