•   «Te China yak ta kʼaxel ta stojol te tulan kʼajkʼal, te maba ya yakʼ jaʼal sok yoxebalix jaʼbil te maʼyuk jich kʼaxeme» (The Guardian, 7 yuʼun septiembre 2022).

•   «Ta jun lugar yuʼun Africa te sbiilinej Gran cuerno de Africa ya yichʼ alel te kʼax takin te kʼinal tey-a sok ayix joʼeb jaʼbil te jich aye» (Noticias ONU, 26 yuʼun agosto 2022).

•   «Jteb ma spisiluk te Europa ya xkʼax swokolik yuʼun te ma xyakʼ jaʼal sok te maniwan ayuk jich kʼaxem te ayix 500 jaʼbil talel» (BBC News, 23 yuʼun Agosto 2022).

 Bayal pʼijil winiketik ya yalik te yatolaj xtulanajxan te bitʼil kʼax kʼux te kʼajkʼal. ¿Yabal xjuʼ ya jmaliytik te ya xlekube? ¿Bin ya yal te Biblia?

 Te albilkʼopetik te ya yal te Biblia ta jkʼajkʼaleltik:

•   «Yame xtal [...] tulan wiʼnal» (Lucas 21:11).

 Kʼalal maʼyuk jaʼal, ya xtal tulan wiʼnal. Te albilkʼopetik ya yal te ya xtal tulan wiʼnal sok te ya yakʼ wokolil jich bitʼil te lajel (Apocalipsis 6:6, 8).

 Te Biblia jich ya yal:

•   «Te ants-winic [...] ma haʼuc yuʼun te ya yal banti ya xbehen» (Jeremías 10:23).

 Jaʼ ini ya skʼan ya yal te maʼyuk bin lek ya xlokʼ yuʼun te ants winiketik teme «stukel ya swentain sbaike». Ta skaj te ma lekuk te bin ya staik ta nopel spasel, ya yakʼ wokolil jich bitʼil te maʼyuk lek jaʼ sok te ma xyakʼ te jaʼale.

•   Bayal cientificoetik ya yalik te ta skaj te bin ya spas te ants winiketik, ya xkʼixnaj te Balumilale. Jaʼ yuʼun bayal kʼajkʼal te jich jkʼaxel ma xyakʼix jaʼale, sok ay lumetik te banti kʼax tulan te kʼajkʼale.

•   Kʼunkʼun yak ta lajel te banti ya xlokʼ tal te jaʼ, manchukme kanantaybil. ¿Bin yuʼun? Jaʼ ta swenta te bikʼtal-oʼtanil, te política, te ay bin ya skʼan staik ta oranax, slajinojik bayal teʼetik, bayal contaminación sok ma snaʼik stuuntesel te bintik ay ta Balumilale.

 Pero te Biblia ay bin lek ya yakʼ jmaliytik.

 Te Biblia ya yal te Dios ya xbajt slajinbey skʼoplal te wokolil yuʼun te jaʼe. ¿Bin-utʼil ya spas?

1.  1. Te Dios ya xbajt slajin «te machʼatik yakik ta sjinel te balumilale» (Apocalipsis 11:18). Ya slajinbey skʼoplal te ants winiketik te ay sbikʼtal yoʼtanik te yakik ta sjinel te Balumilal te jich ay wokolil yuʼun te jaʼe. (2 Timoteo 3:1, 2).

2.  2. «Te taquin lum ya sutpʼij ta yawil haʼ» (Isaías 35:1, 6, 7). Te Dios ya schajpan spisil te wokolil yuʼun te maʼyuk te jaʼ sok ya skʼatpʼun ta nichimal kʼinal te Balumilal te banti ya xbajt ayinuk bayal jaʼ.

3.  3. «Haʼat yac acanantay te lumqʼuinal soc yac awaʼbe yaʼlel; bayel bintic yac awacʼtilambe» (Salmo 65:9). Sok te bendición yuʼun te Dios ya xbajt ayinuk bayal weʼelil sok lekil jaʼ.