Ta jujun jaʼbil te testigoetik yuʼun Jehová sok bayal millón ta tul ants winiketik ta swolol Balumilal ya stsob sbaik yuʼun ya spasik te snaʼojibal slajel te Jesús, jich bitʼil la yal ta mantal (Lucas 22:19). Ta tsoblej ini ya yakʼ jnaʼtik te mukʼ skʼoplal te bin la spas te Jesús kʼalal la yakʼ te skuxlejal ta stojol te ants winiketik. Jaʼnix jich ya yakʼ jnaʼtik te bin lekilal ya xjuʼ ya jtatik ta ora-ini sok ta pajel chaʼbej te bitʼil la yakʼ sba ta lajel ta jtojoltik te Jesuse (Juan 3:16).

 Chikan teme kʼoat ta Snaʼojibal slajel te Jesús o maʼuk, ¿bin ya skʼan ya apas yuʼun ya ata alekilal te bitʼil la yakʼ sba ta lajel te Jesuse? Te Jesús la yal cheb te bin mukʼ skʼoplal te ya skʼan ya jpastik:

1.  1. Nopa ta swenta te Dios sok te Jesús. Kʼalal la skʼopon te stat te Jesuse, jich la yal: «Jichme ya sta skuxlejalik sbajtelkʼinal te ants winiketik: te ya snaʼbat aba te jaʼatnax te smelelil Diosate, sok te ya snaʼbeyik sba-euk te Jesucristo te tikunbil tal awuʼune» (Juan 17:3).

2.  2. Pasa te bin ya anope. Te Jesús la yal te mukʼ skʼoplal te ya jpastik ta jkuxlejaltik te bin la yakʼ ta nopele, jich bitʼil te kʼalal nojpteswan ta wits te Jesuse la yutsilkʼoptay te machʼatik la yaʼiybeyik te skʼop «sok te ya spas ta skuxlejale» (Lucas 6:46-48). Te Jesús jich la yalxan: «Te bitʼil anaʼojikix ini, tseʼelnaxme awoʼtanik yuʼun teme jich ya apasike» (Juan 13:17).

 ¿Yabal akʼan ya anopxan ta swenta te Dios sok te Jesús? ¿Yabal akʼan ya anaʼ bin-utʼil ya xjuʼ ya apas ta akuxlejal te bin ya anope? Ay chaʼoxchajp koltayel liʼi te ya xjuʼ ya skoltayat.

 Te nojptesel ta Biblia te ya kakʼtik te maba tojbiluk, skoltayoj bayal ants winiketik ta spasel ta skuxlejalik te bin ya snopike.

•   Ochan te banti ya yal kʼana te ay machʼa ya snojptesat ta Biblia yuʼun ya anaʼbeyxan skʼoplal.

•   Ilawil te video Kʼax lek te ya xjajch anop te Biblia, yuʼun ya awil bin-utʼil ya kakʼtik te nojptesel ta Biblia te testigoetik yuʼun Jehová.

 Te testigoetik yuʼun Jehová ya stsob sbaik cheb buelta ta jujun semana ta sNail Tsoblej. Ta tsoblejetik ini ya yichʼ nopel ta swenta te Biblia sok te bin-utʼil ya jpas ta jkuxlejaltike.

 Ta tsoblejetik ini chikan machʼatik ya xjuʼ ya x-och, manchukme ma testigouk. Jaʼ chikan te banti nainemat ya xjuʼ ya xbaat ta sNail Tsoblej o ya xjuʼ ya x-ochat ta Zoom.

•   Ilawil te video ¿Bin ya yichʼ pasel ta tsoblejetik kuʼunkotik? yuʼun ya awil bin ya yichʼ pasel ta tsoblejetik.

•   Lea te banti nopol ya xjuʼ ya xbaat ta tsoblej ta página ini: Baan ta tsoblej sok te testigoetik yuʼun Jehová.

 Bayal te articuloetik ini sok te videoetik ya skoltayat yuʼun ya anop ta swenta te bin la yakʼ ta nopel te Jesús sok te mukʼ skʼoplal te la yakʼ sba ta lajele.

 Jich bitʼil, ya xjuʼ ya anop te bin-utʼil-a te ta jtulnax winik ya xjuʼ ya sta slekilalik bayal millón ta tul ants winiketik ta swenta te articuloetik ini: «¿Bin-utʼil ya yakʼ jkoleltik te Jesús?» sok «¿Bin yuʼun kʼax swokol sok laj te Jesuse?» o ilawil te video ¿Bin yuʼun laj te Jesuse?