¡WIKʼILUK JSITIK SPISIL-ORA!
Te bintik chopol ya xkʼax ta skaj te política | ¿Bin ya yal te Biblia?
Ta swolol Balumilal yak ta kʼaxel te bintik chopol ta skaj te política.
Ta México, milot 39 candidatoetik yuʼun política. Maʼyuk jich kʼoem ta pasel-a sok bayal bintik chopol kʼoem ta pasel ta jaʼbil 2023 kʼalal 2024 ta skaj te política.
Ta Europa bayal wokolil kʼaxem ta skaj te política, jich bitʼil te kʼan yichʼ milel te primer ministro ta Eslovaquia ta 15 yuʼun mayo 2024.
Ta Estados Unidos, te ants winiketik chamnax yoʼtanik yuʼun te kʼalal kʼan yichʼ milel te expresidente Donald Trump ta 13 yuʼun julio 2024.
¿Bin yuʼun bayal bintik chopol ya xkʼot ta pasel ta skaj te política? ¿Aybal bin-ora ya xlaj skʼoplal? ¿Bin ya yal te Biblia?
Te ants winiketik ya xat sbaik ta skaj te política
Te Biblia la yal te ta «slajibal kʼajkʼale» te ants winiketik ya spasik te bintik chopol sok maʼyuk acuerdo ta yoʼtanik.
Ta slajibal kʼajkʼal, «yame xtal te bintik chujkultik sba sok te tulan ta sitintayele. Melel te ants winiketik jaʼnax kʼux ya yaʼiy sbaik ta stukelik; [...] ma snaʼik yalel wokol sok ma junuk yoʼtanik, maʼyuk skʼuxul yoʼtanik, maʼyuk acuerdo ta yoʼtanik, [...] kʼaxto ya x-utsʼinwanik, [...] ya x-akʼawanik ta kʼabal, sok maʼyuk razón ta yoʼtanik, nojel ta toybail te yoʼtanike» (2 Timoteo 3:1-4).
Jaʼnix jich te Biblia la yalbey skʼoplal te ta slajibal kʼajkʼal te ants winiketik ya sjachik kʼop ta stojol te ajwaliletik (Lucas 21:9). Pero te bintik chopol ya xkʼax ta skaj te política maba ya xjalaj.
Ya yichʼ lajinel te bintik chopol ya xkʼax ta skaj te política
Te Biblia ya yal te ya xbajt yichʼ lokʼesel te ajwaliletik ta Balumilal sok jaʼ ya sjelolin jilel te ajwalil ta chʼulchan.
«Te Dios ta chʼulchan ya me shach jchahp ban cʼalal ya scuentahin jtuhl ajwalil [...] ha ya swuyticlan soc ya slajinlan spisil te jchahp ban cʼalal scuentahinejic te ajwaliletic ini, pero sbahtel qʼuinal ya xhil stuquel» (Daniel 2:44).
Te Wentainel yuʼun Dios ya yakʼ ya x-ayin lamalkʼinal sok te jun-nax ya x-ayinik te ants winiketik ta swolol Balumilal.
Te ajwalil Jesucristo ya yichʼ biilintesel «Snichʼan ajwalil yuʼun lamal qʼuinal». Jaʼ ya yakʼ lamalkʼinal ta Balumilal.
Ta ora ini te machʼatik yakʼoj sbaik ta stojol te Wentainel ini ayikix ta snopel bin-utʼil ya xkuxinik ta lamalkʼinal. Te Biblia ya yalbel skʼoplal ta swenta te ants winiketik abi: «Ya scʼatpʼunic ta arado te espada yuʼunic, soc te slanzahic ya scʼatpʼunic ta hoz. Mayuc nación ya shach espada ta scontrahinel yan nación, soc ma ba ya schahpanix sbahic ta yaqʼuel guerra» (Isaías 2:3, 4).
Teme ya akʼan ya anaʼbeyxan skʼoplal, kʼopona te artículo «¿Bin ya xbajt spas te Wentainel yuʼun te Dios?» Sok ilawil te video ¿Bin-a te Wentainel yuʼun te Diose?