¿Bin ya yal te Biblia ta swenta te wiʼnal?

TSUMA TA

«Maʼyukix wiʼnal». Jaʼ te bin ya skʼan ya spasik te ajwaliletik ta balumilal, ya skʼanik te ayuk sweʼel spisil te ants winiketik ta balumilal. a Pero, ¿aybal bin-ora ya xlaj te wiʼnale? ¿Bin ya yal te Biblia?

Te Biblia la yal te ya x-ayin wiʼnal

Te Biblia la yal te ya x-ayin wiʼnal ta tiempo te kuxinemotik te sbiilinoj «te slajibal kʼajkʼale» (2 Timoteo 3:1). Ma jaʼuk smul Dios te jich ya xkʼot ta pasel, pero la yakʼ jnaʼtik te jichnix ya xkʼot ta pasel-ae (Santiago 1:13). Kilbeytik skʼoplal cheb albilkʼopetik te ya yal te Biblia.

«Yame xtal tulan wiʼnal [...] ta bayuk» (Mateo 24:7). Jich bitʼil la yal te albilkʼop ini ya x-ayin bayal wiʼnal ta bayuk. Cham oʼtantik sba te bin la yal jun informe te la yalik te machʼatik ay yaʼtelik ta yilbeyel skʼoplal te weʼelil, jich la yichʼ alel: «Te ants winiketik ma yakikix ta spasel tulan yuʼun ya slajinik te wiʼnal sok te wokoliletik ya yakʼe». b Bayal millón ta tul ants winiketik ma staik te weʼelil te ya xtuun yuʼunik, ta skaj-abi bayal machʼatik ya xlajik.

«La kil jkojt ijkʼal caballo. Te machʼa kajal tey-ae yichʼoj ta skʼab jun balanza» (Apocalipsis 6:5). Ta albilkʼop ini, te caballo sok te machʼa kajal tey-a jaʼ skʼoplal te wiʼnal te ya x-ayin ta slajibal kʼajkʼal. c Te machʼa kajal ta caballo yichʼoj ta skʼab jun balanza te ya spʼis te weʼelil sok yuʼun ya yil jayebnax ya yakʼ. Jaʼnix jich ya yalbey te ants winiketik te kʼax ya xtoy stojol te weʼelil sok te manchuk xyixlanik te weʼelile (Apocalipsis 6:6). Jaʼ ini jaʼ te bin yak ta kʼoel ta pasel ta swolol balumilal, melel bayal millón ta tul ants winiketik ma staik o ma xjuʼ ya stojik te sweʼelike.

Ya xlaj skʼoplal te wiʼnal

Te machʼatik ya yilbeyik skʼoplal ini ya yalik te ya yakʼ bayal weʼelil te balumilal. Pero, ¿bin yuʼun-abi te ay ants winiketik te ayik ta wiʼnal? Sok, jich bin-utʼil ya yal te Biblia, ¿bin ya xbajt spas te Jpaswanej kuʼuntik, te Jehová, d yuʼun ya schajpan te wokolil ini?

Te wokolil: Te ajwaliletik ma xjuʼ ya slajinik te pobreil sok te wokoliletik ta skaj te takʼin te jaʼ ya yakʼ xkʼax ta wiʼnal te ants winike.

Te bin-utʼil ya xchajpaj: Te ajwaliletik ya yichʼik lajinel sok jaʼ ya swentainotik te Wentainel yuʼun te Dios sok jaʼ ajwalil ya xkʼot kuʼuntik te Jesucristo (Daniel 2:44; Mateo 6:10). Ta kʼajkʼal ini, bayal ants winiketik te pobreik wokol ya yaʼiyik smanel te sweʼelik. Pero te Wentainel yuʼun te Dios ya xbajt slajinbey skʼoplal. Te Biblia ya yal te bin ya xbajt spas te Jesús: «Ya me scoltay te pobre te ya xʼawon soc te machʼa ay swocol te mayuc machʼa ya xcoltayot yuʼune. [...] Ayuc me bayel trigo ta lumqʼuinal, ta baba witsetic» (Salmo 72:12, 16).

Te wokolil: Te guerraetik ya yakʼ bayal wokolil sok ya yakʼ xlaj te takʼin, jaʼ yuʼun ay ma xyichʼ akʼel te weʼelile.

Te bin-utʼil ya xchajpaj: «[Te Jehová] ya yacʼ quehchajuc guerrahetic cʼalal ta stiʼil bahlumilal; ya swacʼ te tʼihmalteʼ soc te lanza, soc ya schicʼ ta cʼahcʼ te carretahetic yuʼun guerra» (Salmo 46:9). Te Dios ya xbajt slajin te aʼtejibaletik yuʼun guerra sok te ants winiketik te ya spasik te guerra. Ta swenta abi, spisil te ants winiketik ya xbajt sta sweʼelik. Te Biblia jich jamal ya yal: «Ya me xnichin te bin stojil ta pasel soc ay bayel lamal qʼuinal» (Salmo 72:7).

Te wokolil: Ta skaj te kʼax kʼux te kʼajkʼal sok te ya xkʼax te bintik ya xjinawan jilel ya xlaj te bin ya yichʼ tsʼunel sok te chambalametik.

Te bin-utʼil ya xchajpaj: Te Dios ya xbajt skom te bintik spastiklanoj sok kʼax lek ya xkʼot te kʼinal yuʼun ya kaʼiytik tsʼunbajel. Te Biblia jich ya yal: «[Te Jehová ya] scʼatpʼun ta cʼunil icʼ te tulan iqʼue, hich lahmaj yip te mar. [...] Ya scʼatpʼun ta pamal haʼ te jochol taquin qʼuinal, ya scʼatpʼun ta sloqʼuib-haʼetic te taquin lumqʼuinal. Tey ya yacʼ nahinuc a te machʼatic ay swiʼnalic [...]. a yaʼiyic tsʼumbajel, ya stsʼun stsʼusubilic, bayel sit ya yacʼ» (Salmo 107:29, 35-37).

Te wokolil: Ay ants winiketik te ay sbikʼtal yoʼtanik ya spasik weʼeliletik te ya xjuʼ ya stsakotik chamel yuʼun o ma xyakʼik te ya xkʼot ta stojol te ants winiketik te weʼelile.

Te bin-utʼil ya xchajpaj: Te Wentainel yuʼun te Dios ya xbajt slajin te ants winiketik te ay sbikʼtal yoʼtanik sok te ma spasik te bin stojile (Salmo 37:10, 11; Isaías 61:8). Te Biblia jich ya yal ta stojol te Jehová: «Ya schahpan te machʼatic ay ta utsʼinel, te ya yaʼbe sweʼelic te machʼatic ayic ta wiʼnal» (Salmo 146:7).

Te wokolil: Ta jujun jaʼbil, bayal ya yichʼ ixlanel te weʼelil.

Te bin-utʼil ya xchajpaj: Te Wentainel yuʼun te Dios ma xbajt yakʼ ta ixlanel te weʼelil. Te kʼalal xtaluk ta Balumilal te Jesús, maba la yixlan te weʼelil. Ta jun buelta la smakʼlin kʼaxem ta 5.000 ta tul ants winiketik. Ta patil jich la yalbey te jnopojeletik yuʼune: «Tsobaik te jayeb xejtʼelul jile, jichme maʼyuk bin ya yichʼ ixlanel-a» (Juan 6:5-13).

Te Wentainel yuʼun te Dios ya xbajt slajin te wokoliletik ya yakʼ te wiʼnal sok te ants winiketik ya xbajt smulanik bayal weʼelil (Isaías 25:6). ¿Bin-ora ya xkʼot ta pasel-abi? Yuʼun ya atabey te sujtib, ilawil te artículo «¿Bin-ora ya swentain Balumilal te Wentainel yuʼun te Diose?»

a Agenda 2030 sobre el Desarrollo Sostenible, te la yichʼ pasel aprobar ta 2015 yuʼun spisil te Estados Miembros de las Naciones Unidas.

b Jich la yal te Organización de las Naciones Unidas para la Alimentación y la Agricultura, el Fondo Internacional de Desarrollo Agrícola, el Fondo de las Naciones Unidas para la Infancia, el Programa Mundial de Alimentos de las Naciones Unidas sok te Organización Mundial de la Salud.

c Yuʼun ya anaʼxan ta swenta te machʼatik kajalik ta caballoetik te ya yalbey skʼoplal te Apocalipsis, ilawil te artículo «¿Qué representan los jinetes del Apocalipsis?».

d Jehová sbiil te Dios (Salmo 83:18). Ilawil te artículo «¿Machʼa-a te Jehová?».