¿Aybal smukʼul awoʼtan te ay bin lek ya xkʼot ta pasel ta pajel chaʼbej? Manchukme bayal wokoliletik ta ora ini, bayal machʼatik ay smukʼul yoʼtanik. Pero, ¿yuʼun-nixbal ya xlekub-a te jkuxlejaltik ta pajel chaʼbeje? Yak. Te Biblia ya yakʼ jmaliytik jun lekil kuxlejalil ta pajel chaʼbej.

•  ¿Bin ya yal te Bibliae?

•  ¿Yuʼun-nixbal melel-a te bin ya yal te Bibliae?

•  ¿Bin-utʼil ya xkʼot ta pasel te bin ya yal te Bibliae?

•  ¿Bin-ora ya xkʼot ta pasel te bin ya yal te Bibliae?

•  ¿Bin-utʼil ya skoltayat ta ora ini te bin ya yal te Bibliae?

 Te Biblia yakʼojix ta naʼel-a te wokoliletik ay ta ora ini, pero ya yal te ya sta yorail te ya xtupʼ skʼoplal. Kiltik cheʼoxebuk.

•   Wokolil: ay machʼatik maʼyuk snaik

   Te bin ya yal te Bibliae: «Ya spasic nahetic soc ya xnahinic tey a» (Isaías 65:21).

   Te bin ya xkʼot ta pasel: Spisil te ants winiketik ya xbajt ayinuk snaik.

•   Wokolil: ay pobreil sok ay machʼatik ma sta yaʼtelik

   Te bin ya yal te Bibliae: «Te machʼatic tsahbilic cuʼun ya me yaʼiybe yutsilal te yaʼtel scʼabique» (Isaías 65:22).

   Te bin ya xkʼot ta pasel: Spisil te ants winiketik jaʼ ya x-aʼtejik-a te bin ya smulanik sok te lek ya yaʼiy sbaik yuʼune.

•   Wokolil: te bintik ma stojiluk ya yichʼ pasel

   Te bin ya yal te Bibliae: «Príncipaletic te toj ya xchahpanwanic» (Isaías 32:1).

   Te bin ya xkʼot ta pasel: Maʼyuk machʼa pobreix sok maʼyuk machʼa ya yichʼ pʼajel ta skaj te stsʼumbale.

•   Wokolil: te maʼyuk lekil weʼelil sok te ay wiʼnal

   Te bin ya yal te Bibliae: «[Ayme] bayel trigo [o weʼelil] ta lumqʼuinal, ta baba witsetic» (Salmo 72:16).

   Te bin ya xkʼot ta pasel: Ya x-ayin bayal lekil weʼelil sok maʼyuk machʼa stsʼikoj swiʼnal ya xbajt ta wayel.

•   Wokolil: miltamba, majtamba, utsʼinwanej

   Te bin ya yal te Bibliae: «Jujutuhl ya shuhcan sbahic ta yeʼtal te stsʼusubil soc ta yeʼtal te higuera yuʼune, mayuc machʼa ya xiwtesotic yuʼun» (Miqueas 4:4).

   Te bin ya xkʼot ta pasel: Maʼyuk machʼa ya xiwix, melel maʼyukix chopol ants winiketik. «Te machʼatic toj yoʼtanic ya me yichʼic hilel te qʼuinale» (Salmo 37:10, 29).

•   Wokolil: guerraetik

   Te bin ya yal te Bibliae: «Mayuc nación ya shach espada ta scontrahinel yan nación, soc ma ba ya schahpanix sbahic ta yaqʼuel guerra» (Isaías 2:4).

   Te bin ya xkʼot ta pasel: Ya x-ayin lamalkʼinal ta spamal kʼinal (Salmo 72:7). Maʼyuk machʼa ya xwoklaj ta skaj te guerrae, maʼyuk machʼa ya xlokʼ ta anel ta slumal sok maʼyuk machʼa ya kiltikxan te ya x-okʼ ta skaj te ay machʼa ya xlaj yuʼune.

•   Wokolil: chamel

   Te bin ya yal te Bibliae: «Mayuc machʼa [...] hich ya yal: Ayon ta chamel» (Isaías 33:24).

   Te bin ya xkʼot ta pasel: Maʼyukix te machʼa ma tsʼakal yok skʼab sok maʼyuk machʼa ya stsakotix ta chamel (Isaías 35:5, 6). Te Biblia jaʼnix jich ya yal te maʼyukix machʼa ya xlaje (Apocalipsis 21:4).

•   Wokolil: bayal bin jinemix ta Balumilal

   Te bin ya yal te Bibliae: «Ay yutsil qʼuinal ya yaʼiyic te jochol taquin qʼuinal soc te taquin lum; tseʼel yoʼtan te jochol taquin qʼuinal, hich ya xnichin te bin utʼil te tsajal nichime» (Isaías 35:1).

   Te bin ya xkʼot ta pasel: Te Balumilal ya xkʼatpʼuj ta nichimal kʼinal yuʼun tey ya xkuxinik-a te ants winiketik jich bitʼil skʼanoj te Dios ta sjajchibalto tal (Génesis 2:15; Isaías 45:18).

 Ayniwan ma schʼuun awoʼtan te bin ya yal te Bibliae. Pero, ¿bin yuʼun ma xa awilbeyxan skʼoplal te bin ya yal ta swenta te pajel chaʼbeje? Te bin ya yal te Bibliae ma pajal sok te bintik ya yalik te ants winiketike. Melel te Biblia talem ta stojol te Diose. Kiltik cheb te bin yuʼun ma pajalike:

•   Ya xjuʼ ya jchʼuuntik te bin ya yal te Diose. Te Biblia ya yal te «ma xyaʼiy lot» te Diose (Tito 1:2). Sok jaʼnax te Dios ya xjuʼ ya yal te bin ya xkʼot ta pasel ta pajel chaʼbeje (Isaías 46:10). Ta Biblia ya jtatik bayal ejemploetik te ya yakʼ ta ilel te ya xkʼot ta pasel spisil te bin ya yal te Diose. Teme ya akʼan ya anaʼxane, ilawil te video ¿Bin yuʼun ya smukʼulin koʼtantik te yuʼun-nix jaʼ smelelil-a te bin ya yal te Bibliae?

•   Te Dios ya xjuʼ ya slajin te jwokoltik. Te Biblia ya yal te ay yuʼel ta spasel «spisil te bintic ya scʼan ya spas» (Salmo 135:5, 6). Te bin ya skʼan ya yal-abi, jaʼ te maʼyuk bin ya xmakot ta spasel te skʼanojel yoʼtane. Sok yoʼtanuk ya skoltayotik, melel kʼuxotik ta yoʼtan (Juan 3:16).

 Pero, jichniwan ya anop ta awoʼtan: «Teme ya skʼan sok ya xjuʼ ya skoltayotik te Diose, ¿bin yuʼun te bayalto jwokoltike?». Teme ya akʼan ya anaʼ bin yuʼune, ilawil te video ¿Bin yuʼun maba slajinoj Dios te wokolile?

 Te Dios ya spas te bin yalojix ta swenta te Wentainel yuʼun te jaʼ jun gobierno te ay ta chʼulchan. Jaʼ yakʼoj ta ajwalil te Jesucristo yuʼun ya skanantay te Balumilal soknix te machʼatik nainemik tey-ae. Kʼalal kʼax ta Balumilal te Jesuse, la slekubtes jchameletik, la smakʼlin ants winiketik, la slamantes tulan yikʼal jaʼal sok la schaʼkuxajtes ants winiketik (Marcos 4:39; 6:41-44; Lucas 4:40; Juan 11:43, 44). Te bin la spase jaʼnax cheʼoxeb ejemploetik yuʼun te bin ya spas te kʼalal ya xwentainwan jich bitʼil Ajwalil.

 Teme ya akʼan ya anaʼxan te bin ya spas ta atojol te Wentainel yuʼun Dios, ilawil te video ¿Bin-a te Wentainel yuʼun te Diose?

 Nopolme ya xkʼotix ta pasel. ¿Bin-utʼil ya jnaʼtik? Melel te Biblia la yal te bintik ya xkʼot ta pasel te kʼalal nopol ya xwentainwanix ta Balumilal-a te Wentainel yuʼun te Diose (Lucas 21:10, 11). Ta jpisiltik yakotikix ta yilel te yak ta kʼoel ta pasel te bin la yal te Bibliae.

 Teme ya akʼan ya anaʼbeyxan skʼoplal, kʼopona te artículo «¿Bin-ora ya swentain Balumilal te Wentainel yuʼun te Diose?».

 Jtul te machʼa la stsʼibay te Biblia la yal te jich kʼoem bitʼil jun «ancla» te mukʼul oʼtanil ya yakʼ te Bibliae (Hebreos 6:19). Jich bitʼil te ancla te ma xyakʼ te ya xkuchot bael yuʼun tulan ikʼ te barcoe, te lekil kuxlejalil te ya jmaliytik ta pajel chaʼbej jaʼ ya skoltayotik ta sitintayel te wokoliletik te jich kʼoem bitʼil tulan yikʼal jaʼal. Te smukʼul koʼtantik ya yakʼ te Biblia ya skoltayotik ta stael lamalkʼinal, jich ma bayal ya jmel koʼtantik sok ma stsakotik ta chamel (1 Tesalonicenses 5:8).