Ta 2022 la yichʼ lajinel 2.24 billones de dólares ta aʼtejibaletik yuʼun guerra. Jich kʼot ta pasel kʼalal te Rusia la sjach guerra ta stojol te Ucrania. Te Instituto Internacional de Estudios para la Paz de Estocolmo (SIPRI, Stockholm International Peace Research Institute) la yal ta jun informe ta abril 2023 te bintik kʼot ta pasel ta 2022:

•   Ta Europa toy 13% te jayeb takʼin laj ta swenta te aʼtejibaletik yuʼun guerra, jaʼto tal ta Guerra Fría maʼyuk jich lajem takʼin ta swenta te aʼtejibaletik yuʼun guerra.

•   «Te jayeb takʼin la slajin te Rusia ta aʼtejibaletik yuʼun guerra toy 9.2%». Ta spisil te nacionetik te bayal slajinojik takʼin ta swenta te aʼtejibaletik yuʼun guerra, te Rusia ay ta quinto lugar-a, pero ta ora ini ayix ta tercer lugar.

•   Te Estados Unidos jaʼ te nación te bayalxan takʼin ya slajin ta aʼtejibaletik yuʼun guerra: «ta spisil te takʼin ya yichʼ lajinel ta swolol Balumilal ta swenta te aʼtejibaletik yuʼun guerra te Estados Unidos slajinoj 39%».

 Te doctor Nan Tian te jaʼnix jich kʼopoj ta informe la yakʼ te SIPRI jich la yal: «Te bitʼil yak ta toyel te jayeb takʼin ya slajinik ta spasel guerra ta swolol Balumilal ya yakʼ ta ilel te bejbe yak ta jinelxan te balumilal».

 Te Biblia yalojix-a te bayal ya skontrain sbaik ta kʼajkʼal ini te nacionetik te ayxan yipik sok ya yakʼ ta naʼel bin-utʼil ta tael te lamalkʼinal.

•   Te Biblia ya yal te ayotikix ta slajibal kʼajkʼal (Daniel 8:19).

•   Te libro yuʼun Daniel yalojix-a te ya skontrain sbaik te nacionetik te ayxan yipik. Te nacionetik ini ya stsal sbaik ta «guerra» yuʼun ya yakʼik ta ilel te machʼa ayxan yip. Ta swenta te guerraetik-abi bayal ya xlaj «cʼulejalil» o takʼin (Daniel 11:40, 42, 43).

 Teme ya akʼan anaʼxan ta swenta te albilkʼop ta Biblia, ilawil te video Yak ta kʼoel ta pasel te albilkʼop yuʼun Daniel 11.

•   Te Biblia ya yal te ya slokʼeslan te Dios te ajwaliletik ta balumilal. «Ya me shach jchahp ban cʼalal ya scuentahin jtuhl ajwalil te mayuc bin ora ya xlaj, soc ma ba ya xʼacʼot hilel ta scʼab yan nación; ha ya swuyticlan soc ya slajinlan spisil te jchahp ban cʼalal scuentahinejic te ajwaliletic ini, pero sbahtel qʼuinal ya xhil stuquel» (Daniel 2:44).

•   Te Jehová a nopolix ya yakʼ lamalkʼinal te maʼyuk bin-ora ya xlaj, melel te ants winiketik ma xjuʼ yuʼunik yakʼel. ¿Bin-utʼil ya spas? Jaʼ ya stuuntes te Wentainel te jaʼ jun gobierno te ay ta chʼulchan, ya slajin te utsʼinwanej sok spisil ta chajp aʼtejibaletik yuʼun guerra (Salmo 46:8, 9).

 Teme ya akʼan anaʼxan ta swenta te bin ya spas te Wentainel yuʼun Dios, kʼopona te artículo «Ya xbajt yakʼ bayal lamalkʼinal te Wentainel yuʼun Dios».